ރެއާލް ސޮސިއެޑާޑާގެ ކުޅުންތެރިޔާ އަދި ސްޕެއިންގެ ޤައުމީ ޓީމުގެ މިޑްފީލްޑަރު، މާޓިން ޒުބިމެންޑީ ގަންނަން ބިޑް ކުރުމަށް އިނގިރޭސި ޗެމްޕިއަން، މެންޗެސްޓާރ ސިޓީއިން ނިންމައިފިއެވެ.

އެ ކްލަބުގެ މިޑްފީލްޑަރު އަދި 2024 ވަނަ އަހަރުގެ ބެލޮންޑިއޯ ހާސިލްކުރި ރޮޑްރީއަށް އަނިޔާވުމުގެ ސަބަބުން އެކަން ފޫބެއްދުމަށްޓަކައި އެމަގާމަށް ސިޓީއިން މަޓެއޯ ކޮވަސިޗް އާއި އިލްކާއި ގުންޑޮގާން އައްޔަނުކުރިއެވެ. ނަމަވެސް އެކުޅުންތެރިން ރޮޑްރީގެ މަޤާމު އަދާކުރަން ފެއިލްވެ ސިޓީވަނީ ޖެހި ޖެހިގެން ހަތަރު މެޗުން ބަލިވެފައެވެ. މިއީ ސިޓީއަށް ތާރީޙީ ބައްޔެކެވެ.

މި ބައްޔާއެކު އިތުރު ވިސްނުމަކަށް ނުގޮސް ސިޓީއިން ނިންމީ ޖެނުއަރީ ޓްރާންސްފާގައި މިޑްފީލްޑަރެއް ގަންނާށެވެ. އެގޮތުން އެކަމަށް އެންމެ ޤާބިލު ކެންޑިޑޭޓު ކަމަށް ސިޓީގެ މެނޭޖްމެންޓުން ޤަބޫލު ކުރީ ޒުބިމެންޑީއެވެ. އެއީ ރޮޑްރީގެ ލަފައާއެކު ކޯޗް ގާޑިއޯލާއާ މަޝްވަރާ ކުރުމަށް ފަހު އެވެ. އެ ގޮތުން، ޒުބިމެންޑީ، 25، ސޮސިއެޑާޑާ އެކު ހަދާފައިވާ ކޮންޓްރެކްޓް، 2027 ވަނަ އަހަރުގެ ޖޫން މަހުގެ ނިޔަލަށް އޮތްއިރު، އެ ކޮންޓްރެކްޓް ގަންނަން ދައްކަން ޖެހޭ 55 މިލިއަން ޑޮލަރު ދޭން ސިޓީއިން އޮތީ ތައްޔާރަށެވެ.

މީގެ ކުރިން، ލިވަޕޫލާއި އާސެނަލާއި ބަޔާން މިއުނިކް އަދި އިންޓަ މިލާނުން ވެސް ޒުބިމެންޑީ ހޯދަން ވަރަށް މަސައްކަތް ކުރިއެވެ. ނަމަވެސް އޭގެއިން އެއްވެސް ކްލަބަކަށް އެ ނަސީބެއް ލިބިފައެއް ނެތެވެ. ސިޓީގެ ކޯޗު ގާޑިއޯލާއާ އެކު މަސައްކަތްކުރަން އެ ކްލަބްގެ އޮފާ އަށް ޒުބިމެންޑީ ރުހޭނެ ކަމަށް ރިޕޯޓްތައް ބުނެއެވެ.