ސްކޫލުތަކުގެ އެންމެ ބޮޑު އެތުލެޓިކްސް މުބާރާތް ކަމަށްވާ އިންޓަސްކޫލް އެތުލެޓިކްސް މުބާރާތް މިއަހަރު 1500 އަށްވުރެ ގިނަ އެތުލީޓުންނާއެކު ހުޅުމާލޭގައި ފަށައިފިއެވެ.

ރާއްޖޭގެ އެކި ކަންކޮޅުތަކުން މިއަހަރުގެ އެތުލެޓިކްސް މުބާރާތުގައި 52 ސްކޫލުން އެތުލީޓުން ވަނީ ބައިވެރިވެފައެވެ. އަދި މުބާރާތުގެ ހުރިހާ އިވެންޓަކަށްވެސް ވަނީ ބޮޑު ތަރުޙީބެއް ލިބިފައެވެ.

މި މުބާރާތުގެ އެންމެ ފޯރިގަދަ އިވެންޓުތަކުގެ ތެރޭގައި 100 މީޓަރާއި 200 މީޓަރު ދުވުމުގެ އިތުރުން ފޯރިގަދަވަމުން އަންނަ އިވެންޓުތައް ކަމަށްވާ ލޯންގް ޖަމްޕާއި ހައި ޖަމްޕުގެ އިވެންޓުތައް ހިމެނެއެވެ. އަންނަ ބުރާސްފަތި ދުވަހުގެ ނިޔަލަށް، ހެނދުނާއި މެންދުރު ފަހުގެ ދަންފަޅިތަކަށް ބަހާލައިގެން މިއަހަރުގެ އިންޓަސްކޫލް މުބާރާތް ކުރިޔަށްދާއިރު، މިއީ ރާއްޖޭގެ އެކި ކަންކޮޅުތަކުން ގިނަ ސްކޫލްތަކެއް ކޮންމެ އަހަރަކު ވާދަކުރާ މުބާރާތެކެވެ.

މި މުބާރާތަކީ ބޮޑު ތަރުހީބެއް ލިބެމުން އަންނަ ނަ ގައުމީ ރިކޯޑުތަކެއް ހަދަމުން އަންނަ މުބާރާތެކެވެ. އަދި އަރަމުން އަންނަ ހުނަރުވެރި އެތުލީޓުންގެ ވިދުން ގިނަ ބަޔަކަށް ފެނިގެންދާ އެއް މުބާރާތެވެ.