ކުދި އަދި މެދުފަންތީގެ ވިޔަފާރިތައް އިތުރަށް ތަރައްގީކުރުމުގެ ގޮތުން އެސްއެމްއީ ޑިވެލޮޕްމެންޓު ފައިނޭންސް ކޯޕަރޭޝަނުން ދޫކުރާ "ވިޔަފާރި އެހީ" ލޯނަށް މި މަހުގެ 16 ވަނަ ދުވަހުން ފެށިގެން ކުރިމަތިލެވޭނެކަމަށް އެ ކުންފުނިން ބުނެފިއެވެ. 

އެސްޑީއެފްސީން ބުނި ގޮތުގައި ވިޔަފާރި އެހީ ލޯނަކީ ކުންފުނިތައް ހިންގުމަށް ބޭނުންވާ ތަކެތި ގަތުމަށާއި، ކުރު މުއްދަތުގެ ވޯކިން ކެޕިޓަލް ހަމަޖެއްސުމަށް ބޭނުންވާ އެހީތެރިކަން ފޯރުކޮށްދިނުމުގެ މަގުސަދުގައި ތައާރަފުކޮށްފައިވާ ލޯނެކެވެ. 

އަދި މި ލޯނަކީ މިހާރު އެ ވިޔަފާރިއެއް ހިންގަމުންދާ ފުޅާމިނުގެ ތެރޭގައި ވިޔަފާރިއަށް ބޭނުންވާ އާލާތްތަކާއި މެޝިނަރީ ގަތުމަށްވެސް މި ލޯނު ބޭނުންކުރެވޭނެ ކަމުގައި އެސްޑީއެފްސީން ބުންޏެވެ. 

"ވިޔަފާރި އެހީ" ލޯނު ސްކީމުގެ ދަށުން ދޫކުރާ ލޯނުތަކަކީ 1.5 މިލިއަން ރުފިޔާއާ ހަމައަށް ފައިސާ ލިބޭ ލޯނުތަކެކެވެ. އެ ލޯނުތައް ދައްކަން ފެށުމުގެ ކުރިން ގްރޭސް ޕީރިއަޑުގެ ގޮތުގައި ހަ މަސް ލިބޭނެއެވެ. 

މި ލޯނުތަކަކީ 9.5 އިންސައްތައިގެ އިންޓަރެެސްޓުގައި ދޫކުރާ މި ލޯނުތަކަށް ވިޔަފާރަކުން ސެކިއުރިޓީއެއް ފޯރުކޮށްދޭންޖެހޭނެއެވެ.