ބަޔާން މިއުނިކްގެ ސަޕޯޓަރުން ހަމަނުޖެހުން ހިންގާފައިވާތީވެ އެ ކްލަބު ޖޫރިމަނާކޮށްފިއެވެ.

މިދިޔަ އޮގަސްޓް މަހު ޖަރުމަން ކަޕްގައި އުލްމް އަތުން 4-0 އިން ބަޔާން މޮޅުވި މެޗުގައި އެ ޓީމުގެ ސަޕޯޓަރުން ވަނީ ފްލެއާ އާއި ފަޓާސް ބޭނުން ކޮށްގެން މެޗުގެ އަމާންކަން ނަގައިލާފައެވެ. އެހެން ކަމުން އެ ކުލަބު 150،000 ޔޫރޯ އިން ޖޫރިމަނާކޮށްފައެވެ.

"އެސްއެސްވީ އުލްމްއާ ދެކޮޅަށް ކުޅުނު ޑީއެފްބީ ކަޕް މެޗުގެ 46 ވަނަ މިނެޓުގައި... މިއުނިކްގެ ސަޕޯޓަރުން މަދުވެގެން 70 ފްލެއަރ އަދި 4 ފަޓާސް ބެޓަރީ ރޯކުރި، އަދި އޭގެ ތެރެއިން ބައެއް ޓްރޭސަރ އެލެމެންޓްސް އަދި ރޮކެޓް ދޫކޮށްލެވުނު، މީގެ ތެރެއިން ބައެއް ފަޓާސް ދަނޑަށް އަމާޒުކުރެވުނު، އަދި ބޯ ދުމުގެ ސަބަބުން ގާތްގަނޑަކަށް 3 މިނެޓަށް މެޗު މެދުކަނޑާލަން ޖެހުނު." ޑީއެފްބީ އިން ނެރުނު ބަޔާނުގައި ފާހަގަކޮށްފައިވެއެވެ.

ސަލާމަތީ ކަންތައްތަކަށާއި، ހަމަނުޖެހުން ހުއްޓުވުމުގެ ފިޔަވަޅުތަކަށް ބަޔާނުން ދައްކަންޖެހޭ ޖޫރިމަނާގެ ތެރެއިން ގާތްގަނޑަކަށް 50 ހާސް ޔޫރޯ އަށް ވުރެ ގިނަ ނޫން އަދަދެއް ބޭނުންކުރެވިދާނެ ކަމަށް ވެސް އެ ބަޔާނުގައި ބުނެފައިވެއެވެ. އަދި، އެ ކަންތައް އަންނަ އަހަރުގެ ޖޫން މަހުގެ 30 ވަނަ ދުވަހުގެ ކުރިން ޖަރުމަންގެ ފުޓްބޯޅަ ފެޑެރޭޝަނަށް ބަޔާނުން ސާބިތުކޮށްދޭން ޖެހޭނެ ކަމަށް ވެސްވެއެވެ.

ޖަރުމަން ކަޕްގައި އެ ޓީމަށް ދެން އޮތީ ގަދަ 16 ގެ ބުރުގައި އަންނަ ޑިސެންބަރު މަހުގެ ތިންވަނަ ދުވަހު އެންމެ ފަހުގެ ޗެމްޕިއަން، ބަޔާ ލެވަކޫސަންއާ ދެކޮޅަށް ކުޅޭ މެޗެވެ. މި ފަހަރުގެ ސީޒަނުގައި ރަނގަޅު ކުޅުމެއް ދައްކަމުން އަންނަ ބަޔާން މިވަގުތު އޮތީ ޖަރުމަން ލީގުގެ އެއްވަނައިގައެވެ. އެ ޓީމަށް މިހާތަނަށް ކުޅުނު 10 މެޗުން 26 ޕޮއިންޓާއެކު އެއްވަނައިގައި ވަނީ ފަސް ޕޮއިންޓްގެ ލީޑެއްނަގައިފައެވެ.