އެމްއެލްއެސް ކަޕުން، ލިއޮނެލް މެސީގެ އިންޓަ މަޔާމީ އެޓްލާންޓާ ޔުނައިޓެޑް އަތުން ބަލިވެ، މުބާރާތާ އަލްވަދާޢު ކިޔައިފިއެވެ.

ރާއްޖޭގެ ގަޑިން މިއަދު ހެނދުނު ކުޅުނު މެޗުން މަޔާމީ ބަލިވީ 3-2 ންނެވެ. މަތިއަސް ނިކޮލަސް ރޯހަސްގެ ގޯލުން، މެޗުގެ 17 ވަނަ މިނެޓްގައި މަޔާމީން ވަނީ ލީޑް ނަގާފައެވެ. އެކަމަކު ދެ މިނެޓް ފަހުން އެޓަލާންޓާގެ ސެނެގާލް ފޯވާޑް ޖަމާލް ތިއަރޭ ވަނީ ނަތީޖާ ހަމަހަމަކޮށްފައެވެ. އެ ޓީމަށް ލީޑް ނަގައި ދިނީ ވެސް އޭނާ އެވެ.

މެސީ ވަނީ ދެވަނަ ހާފުގައި އެމްއެލްއެސް ކަޕްގެ ޕްލޭއޮފްގައި އޭނާގެ ފުރަތަމަ ލަނޑު ޖަހައި އެޓަލާންޓާ އަށް ނަތީޖާ ހަމަހަމަކޮށް ދީފަ އެވެ. އަގުބޮޑު ސްކޮޑެއް އޮތް މަޔާމީ އަކީ މެޗުގެ ފޭވަރިޓް ޓީމު ކަމަށް ވިޔަސް ނަތީޖާއިން ނުފެނުނެވެ. އަދި ބޮޑު އަގެއް ދީފައި ގެނައި ލިއޮނަލް މެސީގެ ފަރާތުން ވެސް އެދެވޭ ކުޅުމެއް ފެނިފައެއް ނުވެއެވެ. އެޓްލާންޓާ މޮޅުކޮށް ދިނީ ބާޓޯޒް ސްލިޒް ޖަހައިދިން ލަނޑުންނެވެ.

ދާދި ފަހުން ފެބްރިޒިއޯ ރޮމާނޯ އަށް ދިން އިންޓަވިއުގައި މެސީ ބުނީ އެމްއެލްސް ކަޕްގެ ތަށި ކާމިޔާބު ކުރުމަކީ އޭނާގެ ހުވަފެނެއް ކަމަށެވެ. އެކަމަކު މިއަދު ކުރިމަތިވި ބައްޔާ އެކު އެ އުއްމީދު، މި ސީޒަނުގައި ދެން އޭނާއަށް ހާސިލެއް ނުވާނެ އެވެ.

ޓީމު ކަޓައިގެން ދިއުމުން، މެޗު ނިމުމުން ދަނޑުމަތީގައި މެސީ މަޑެއް ނުކުރިއެވެ. އެޓްލާންޓާގެ ކުޅުންތެރިންނާ ސަލާން ވެސް ނުކޮށް އޭނާ ދިޔައީ ޗޭންޖިން ރޫމަށެވެ. ބެލެވޭ ގޮތުގައި މި ބަލި އޭނާއަކަށް ހަޖަމެއް ނުވިއެވެ.