މެންޗެސްޓާރ ސިޓީގެ ކޯޗު ޕެޕް ގާޑީއޯލާ ނެތަސް އެޓީމު އެއްވެސް ހުއްޓުމެއް ނެތި ދާނީ ކުރިއަށްކަމަށް އެޓީމުގެ މިޑްފީލްޑަރު އަދި 2024 ވަނަ އަހަރުގެ ބެލޮންޑިއޯ ހާސިލުކުރި ރޮޑްރީ ހެނާންޑޭޒް ބުނެފިއެވެ.

ސިޓީއާ އެކު ގާޑިއޯލާ މިހާރު ހަދާފައިވާ އެއްބަސްވުން މި ސީޒަނަށް ފަހު ހަމަވާނެއެވެ. ނަމަވެސް އެއްބަސްވުން އާ ކުރުމާ ބެހޭގޮތުން ގާޑިއޯލާ އަދި އެކްލަބުގެ ފަރާތުން ވެސް އެއްވެސް ޖަވާބެއް ދީފައެއް ނުވެއެވެ. ރޮޑްރީ ބުނީ އޭނާ ސިޓީއަށް ބަދަލުވި ސީޒަންގައި ވެސް ގާޑިއޯލާ އެ ކްލަބް ދޫކޮށްލާނެ ވާހަކަ ދެއްކި ކަމަށެވެ. ނަމަވެސް އޭރު ވެސް އޭނާ ޓީމުގައި މަޑުކުރާނެ ކަމުގެ އުއްމީދެއް ސިޓީގައި އޮތް ކަމަށް ސްޕެއިންގެ މިޑްފީލްޑަރު ބުންޏެވެ.

ރޮޑްރީއާއި ގާޑިއޯލާ އެކުގައި

 "ކޮންމެ މީހަކު ވެސް ބޭނުންވާނީ އެންމެ މޮޅެތި މީހުންގެ ވަށައިގެން އުޅެން. ކުރިން ވެސް އަދި ފަހުން ވެސް ގާޑިއޯލާ އަކީ މޮޅު ކޯޗެއް. އަހަރެން މި ޓީމަށް ސޮއިކުރި އިރު (ކްލަބްގެ ބައެއް މީހުން) އަހަރެން ކައިރީގައި ބުނި ގާޑިއޯލާ ޓީމު ދޫކޮށްލަނީއޭ. އެކަމަކު އޭނާ އަކީ ވަރަށް އުއްމީދު އޮތް ކޯޗެކޭ،" ސްޕެއިންގެ ކޯޕް ރޭޑިއޯ އަށް އެތުލެޓިކޯ މެޑްރިޑުން 2019 ގައި ސިޓީއަށް ބަދަލުވި ރޮޑްރީ، ދިން އިންޓަވިއުގައި ބުންޏެވެ.

"ގާޑިއޯލާ ހިނގައްޖެނަމަ ކަންކަން ބަދަލުވެދާނެ. އެކަމަކު ސިޓީގެ ގޮތުގައި ސިޓީން ކުރިއަށްދާނެ."

އެއްބަސްވުން އާ ކުރުމާ ބެހޭގޮތުން އަދި މިހާތަނަށް ގާޑިއޯލާގެ ފަރާތުން އެއްވެސް ބަހެއް ލިބިފައި ނުވާއިރު އޭނާ އެކްލަބުގައި މަޑުކުރާނެކަމުގެ ޔަގީންކަން ސިޓީގެ ވެރިންނަށް އެބަ އޮތްކަން އިނގެރޭސި މީޑިޔާތަކުން ރިޕޯޓުކުރެއެވެ.