ޔުވެންޓަސްއިން ޓޮރީނޯ ބަލިކޮށް، އިޓާލިއަން ސެރީއާގައި، ތާވަލުގެ ތިންވަނައަށް ކުރިއަށް ޖެހިލައިފިއެވެ.

މި މެޗު ޔޫވޭއިން ކާމިޔާބު ކޮށްފައިވަނީ 2-0 އިން ޓޮރީނޯގެ ދަނޑުގައި ކުޅުނު މެޗުންނެވެ.

އެ ޓީމުން މެޗުގެ 18 ވަނަ މިނެޓުގައި އުފެއްދި ހަމަލާއެއްގައި ޓިމޮތީ ވެއާ ވަނީ ލީޑު ނަގައިދީފައެވެ. މެޗުގެ ފުރަތަމަ ހާފު ނިމިގެން ދިޔައީ މި ނަތީޖާއިން ޔޫވޭ ކުރީގައި އޮވެގެންނެވެ. ޔޫވޭގެ ޒުވާން ފޯވަޑް ކެނާން ޔިލްޑީޒް ވަނީ އެ ޓީމަށް ފަހު ލަނޑު، މެޗުގެ 84 ވަނަ މިނެޓުގައި ކާމިޔާބުކޮށްދީފައެވެ.

މި ނަތީޖާއާ އެކު ޔޫވޭ މިހާރު ވަނީ ކުޅުނު 12 މެޗުން ލިބިފައިވާ 24 ޕޮއިންޓާ އެކު ތާވަލުގެ ތިންވަނައަށް މި ވަގުތަށް ކުރިއަށް ޖެހިލާފައެވެ. ޓޮރީނޯ އޮތީ 14 ޕޮއިންޓާ އެކު ތާވަލުގެ 11 ވަނައިގައެވެ. މި ހަފުތާގައި އެޓަލާންޓާއާއި ފިއޮރެންޓީނާ އަދި ލާޒިއޯ ކުޅޭ މެޗުތައް އެ ޓީމުތަކުން ކާމިޔާބުކޮށްފި ނަމަ ޔޫވޭ އަނެއްކާ ވެސް ތަންކޮޅެއް ފަހަތަށް ވެއްޓިދާނެ ކަމުގެ ބިރު އެބައޮތެވެ.