ދިރިއުޅުމަށްޓަކާ މަސްވެރިކަން ކުރާ މީހަކު މަހަށް ނިކުތްއިރު، އެދަތުރު އަހަރަކަށްވުރެ ދިގުވެދާނެ ކަމަށް އެނާ ހިތަށްއަރާނީ ކިހިނަކުންތޯ؟ މަސްވެރިކަމަށް ނުކުމެގެން އުޅުނު މެކްސިކޯގެ ރައްޔިތެއްވަނީ އެތަކެއް ދުވަހު ކަނޑުމަތީގައި ހޭދަ ކުރުމަށްފަހު އަޖައިބު ކުރުވަނިވި ގޮތަކަށް ސަލާމަތްވެފައެވެ.

ޖޯސޭ ސަލްވަޑޯ އަލްވަރެންގާ އަކީ މެކްސިކޯގެ މަސްވެރިންނެވެ. އަލްވަރެންގާ 2012 ވަނަ އަހަރު އޭނާގެ ރައްޓެއްސަކާއެކު ދެ ދުވަހުގެ ދަތުރަކަށް ދިއުމަށް ރާވާފައިވީ ނަމަވެސް، ދަތުރުފެށިތާ ގަޑިއިރުތަކެއްގެ ތެރޭގައި ހުރިހާ ކަމެއް ގޯސްވެގެން ދިޔައެވެ. އަލްވަރެންގާ އަށް 438 ދުވަހު ކަނޑުމަތީގައި ހޭދަކުރަން ޖެހުނެވެ. ކަނޑުމަތީގައި 3 މަސް ހޭދަކުރުމަށްފަހު އެކުވެރިޔާ މަރުވުމުން، އޭނާ އެކަނި ވެގެން ދިޔައެވެ.

މި ހާދިސާ ހިނގި ދުވަހު، އަލްވަރެންގާ ދިޔައީ މިޔަރުގެ މަސްވެރިކަން ކުރަމުން، އެހެނަސް އެ ނުރައްކާތެރި ދުވަހުގެ މޫސުން ވެގެންދިޔައީ އޭނާގެ ހަޔާތް ބަދަކު ކޮއްލި ކަމަކަށެވެ. 33 އަހަރުގެ އަލްވަރެންގާއާއެކު އޭރު 22 އަހަރުގެ އެޒެކުއިއެލް ކޯޑޯބާ ބައިވެރިވިއެވެ. އަދި އެ ދެމީހުން އާންމު ގޮތެއްގައި ދަތުރުކުރާ ފަދައިން ޕެސިފިކް ކަނޑަށް ނުކުތެވެ. ދަތުރު ފެށުނުއިރު މޫސުން ރީއްޗަށް އޮތުމުގެ ސަބަބުން، ވިއްސާރަ ފެށުމުންވެސް އެމީހުން ނިންމީ މަސްބޭނުން ކުރިއަށް ގެންދިގެންދިއުމަށެވެ. އެހެނަސް މިއީ އެމީހުންނަށް އެޅުނު ޅައެއްޗަކަށް ވެގެން ދިޔައެވެ.

އެމީހުން އަވަހަށް ވިއްސާރައިގެ ތެރެއަށް ވަދެގެންދިޔައިރު، އެ ވިއްސާރަ ހަފްތާއެއްގެ މުއްދަތަށް ދެމިގެން ދިޔައެވެ. ވިއްސާރަ ނިމުނު އިރު އެމީހުންނަށް އެނގުނީ އެމީހުން ވަނީ ކަނޑުގެ ގޮތްނޭނގޭ ހިސާބެއްގައި ކަމެވެ. ރާޅު އެރުމުގެ ސަބަބުން އެމީހުންގެ އުޅަނދުގެ އިންޖީނު ވަނީ ހަލާކުވެފައެވެ. އަދި އުޅަނދުގައި ހުރި ގިނަ ސާމާނުތައްވެސް ވަނީ ވިއްސާރައިގެ ސަބަބުން ގެއްލިފައެވެ. ވެލާ، ދޫނީގެ ލޭ އަދި މަސް ކައިގެން 10 ހަފްތާ ދިރިހުރުމަށްފަހު، ކޯޑޯބާ ބަލިވެ އުޅަނދުގައި މަރުވިއެވެ. އެހިސާބުން އަލްވަރެންގާ އެކަނިވެގެން ދިޔައެވެ. އޭގެ ފަހުން އޭނާ އެކަނި އަހަރެއްހާ ދުވަހު ކަނޑުމަތީގައި ހޭދަކުރިއެވެ. އަދި އެތައް ފަހަރަކު، ކަނޑުމަތީގައި ދުއްވާ ކޮންޓެއިނަރު އުފުލާ ބޮޑެތި ބޯޓުތަކުގެ ސަމާލުކަން ހޯދަން މަސައްކަތްކުރި ނަމަވެސް، އެއުޅަނދުތަކުން އޭނާގެ އެދުމަށް އިޖާބައެއް ނުދިނެވެ.

ކަނޑުމަތީގައި 15 މަސްދުވަސް ހޭދަކުރުމަށްފަހު، އޭނާއަށް ކުޑަ ޖަޒީރާއެއް ފެނުނެވެ. އެއީ މާޝަލް އައިލެންޑްސްގެ އެކަހެރި ކަންމަތީގައި އޮތް ޖަޒީރާއެއްކަން ފަހުން އެނގުނެވެ. އެއީ މެކްސިކޯއިން ގާތްގަނޑަކަށް 6,000 މޭލު ދުރުގައި އޮތް ތަނެކެވެ. އަލްވަރެންގާއަށް މި ޖަޒީރާ ފެނުމުން، އޭނާ އުޅަނދު ދޫކޮށްލައި، ފަތައިގެން އައިސް އެއްގަމަށް އެރިއެވެ. އަދި އޭނާއަށް ފެނުނީ ގޮނޑުދޮށުގައި ހުރި އެރަށުގެ ޒުވާން ދެމަފިރިއެއްގެ ގެއެވެ. އެގޭގައި ދިރިއުޅޭ ދެމަފިރިން އެނާއަށް އެހީތެރިކަން ފޯރުކޮށްދިނެވެ.

އޭނާ ސަލާމަތްކުރެވުނީ 30 ޖަނަވަރީ 2014 ގައެވެ. ސަލާމަތް ކުރެވުނު އިރު އަލްވަރެންގާގެ ތުނބުޅި އަދި އިސްތަށިގަނޑު ދިގުވުމުގެ ސަބަބުން ސިފަވެސް ވަކިނުވެއެވެ. އަލްވަރެންގާ ފެނުނު އިރު، އޭނާގެ ޙާލަތު ރަނގަޅު ކަމަށް ބެލެވުނަސް، އޭނާގެ ތަނބިކަށި ދުޅަވުމުގެ ސަބަބުން، ހިނގުމަށް ދަތިވާ ކަމަށް ފާހަގަވިއެވެ. އެ ނުރައްކާތެރި ދަތުރަށްފަހު، އޭނާ 11 ދުވަހު ހޮސްޕިޓަލުގައި ބޭއްވުމަށްފަހު، ގެއަށް ދޫކޮށްލެވުނެވެ.

މިހާދިސާއަށްފަހު އަލްވަރެންގާގެ ދިރިއުޅުމަށް ވަރަށްބައިވަރު ބަދަލުތަކެއް ވަނީ އައިސްފައެވެ. ނިދަން އުނދަގޫވުމާއި، ކަނޑުފެނުނަސް ބިރުގަތުން ފަދަ ނަފްސާނީ ކަންތައްތަކާވެސް އޭނާ ކުރިމަތިލާން ޖެހެއެވެ. އަލްވަރަގެންޒާ ބުނި ގޮތުގައި މި ދަތުރުގައި އޭނާގެ އުއްމީދުތައް ފެނަށްދިޔަ އެތައް ހާލަތެެއް ކުރިމަތިވި، އެހެންނަމަވެސް އޭނާ ހުރީ އެންމެ ފަހު ވަގުތާ ޖެހެންދެންވެސް ސަލާމަތްވުމަށް ކުރެވެން ހުރި ހުރިހާ ކަމެއް ކުރުމުގެ ވަރުގަދަ އަޒުމުގައެވެ.