މެންޗެސްޓަރ ސިޓީ ބަލިވުމުގެ ފައިދާ ނަގައި، ލިވަޕޫލުން އެސްޓަން ވިލާ ބަލިކޮށް ލީގު ތާވަލްގެ އެއް ވަނައިގައި ފަސް ޕޮއިންޓްގެ ލީޑެއް ނަގައިފިއެވެ.

އެއްވަނައިގައި ލިވަޕޫލުން ލީޑް ފުޅާކުރީ 2-0 ން އެސްޓަން ވިލާ ބަލިކޮށްގެންނެވެ. ފުރަތަމަ ހާފްގައި ލިވަޕޫލަށް ލީޑް ނަގައިދިނީ ޑާވިންގ ނޫނޭޒް އެވެ. އެއީ މުޙައްމަދު ސަލާހު ތަނަވަސްކޮށްދިން ފުރުޞަތަކުންނެވެ. އަދި 84 ވަނަ މިނިޓްގައި ލަނޑު ޖަހާ ލީޑް ފުޅާކޮށްދިނީވެސް ސަލާހުއެވެ.

ދެވަނަ ލަނޑު ޖެހުމަށްފަހު ސަލާހު. ފޮޓޯ: ޕްރިމިއަރ ލީގު

މިއީ މިސީޒަންގެ ޕްރިމިއަރ ލީގުގައި ކުޅުނު 11 މެޗުން ލިވަޕޫލް ހޯދި 9 ވަނަ މޮޅެވެ. އާން ސްލޮޓްގެ އިރުޝާދުގެ ދަށުން ކުޅުނު 17 މެޗުގެ ތެރެއިން 15 މެޗު ލިވަޕޫލު ވަނީ ކާމިޔާބުކޮށްފައެވެ.

ޕްރިމިއަރ ލީގު ތާވަލްގެ އެއްވަނައިގަ ލިވަޕޫލް އޮތީ 11 މެޗުން 28 ޕޮއިންޓާ އެކުއެވެ. ސިޓީ ދެވަނައިގަ އޮތީ 23 ޕޮއިންޓާ އެކުއެވެ.

ލީގުގައި، ވުލްވްސް ވަނީ ސައުތްހެމްޓަން ބަލިކޮށް ފުރަތަމަ ލީގު މޮޅު ހޯދާފައެވެ. 2-0 ން ކުރި ހޯދި މެޗުގައި ވުލްވްސްގެ ދެ ލަނޑު ޖެހީ ޕަބްލޯ ސަރާބިއާ އާއި މެތިއުސް ކުންހާ އެވެ. ފުރަތަމަ މޮޅާއެކު ވުލްވުސް އޮތީ 11 މެޗުން 6 ޕޮއިންޓާއެކު 18 ވަނައިގަ އެވެ. 11 މެޗުގެ ތެރެއިން ތިން މެޗު ވަނީ އެއްވަރު ވެފައެވެ.