މެންޗެސްޓަރ ޔުނައިޓެޑްގެ ވަގުތީ ކޯޗްގެ މަޤާމް ފުރަމުން އައި ވެން ނިސްޓްލްރޯއީ އެމަޤާމުން ވަކިވެ ޓީމާ ދުރަށް ޖެހިލައިފިއެވެ.

ހެޑްކޯޗް އެރިކް ޓެން ހާގް މަޤާމުން ވަކިކުރުމާ ގުޅިގެން ވަގުތީ ގޮތުން ހެޑް ކޯޗެއްގެ ޒިންމާ ނަގަމުން އައީ މެންޗެސްޓާރ ޔުނައިޓެޑްގެ އެސިސްޓެންޓް ކޯޗު އަދި އެޓީމުގެ ކުރީގެ ކުޅުންތެރިޔާ ނެދަލލެންޑްސްގެ ވެން ނިސްޓްލްރޯއީއެވެ. އޭނާ މަޤާމާ ހަވާލުވި ފަހުން މެންޗެސްޓަރ ޔުނައިޓެޑް ވަނީ 4 މެޗުކުޅެ، ހުރިހާ މެޗަކުން މޮޅުވެފައެވެ. އޭގެ ތެރޭގައި ޔޫރަޕާ ލީގު މެޗެއްވެސް ހިމެނެއެވެ. އޭނާ މަދު ދުވަސް ކޮޅެއް ތެރޭގައި ޓީމަށް ހޯދައިދިން ކާމިޔާބީ ސަޕޯޓަރުންވަނީ ފާހަގަކޮށްފައެވެ. އަދި އިނގިރޭސި ޕްރިމިއަރ ލީގުގައި އެޓީމް އެންމެ ފަހުން އަމިއްލަ ދަނޑުގައި ކުޅުނު މެޗް ކާމިޔާބު ކުރުމުން އޭނާއަށް ކްލަބްގެ ސަޕޯޓް އޮތް މިންވަރު ސަޕޯޓަރުންވަނީ ދައްކާލާފައެވެ.

ކޯޗު ނިސްޓްލްރޯއީ

ބެލެވޭ ގޮތުގައި ނިސްޓްލްރޯއީ މަޤާމުން ވަކިވެފައިވަނީ އެޓީމާ އަލަށް ހަވާލުވުމަށް ހަމަޖެހިފައިވާ ކޯޗު ރުބެން އަމޯރިމް އެޓީމުގެ އެސިސްޓެންޓް ކޯޗެއްގެ ގޮތުގައި އެހެން މީހަކު ހަމަޖައްސަން ބޭނުންވާތީއެވެ. ދެ އަހަރު ދުވަހުގެ އެއްބަސްވުމެއްގައި ސޮއިކޮށް، 48 އަހަރުގެ ނިސްޓްލްރޯއީ މެންޗެސްޓަރ ޔުނައިޓެޑްގެ އެސިސްޓެންޓް ކޯޗެއްގެ ޒިންމާއުފުލަން ފެށީ މިއަހަރުގެ ޖުލައި މަހުގައެވެ. ޔުނައިޓެޑްގައި ހޭދަ ކުރި ކުރު މުއްދަތުގައި ސަޕޯޓަރުންނާއި މެނޭޖްމަންޓްގެ ހިތް އަތުލާފައެވެ.

ކޯޗު ނިސްޓްލްރޯއީ

މެންޗެސްޓާއިން ނެރުނު ރިޕޯޓެއްގައި ވަނީ، އެޓީމުން އަބަދުވެސް ރުޑް ނިސްޓްލްރޯއީ ބަލައިގަންނަނީ ލެޖެންޑެއްގެ ގޮތުގައި ކަމަށެވެ. އަދި މެންޗެސްޓަރ ޔުނައިޓެޑާއެކު އޭނާ ހޭދަކުރި އަގުހުރި ވަގުތުތަކާއި ކޮށްދިން ޚިދުމަތްތައް އެކްލަބުން އަބަދުވެސް އަގު ވަޒަން ކުރާނެ ކަމަށް ވެސް ބުނެފައިވެއެވެ. މީގެ އިތުރުން އަބަދުވެސް ނިސްޓްލްރޯއީއަށް މަރުޙަބާ ކިޔަން ތައްޔާރަށް ތިބި ކަމަށް ވެސް މި ރިޕޯޓުގައިވެއެވެ. އަދި ކޯޗުންގެ އެހީތެރިންގެ ގޮތުގައި މަސައްކަތް ކުރަމުންއައި އިތުރު 3 ފަރާތެއްވެސްވަނީ ޓީމް ދޫކޮށް ގޮސްފައި ކަމަށް މިޓީމުގެ ރިޕޯޓުގައި ފާހަގަކޮށްފައިވެއެވެ.