ކެރިއަރުގައި 1000 ގޯލް ޖެހޭ ވަރަށް ސިއްޙީ ހާލަތު ތަން ނުދީފާނެ ކަމަށް ދުނިޔޭގެ މަޝްހޫރު ފުޓްބޯޅަ ކުޅުންތެރިޔާ ކްރިސްޓިއާނޯ ރޮނާލްޑޯ ބުނެފިއެވެ.

އޭނާގެ ފުޓްބޯޅަ ކެރިއަރުގައި 1000 ގޯލް ޖެހުމަކީ އޭނާގެ އަމާޒު ކަމަށް ޕޯޗުގީޒްގެ ތަރި ރޮނާލްޑޯ ކުރިން ވަނީ ބުނެފައެވެ. 39 އަހަރުގެ ރޮނާލްޑޯ މިހާތަނަށް އޭނާގެ ކެރިއަރުގައި 908 ގޯލް ވަނީ ޖަހައިފައެވެ.  ފަހުން ރޮނާލްޑޯ ކުޅުނު ސީޒަންތަކުގައި ލަނޑު ޖަހާފައިވާ ރޭޓަށް ބަލާއިރު، އަދި ތިން ވަރަކަށް ސީޒަން ކުޅެގެން ނޫނީ އޭނާއަށް 1000 ގޯލު ހަމަކުރުމަކީ ފަސޭހަކަމެއް ނޫނެވެ.

"އަހަންނަށް މި ވަގުތު ޕްރޮފެޝަނަލީ ވިސްނެން އޮތީ އެކަން އެ ހިނގާ ވަގުތަކަށް އެކަނި، ލޯންގްޓާމް ޕްލޭންތަކެއް ހަދައިގެން ކުރިއަށްދެވޭނެ ހާލަތެއް ނޫން މި އޮތީ." ދާދި ފަހުން ޕޯޗުގަލްގެ ޝަރަފްވެރި އެވޯޑް ހަފްލާއެއްގައި ވާހަކަ ދައްކަމުން ރޮނާލްޑޯ ބުންޏެވެ.

"ޕަބްލިކްގައި ވާހަކަ ދައްކަމުން އަހަރެން ބުނެފައިވާނެ 1000 ގޯލު ހަމަކުރަން ބޭނުންވާ ވާހަކަ. ބައެއް ފަހަރު ހީވޭ ފަސޭހަ ކަމެކޭ ވެސް، އެއީ މިދިޔަ މަހު ކަހަލަ ގޮތަކަށް އަހަރެން 900 ގޯލު ހަމަވީ، އެކަމަކު، ކުރިން ވެސް ބުނިހެން އަހަރެން މި ވިސްނަނީ މި ވަގުތަށް، ހިނގާ ބަލަމާ ކުރިއަށް އޮތް ދެތިން އަހަރު އަހަރެންގެ ފައި ހުންނާނެ ހާލަތެއް. އަހަންނަށް 1000 ގޯލު ޖެހިއްޖިއްޔާ ވަރަށް ރަނގަޅު، އެކަމަކު، އެކަން ނުވިޔަސް އަހަންނަކީ ފުޓްބޯޅަ ތާރީހުގައި އެންމެ ގިނަ ގޯލު ޖެހި ކުޅުންތެރިޔާ،"

މިހާރު ސައުދީއަރަބިއްޔާގެ އަލް ނަސްރަށް ކުޅެމުން އަންނަ ރޮނާލްޑޯ ބުނީ، ފުޓްބޯޅަ ކެރިއަރު ނިންމާލާނެ ދުވަހެއް ބުނަން އޭނާ އަށް ވެސް ނޭނގޭ ކަމަށާއި އަދިވެސް ކުޅެން ބޭނުންވާ ކަމަށެވެ.

ރޮނާލްޑޯއަކީ އޭނާގެ ދުވަސްވީ އުމުރާއެކު ވެސް ތަފާތު ދައްކަމުން އަންނަ ކުޅުންތެރިޔެއްކަމަށް ފާހަގަކޮށްލެވެއެވެ.