ދުނިޔޭގެ އެންމެ ބޮޑު އެއް ޓޫރިޒަމް ފެއާ ކަމަށްވާ އިންޓަނޭޝަނަލް ޓޫރިޒަމްސް-ބޯރސޭ (އައިޓީބީ) ބާލިން 2025 ގައި ރާއްޖޭގެ ފަތުރުވެރިކަމުގެ ސިނާޔަތުގެ 89 ކުންފުންޏެއް ތަމްސީލުކުރާ 200 މަންދޫބުންގެ ވަފުދެއް ބައިވެރިވެއްޖެއެވެ.

މި ފެއާގެ ސަބަބުން ރާއްޖޭގެ ފަތުރުވެރިކަން އިޝްތިހާރުކޮށް، އާ މާކެޓް ކަނެކްޝަންތަކެއް ގާއިމުކުރުމާއި، ޖަރުމަނު ބަހުން ވާހަކަ ދައްކާ މާކެޓްތަކާ ގުޅުން ބަދަހިކުރެވޭނެ ޕްލެޓްފޯމެއް ލިބިގެންދާނެއެވެ. ދުނިޔޭގެ އެކި ކަންކޮޅުތަކުގައި ތިބި ފަތުރުވެރިކަމުގެ ދާއިރާގެ ސްޓޭކްހޯލްޑަރުންނާއި އެކު ނެޓްވޯޯކިން އާއި ވިޔަފާރީގެ ގުޅުން ބަދަހިކޮށް، ބީ2ސީ އޯޑިއެެންސްއަށް ރާއްޖޭގެ ފަތުވެރިކަން އިޝްތިހާރުކުރެވުމުގެ ފުރުސަތު ހުޅުވިގެންދާނެއެވެ. 

މި ރަސްމިއްޔާތުގައި މިނިސްޓަރ އޮފް ޓޫރިޒަމް އެންޑް އެންވަޔަރަންމަންޓް ޠާރިޤް އިބްރާހީމް ވަނީ ފަތުރުވެރިކަމުގެ އެއްބާނީ ޗަންޕާ ހުސައިން އަފީފާއި، ޑާޓޫރާއި، ޓީޔޫއައި އަދި އެޑެލްވައިސް އެއަރލައިންސްއާ މަޝްވަރާކުރައްވާފައެވެ. މި ބައްދަލުވުންތަކުގައި މައިގަނޑު ގޮތެއްގައި އަލިއަޅުވާލާފައިވަނީ ކަނެކްޓިވިޓީ އާއި މާކެޓް ޑިވެލޮޕްމަންޓާއި އިންޑަސްޓްރީ ގުޅިގެންނެވެ.

ޖަރުމަނު ވިލާތުގައި ހުންނަވާ ރާއްޖޭގެ ސަފީރު އައިޝަތު ޝާން ޝާކިރުގެ އިތުރުން މިނިސްޓަރު ވަނީ ޖަރުމަނުގައި ހުންނަވާ ރާއްޖޭގެ ކޮންސުލޭޓު ކްރިސްޓިއަން ވޮން ސްޓެޓެން އާއި އެންޑްރިއަސް ޕީޓާ ވިޓޭއާ ވެސް ބައްދަލުކުރައްވާ، ޖަރުމަނު މާކެޓުގައި ފަތުރުވެރިކަން ކުރިއެރުވުމަށް ކުރަމުންދާ މަސައްކަތްތަކާ ބެހޭ ގޮތުން މަޝްވަރާ ކުރައްވާފައެވެ.

ރަސްމީ ތަފާސް ހިސާބުތައް ދައްކާ ގޮތުން ރާއްޖެއަށް އެންމެ ގިނައިން ފަތުރުވެރިން ޒިޔާރަތްކުރާ ފަސް ގައުމުގެ ތެރޭގައި ޖަރުމަނު ހިމެނޭއިރު، 2024 ވަނަ އަހަރު އެކަނިވެސް 150،000 އަށް ވުރެ ގިނަ ފަތުރުވެރިން އެގައުމުން އައިސްފައިވެ އެވެ.

އެމްއެމްޕީއާރުސީގެ މާކެޓިން ސްޓްރެޓެޖީގެ ތެރޭގައި ޖަރުމަނު ބަހުން ވާހަކަ ދައްކާ އޯޑިއަންސަށް ހާއްސަކޮށްގެން ހިންގާ ޕްރޮމޯޝަނަލް ކެމްޕެއިންތަކުގެ އިތުރުން ޖަރުމަނާއި ސްވިޒަލޭންޑް އަދި އޮސްޓްރިއާގެ މާކެޓް ވާސިލުވުމަށް،  ޕްރިމިއަމް ޓްރެވަލް ބްރޭންޑްތަކާ ގުޅިގެން ކުރިއަށް ގެންދާ ޕްރޮމޯޝަން ކެމްޕެއިންތައް ހިމެނެއެވެ.