އެއްބަނޑު އެއްބަފާ ދެމީހަކު އެއް އުފަންދުވަހެއް ހިއްސާ ކުރުމަކީ އެފަދަ ކޮންމެ އާއިލާއަކަށް ވެސް ޚާއްސަ ކަމަކަށްވާނެކަން ޔަގީނެވެ. އަދި ދަރީންގެ އުފަންދުވަހާ މައިންބަފައިންގެ އުފަން ދުވަހަކީ އެއް ދުވަހަކަށްވުން މިއީ އަދި އިތުރަށް ޚާއްސަ ވެގެންވާނެ ކަމެކެވެ. މިގޮތުން ދުނިޔޭގައި އެއް އުފަންދުވަހެއް ހިއްސާ ކުރާ އެންމެ ގިނަ މެމަބަރުންތިބި އާއިލާއަކީ ކޮބައިކަން އެނގޭހެއްޔެވެ؟

ޕާކިސްތާނުގެ ލަރކާނާގައި ދިރިއުޅޭ ޢާއިލާއަކުން ދުނިޔޭގެ ވަރަށް ޚާއްޞަ ރެކޯޑެއް ދަމަހައްޓައެވެ. މި ޢާއިލާގެ 9 މެންބަރުންގެ މެދުގައި ވަރަށް ތަފާތު އެއްގޮތް އެއް ކަމެއް ހިމެނެއެވެ. އެއީ އެންމެންވެސް އުފަންވެފައިވަނީ އޯގަސްޓް 1 ވަނަ ދުވަހުގައި ކަމުގައިވުމެވެ.

ގިނިސް ވޯލްޑް ރެކޯޑްސް އިން ބުނާ ގޮތުގައި، މި 9 މެންބަރުންގެ ޢާއިލާގައި ހިމެނެނީ ބައްޕަ އަމީރު ޢަލީ އާއި، މަންމަ ޚަދީޖާ އާއި އަދި 19 އަހަރާއި 30 އަހަރާ ދެމެދުގެ 7 ދަރިންނެވެ. ނުވަ މެމްބަރުންގެ މި އާއިލާގައި ހިމެނެނީ ދެމަފިރިނެގެ އިތުރުން، 3 އަންހެން ކުދިންނާއި 4 ފިރިހެން ކުދިންނެވެ. ތިން އަންހެން ކުދިންގެ ތެރޭގައި އެެއްމާބަނޑު ދެކުދިން ހިމެނޭއިރު، 4 ފިރިހެން ކުދިންގެ ތެރެއިންވެސް 2 ކުދިންނަކީ އެއްމާބަނޑު 2 ކުދިންނެވެ. އެންމެ ޚާއްޞަ ކަމަކީ މި އެންމެންގެ ވެސް އުފަން ދުވަހަކީ އޯގަސްޓް 1 ވަނަ ދުވަސް ކަމުގައިވުމެވެ. މިއީ ޢާއިލާގެ އެންމެ ގިނަ މެންބަރުން އެއް ދުވަހެއްގައި އުފަންވެފައިވާ ކަމުގެ ދުނިޔޭގެ ރެކޯޑު އޮތް އާއިލާއެވެ.

މިއީ ޢާއިލާގެ އެންމެ ގިނަ މެންބަރުން އެއް ދުވަހެއްގައި އުފަންވެފައިވާ ކަމުގެ ދުނިޔޭގެ ރެކޯޑު އޮތް އާއިލާ

މި ތާރީޚަކީ އަމީރު އާއި ޚަދީޖާއަށް އިތުރަށް ޚާއްޞަވާ ސަބަބަކީ، އެ ދެމީހުންގެ ކައިވެނީގެ އަހަރީ ދުވަހަކީ ވެސް ހަމަ އޮގަސްޓް 1 ވަނަ ދުވަސްކަމަށްވާތީއެވެ. އެ ދެމީހުން ކައިވެނިކުރީ އެމީހުންގެ އުފަން ދުވަސް ކަމުގައިވާ 1991 ވަނަ އަހަރުގެ އޮގަސްޓުމަހުގެ 1 ވަނަ ދުވަހުއެވެ. އެއީ އެމީހުންގެ އެންމެ ދޮށީ ދަރިފުޅު އުފަންވުމުގެ އެއް އަހަރު ކުރިއެވެ.

ރެކޯޑްތައް ޝާއިޢުކުރާ ގިނީސްއިން އިތުރަށް ފާހަގަކޮށްފައިވަނީ މި ޢާއިލާގެ 7 ދަރިން އެއް ދުވަހެއްގައި އުފަންވެފައިވުމުން، މިއީ އެންމެ ގިނަ އެއްބަނޑު އެއްބަފާ ކުދިން އެއްދުވަހެއްގައި އުފަންވުމުގެ ވެސް ރެކޯޑުގެ ގޮތުގައިވެސްވަނީ ރެކޯޑު ކުރެވިފައިވެއެވެ. މީގެ ކުރިން މި ރެކޯޑު ހިފަހައްޓާފައިވަނީ އެމެރިކާގެ ކަމިންސް ޢާއިލާގެ 5 ކުދިންނެވެ. އެ ކުދިން އުފަންވެފައިވަނީ 1952 އާއި 1966 އާ ދެމެދު ފެބްރުއަރީ 20 ވަނަ ދުވަހުގައެވެ.

އަމީރު ބުނި ގޮތުގައި އޭނާގެ ފުރަތަމަ ދަރިފުޅު ސިންދޫ އުފަންވީ 1992 ވަނަ އަހަރުގެ އޯގަސްޓް 1 ވަނަ ދުވަހަށް ވުމުން، އެއީ އޭނާއާއި އޭނާގެ އަނބިމީހާގެ ވެސް އުފަން ދުވަހާ އެއް ދުވަހަކަށް ވުމުން ހައިރާންވެ އުފާވި ކަމަށެވެ. އޭނާ ބުނި ގޮތުގައި އެ ތާރީޚުގައި ދަރިއަކު އުފަންވާ ކޮންމެ ފަހަރަކު އޭނާއާއި ޚަދީޖާ އިންތިހާއަށް ހައިރާންވެއެވެ. އަދި އެމީހުން އެކަން ބަލައިގަންނަނީ ގުދުރަތުގެ ހަދިޔާއެއްގެ ގޮތުގައިކަމަށް އަމީރު ބުންޏެވެ.

ޚަދީޖާގެ ކޮންމެ ދަރިއެއްވެސް އުފަންވެފައިވަނީ ނޯމަލް ޑެލިވަރީއެއްގައި ވިހައިގެންނެވެ. އަދި ވިހެއުން އަވަސްކުރުމަށް އެއްވެސް ފަރުވާއެއް ދީފައެއް ނުވެއެވެ. އަދި އެއްވެސް ދަރިއެއް ސިޒޭރިއަން އޮޕަރޭޝަނަކުން ނުވަތަ ދުވަސް ނުފުރާ ވިހައިފައެއް ވެސް ނުވެއެވެ. މިސަބަބުތަކަށްޓަކައި އެ އާއިލާގެ ހުރިހާ މެމްބަރުންގެ އުފަންދުވަސް އެއްދުވަހަކަށްވުން އެއީ އިތުރަށް އާދަޔާ ޚިލާފު ކަމަކަށް ވެގެންދެއެވެ.