ބޮލީވުޑްގެ މަޝްހޫރު ފިލްމެއް ކަމަށްވާ "ވީރް ޒާރާ" އަންނަނީ އަދިވެސް މަޤްބޫލުކަން ދަމަހައްޓަމުންނެވެ. 

ނޮވެމްބަރ 12، 2004ގައި މި ފިލްމު ރިލީޒް ކޮށްފައިވާއިރު، 20އަހަރު ފުރުމުގެ މުނާސަބަތުގައި މިދިޔަ އަންގާރަ ދުވަހުވަނީ މި ފިލްމު ރީ-ރިލީޒްކޮށްފައެވެ.

ކުޅަދާނަ ޑިރެކްޓަރެއް ކަމަށްވާ ޔަޝް ޗޯޕްރާގެ މި ފިލްމުގެ ލީޑް ރޯލް ކުޅެފައިވަނީ ޝާހްރުކް ޚާން އާއި ޕްރިތީ ޒިންތާއެވެ. ލޯބީގެ އަސަރުގަދަ ފިލްމު "ވީރް ޒާރާ" އަކީ އޭރު ނުކުތް ބޮލީވުޑްގެ އެންމެ ކާމިޔާބު ފިލްމުތަކުގެ ތެރޭގައި ހިމެނުނު، އަދި ގިނަ ބައެއް ހިތްތަކާ ކުޅެލައި، ލޯބި ހޯދި ފިލްމެކެވެ. އަދި އެ އަހަރު އެންމެ ބޮޑު އާމްދަނީއެއް ވެސް ހޯދި ބޮލީވުޑްގެ ފިލްމެވެ.

2.7 މިލިއަން ޑޮލަރުގެ ބަޖެޓަކުން ހެދި މި ފިލްމަށް ވަނީ ބޮކްސް އޮފީހުގައި 11.6 މިލިއަން ޑޮލަރު ލިބިފައެވެ.

މި ފިލްމުގައި ދައްކަނީ އިންޑިއާގެ ސިފައިންގެ ތެރޭގައި މަސައްކަތްކުރާ މީހަކާއި ޕާކިސްތާނުގެ އަންހެން ކުއްޖަކު ދިމާވެ، އެ ދެމީހުންގެ މެދުގައި ލޯބީގެ ގުޅުމެއް އުފެދޭ ހިސާބުން ހިނގާ ކަންތައްތަކެވެ. އެ އަންހެން ކުއްޖާއަކީ ޕާކިސްތާނުގެ ނުފޫޒުގަދަ ސިޔާސީ ލީޑަރެއްގެ ދަރިއެކެވެ. އަންހެން ކުއްޖާގެ އާއިލާއިން އެ ގުޅުމަށް ނުރުހި އެ ދެމީހުން ދުރުކުރުމަށް ކުރާ ކަންކަމުގެ ތެރޭގައި ހިނގާ އެތައް ކަމެއް މި ފިލްމުގައި ދައްކައެވެ.

ޝާހު އާއި ޕްރިތީއާ އެކު މި ފިލްމުގެ މުހިންމު ރޯލުތައް ކުޅުނީ ރާނީ މުކަރްޖީ، އަމީތާބް ބައްޗަން، ހެމާ މާލިނީ، ދިވްޔާ ދައްތާ، ބޯމަން އިރާނީ، ކިރަން ކޭރް، އަނުޕާމް ކޭރް، މަނޯޖް ބަޖްޕާއީ އަދި ޒޮހްރާ ސޭގަލް އެވެ.