ENGLISH

04 އޭޕްރީލު 2025

Advertisement

ބޯކުމް އަތުން ބަޔާން ބަލިވެއްޖެ

08 މާރިޗު 2025

|

މުޙައްމަދު އަދުހަމް

ބަޔާން ކޮޅަށް ލަނޑުޖެހުމަށްފަހު ބޯކުމްގެ ކުޅުންތެރިން އުފާ ފާޅުކުރަނީ. --ފޮޓޯ: އޭޕީ

ޖަރުމަން ލީގުގައި މިރޭ ކުޅުނު މެޗުގައި ބޯކުމް އަތުން 3-2 އިން ބަޔާން މިއުނިކު ބަލިވެއްޖެއެވެ.

މި ނަތީޖާއާއެކު، ބަޔާން އަދިވެސް އުޅެނީ އެއްވަނައިގައެވެ. އެ ޓީމަށް 25 މެޗުން ލިބިފައިވަނީ 61 ޕޮއިންޓެވެ. ދެވަނައިގައި އުޅޭ ބަޔާ ލެވަކޫސަން އަށް 53 ޕޮއިންޓް ލިބިފައިވާއިރު، 44 ޕޮއިންޓާއެކު މައިންޒް އޮތީ ތިންވަނައިގައެވެ.

ބަޔާންގެ އެލިއާންޒް އެރީނާގައި ކުޅުނު މެޗުގެ ފުރަތަމަ 30 މިނެޓުގެ ތެރޭގައި ރަފައެލް ގަރޭރޯގެ ދެ ލަނޑުން ލީޑު ނެގިއިރު، ބޯކުމް ވަނީ ފުރަތަމަ ހާފު ނިމުމުގެ ކުރިން ޖާކޮވް މެޑިޗްގެ ގޯލުން ފަރަގު ކުޑަކޮށްފައެވެ.

މި ހާފު ނިމެންދަނިކޮށް، ބަޔާންގެ ޕޯޗުގީޒް މިޑްފީލްޑަރު، ޖާއޯ ޕަލީނިއާ އަށް ސީދާ ރަތް ކާޑެއް ދެއްކުމުން އެ ޓީމު ބާކީބައި ކުޅުނީ 10 ކުޅުންތެރިންނާއެކު އެވެ.

ދެވަނަ ހާފުގައި ބޯކުމް ވަނީ އިތުރު ދެ ލަނޑު ޖަހައި، ނަތީޖާ އަނބުރާލައިފައެވެ. އެ ޓީމުގެ ލަނޑުތައް ޖަހައިދިނީ އިބްރާހިމް ސިސޯކޯ އާއި މެތުސް ބެރޯ އެވެ.

މި މެޗުން ހޯދި މޮޅާއެކު ބޯކުމް އުޅެނީ 16 ވަނައިގައެވެ. އެ ޓީމަށް ލިބިފައިވަނީ 20 ޕޮއިންޓެވެ.

މި މުބާރާތުގައި މިރޭ ކުޅުނު އެހެން މެޗުތަކުގެ ނަތީޖާއަށް ބަލާއިރު، ލެވަކޫސަންގެ ދަނޑުގައި އެ ޓީމު ވަނީ 2-0 އިން ވާޑާ ބްރޭމަން އަތުން ބަލިވެފައެވެ. ބޮރޫޝިއާ ޑޯޓްމުންޑްގެ ދަނޑުގައި އައުސްބާގް އަތުން އެ ޓީމު ބަލިވީ 1-0 އިންނެވެ.

ކިޔުންތެރިންގެ ހިޔާލު