ENGLISH

03 އޭޕްރީލު 2025

Advertisement

އަލަތު ދަރިފުޅު ލިބުނުކަން މާނޭ އިއުލާނުކުރީ ކަހަފް ސޫރަތުގެ 46 ވަނަ އާޔަތް ކިޔަވާލައިގެން

16 މާރިޗު 2025

|

ފަޒީލް ޢަބްދުލް ލަތީފު

މަނޭ އަދި އަންހެނުން އައިޝާ ތަމްބާގެ ކައިވެެނީގެ ރަސްމިއްޔާތުގެ ފޮޓޯއެއް: އަލަތު ދަރިފުޅު މި ލިބުނީ ކައިވެނިކުރިތާ 14 މަސް ފަހުން

ކުރިން އިނގިރޭސި ކްލަބް ލިވަރޕޫލަށް ކުޅެ އިގިރޭސި ލީގު ޗެމްޕިއަންކަން އަދި ޔޫރަޕުގެ ޗެމްޕިއަންކަންވެސް ހޯދައިފައިވާ މަޝްހޫރު ފުޅުބޯޅަ ކުޅުންތެރިޔާ ސޭޑިއޯ މާނޭ، އޭނާއަށް އަލަތު ދަރިފުޅު ލިބުމުގެ އުފާވެރި ޚަބަރު އިއުލާނުކުރީ ކަހަފް ސޫރަތުގެ 46 ވަނަ އާޔަތް ކިޔަވަމުން، އޭނާ މިހާރު ކުޅޭ ސައުދީއަރަބިއްޔާގެ އަލްނަސްރު ކުލަބުގެ އިންސްޓަގްރާމް އެކައުންޓުން ދޫކޮއްލި ވީޑިޔޯއަކުންނެވެ.

ކަހަފް ސޫރަތުގެ 46 ވަނަ އާޔަތާއި، އެ އާޔަތުގެ ދިވެހި ތަރުޖަމާ

ސައުދީ ލީގުގައި މިދިޔަ ހުކުރު ދުވަހު އަލްނަސްރު، އަލްޚުލޫދާ ދެކޮޅަށް ކުޅުނު މެޗު ފެށުމުގެ ކުރިން ކުލަބުގެ ޓްރެއިނިން ފެސިލިޓީގައި މާނޭ ކަހަފް ސޫރަތުގެ 46 ވަނަ އާޔަަތް ކިޔަވާ ވީޑިއޯ ކްލިޕް ޕޯސްޓްކުރަމުން، އަލްނަސްރުގެ އެކައުންޓުންވަނީ މަނޭގެ އާއިލާއަށް މަރުހަބާ ކިޔައި، ތުއްތު ދަރިފުޅަށް ބަރަކާތް ލެއްވުން އެދި ދުޢާ ކޮށްފައެވެ.

މާނޭއަށް މަރުހަބާ ކިޔުމަށް އަލްނަސްރުގެ އިންސްޓަގްރާމްގައި ހިއްސާކުރި ޕޯސްޓް، މި ވީޑިއޯގައި މާނޭ ކިޔަވަނީ ކަހަފް ސޫރަތުގެ 46 ވަނަ އާޔަތް

ހުކުރު ދުވަހު ކުޅުނު މެޗުން އަލްނަސްރު މޮޅުވިއިރު މާނޭ ވަނީ ގޯލެއް ޖަހާފައެވެ. އަދި މިގޯލު އޭނާ ހާއްސަކުރީ އަލަތު ދަރިފުޅަށެވެ. ކުޑަ އަންހެން ދަރިފުޅަށް ގޯލު ހަދިޔާކުރުމުގެ ގޮތުން، މާނޭ ގޯލު ޖެހުމަށްފަހު އުފަލުން ފުރިގެންހުރެ ތުއްތު ދަރިފުޅު އުރާލާގޮތް ދެ އަތުން ޒަމްޒުކޮށްދިނެވެ.

މެޗުގައި ގޯލު ޖެހުމަށްފަހު، މާނޭ އަލަތު ދަރިފުޅަށް ގޯލު ހާއްސަކުރަނީ 

މާނޭ އަދި އަދި އޭނާގެ އަންހެނުން އައިޝާ ތަމްބާ ކައިވެނިކުރީ 2024 ވަނަ އަހަރު، އެފްރިކަން ކަޕް އޮފް ނޭޝަންސް ފެށުމުގެ 6 ދުވަސް ކުރިންނެވެ. އެމީހުން ކައިވެނިކުރީ މާނޭގެ އުފަން ގައުމު ސެނެގާލްގެ ވެރިރަށް ޑަކާގައެވެ.

މާނޭ އަބަދުވެސް ފާހަގަކުރެވިފައިވަނީ ދީނީ ކަންކަމަށް އިސްކަންދޭ އަހުލާގު ރަނގަޅު ހިތްތިރި ފުޓުބޯޅަ ކުޅުންތެރިޔެއްގެ ގޮތުގައެވެ. މީގެ އިތުރުން މާނޭ ދަނީ އަބަދުވެސް އޭނާގެ އަވަށުގެ ތަރައްގީއަށްޓަކައި ދީލަތި އެހީތަކެއް ވެދެމުންނެވެ. މިގޮތުން އޭނާ ވަނީ އެއަވަށުގައި ސްކޫލެއް އިމާރާތް ކުރުމަށް 320،000 ޑޮލަރު، އަދި ހޮސްޕިޓަލެއް އެޅުމަށް 700،000 ޑޮލަރު ހަދިޔާ ކޮށްފައެވެ. އަދި މާނޭ ވަނީ އެއަވަށުގައި ޕެޓްރޯލް ޝެޑަކާއި  ޕޯސްޓް އޮފީހެއް ގާއިމުކުރުމަށާއި ސްކޫލް ކުދިންނަށް ލެޕްޓޮޕް ހަދިޔާކޮށް އަދި އަވަށު އެންމެނަށް 4ގީ އިންޓަނެޓް ގެ ހިދުމަތް ދިނުމަށް އެއްމިލިޔަން ޑޮލަރު ހޭދަކޮށްފައެވެ.

މީގެ އިތުރުން މާނޭ އޭނާގެ އަވަށުގެ ކޮންމެ އާއިލާއަކަށްވެސް، ކޮންމެ މަހަކު، އެގައުމުގެ މިނިމަމް ވޭޖަށްވުރެ މަދުނޫން އަދަދެއްގެ އެލަވަންސެއްދެއެވެ.

މާނޭ ވަނީ މިސީޒަންގައި މިހާތަނަށް 9 ގޯލުޖަހާ 11 ގޯލު ޖަހަން މަގުފަހިކޮށްދީފައެވެ.

ކިޔުންތެރިންގެ ހިޔާލު