ވިނީޝިއުސްގެ ހެޓްރިކުން ރެއާލް މެޑްރިޑަށް އުފާވެރިކަމެއް ލިބުނު މެޗުގައި ޑިފެންޑަރ މިލިޓާއޯ އަށް އަނިޔާވެ ކޯޗު އެންޗެލޮޓީ އަށް ހިތްދަތިކަމާވެސް ކުރިމަތިވެއްޖެއެވެ.

ބެލޮންޑިއޯގެ މާޔޫސްކަމަށް ފަހު، ސްޕެނިޝް ލަލީގާގައި އޮސަސޫނާ ކޮޅަށް ހެޓްރިކް ހަދާ ބްރެޒިލްގެ ފޯވާޑް ވިނީޝިއުސް ވަނީ ތަފާތު ދައްކާފައެވެ. އަދި މިއީ ބެލޮންޑިއޯގެ ކަންތައްގަނޑަށް ފަހު އޭނާ ދެއްކި އެންމެ މޮޅު ކުޅުމެވެ.

މެޗުގެ 34 ވަނަ މިނިޓްގައި ބެލިންގހަމް ތަނަވަސްކޮށްދިން ފުރުޞަތެއްގެ ބޭނުން ހިފައި ވިނީޝިއަސް ވަނީ ރެއާލްއަށް ފުރަތަމަ ލަނޑު ކާމިޔާބުކޮށްދީ އިދިކޮޅު ޓީމުގެ ހިތްވަރު އެލުވާލައިފައެވެ. އޭގެފަހުން ހާފް ނިމުމުގެ ކުރިން ރެއާލްގެ ދެވަނަ ލަނޑު ޖަހާފައި ވަނީ ބެލިންގހަމްއެވެ. މިއީ ބެލިންގހަމް ސީޒަންގައި ޖެހި ފުރަތަމަ ގޯލެވެ.

ވިނީޝިއުސް ހެޓްރިކް ހަދައިފައިވަނީ ދެވަނަ ހާފްގައި، މެޗުގެ 60 ވަނަ މިނިޓާއި 69 ވަނަ މިނެޓްގައި ލަނޑު ޖަހައިގެންނެވެ. ހެޓްރިކް ހަދަން މެދުވެރިއެއްގެ ގޮތުގައި ހުރީ ބަދަލު ކުޅުންތެރިއެއްގެ ގޮތުގައި ނިކުތް ބްރަހިމް ޑިއާޒްއެވެ. އެމްބާޕޭގެ ފަރާތުން ރަނގަޅު ކުޅުމެއް ފެނިފައެއްނުވެއެވެ.

ވިނީޝިއުސްގެ ހެޓްރިކުން ރެއާލް އަށް ލިބުނު އުފާވެރިކަން ދެމިގެން ދިޔައީ ކުޑަ ހިނދުކޮޅަކަށެވެ. އެ ޓީމުގެ ޑިފެންޑަރު މިލިޓާއޯ ރޮމުން ރޮމުން ދަނޑުން ފޭބީ ސީރިއަސް އަނިޔާއާއެކުއެވެ. އޮޕަރޭޝަން ކުރަން ޖެހޭކަމަށް ކްލަބުން ބުނެފައިވާ އިރު، މިލިޓާއޯގެ އިތުރުން ރޮޑްރީގޯ އާއި ލުކަސް ވަޒުކުއޭޒްވެސް ބަދަލުކުރީ އަނިޔާގެ ސަބަބުންނެވެ.

މި މޮޅާއެކު ރެއާލް މެޑްރިޑް ތާވަލްގެ ދެވަނައަށް ޖެހިލިއިރު އެއްވަނައިގައި އޮތީ ބާސެލޯނާއެވެ.