ENGLISH
04 އޭޕްރީލު 2025
ރާއްޖެ ޒިޔާރަތްކުރާ ފަތުރުވެރިންގެ އަދަދު މައްޗަށް، އެންމެ ގިނައީ ޗައިނާ އަދި ރަޝިއާ ފަތުރުވެރިން
04 މާރިޗު 2025
|
ފަތުރުވެރިންތަކެއް ވެލާނާ އިންޓަނޭޝަނަލް އެއާޕޯޓުގައި، މިއަހަރު ފަތުރުވެރިން ޒިޔާރަތްކުރާ އަދަދު ވަނީ އިތުރުވެފަ.
އެންމެ މަޤްބޫލު
ރާއްޖެ ޒިޔާރަތްކުރާ ފަތުރުވެރިންގެ އަދަދު މިއަހަރު ވެސް އިތުރުވަމުންދާކަން މިނިސްޓްރީ އޮފް ޓޫރިޒަމް އެންޑް އެންވަޔަރަމަންޓުން މިއަދު އާއްމުކުރި ތަފާސްހިސާބުން ދައްކައިފިއެވެ.
ޓޫރިޒަމް މިނިސްޓްރީން މިއަދު އާއްމުކުރި ތަފާސްހިސާބުގައި ފާހަގަކޮށްފައިވާ ގޮތުގައި މި އަހަރުގެ މިހާތަނަށް 451،554 ފަތުރުވެރިން ވަނީ ރާއްޖެ ޒިޔާރަތްކޮށްފައެވެ. މިދިޔަ އަހަރުގެ މާޗް 3 ވަނަ ދުވަހާއި ހަމައަށް ރާއްޖެ ޒިޔާރަތްކޮށްފައިވަނީ 431،002 ފަތުރުވެރިންނެވެ. އޭގެ ކުރީއަހަރު އެ މުއްދަތުގައި ޒިޔާރަތްކޮށްފައިވަނީ 367،904 ފަތުރުވެރިންނެވެ. އެ ހިސާބުތަކަށް ބަލާއިރު މިދިޔަ އަހަރާ އަޅާބަލާއިރު މިއަހަރުގެ މިހާތަނަށް ވިހިހާހަށް ވުރެ ގިނަ ފަތުރުވެރިން ޒިޔާރަތްކޮށްފައިވެއެވެ.
މި އަހަރުގެ މިހާތަނަށް އެންމެ ގިނައިން ފަތުރުވެރިން ރާއްޖެ ޒިޔާރަތްކޮށްފައި ވަނީ ޗައިނާ އާއި ރަޝިއާއިންނެވެ. އެއްވަނައިގައި އޮތް ޗައިނާ އިން 59،938 ފަތުރުވެރިން ރާއްޖެ ޒިޔާރަތްކޮށްފައިވާއިރު އެއީ ޖުމްލަ އެރައިވަލްގެ 13.3 އިންސައްތައެވެ. ރަޝިއާއިން 45،073 ފަތުރުވެރިން މި އަހަރު ރާއްޖެ ޒިޔާރަތްކޮށްފައިވާއިރު އެއީ އެރައިވަލްގެ 10 އިންސައްތައެވެ.
ތަފާސްހިސާބުތަކުގައި ބުނެފައިވަނީ މިހާރު ދުވާލަކު އެވްރެޖްކޮށް 7،283 ފަތުރުވެރިން ރާއްޖެ އަންނަ ކަމަށެވެ.
ޗައިނާ އާއި ރަޝިއާގެ އިތުރުން ތިން ވަނައިގައި އިނގިރޭސިވިލާތް އުޅޭއިރު، ހަތަރު ވަނައިގައި އިޓަލީ އަދި ފަސް ވަނައިގައި އޮތީ ޖަރުމަނެވެ. އެންމެ ގިނަ ފަތުރުވެރިން ރާއްޖެ ޒިޔާރަތްކުރާ 10 ޤައުމުގެ ލިސްޓުގައި ދެން އުޅެނީ އިންޑިއާ އާއި ފްރާންސްގެ އިތުރުން އެމެރިކާ، ޕޮލެންޑް އަދި ސްވިޒަލެންޑެވެ.
ރާއްޖެ ޒިޔާރަތްކުރާ ފަތުރުވެރިންގެ އަދަދު އިތުރުވަމުންދާއިރު، ރާއްޖޭގެ ތާރީޚުގައި ފުރަތަމަ ފަހަރަށް މިދިޔަ އަހަރު ވަނީ ދެ މިލިއަން ފަތުރުވެރިން ޒިޔާރަތްކޮށްފައެވެ. އެގޮތުން މިދިޔަ އަހަރު ނިމުނުއިރު 2،046،615 ފަތުރުވެރިން ރާއްޖެ ޒިޔާރަތްކުރިއެވެ.
ފަތުރުވެރިން ރާއްޖެ ޒިޔާރަތްކުރާ ނިސްބަތް އިތުރުކުރުމަށް ސަރުކާރުން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ރާއްޖެއަށް އެންމެ ގިނަ ފަތުރުވެރިން ޒިޔާރަތްކުރާ މަންޒިލްތަކުގައި ރާއްޖެ ޕްރޮމޯޓްކުރުމުގެ ހަރަކާތްތައް މިއަހަރު ވެސް ވަނީ ކުރިއަށް ގެންގޮސްފައެވެ. އަދި، އަހަރުގެ އެކި ދުވަސްވަރަށް ބަހާލައިގެން އެކި މާކެޓްތަކުން ފަތުރުވެރިން ގިނަކުރުމަށް ޚާއްޞަ ހަރަކާތްތަކެއް މިއަހަރަށް ވަނީ ތާވަލުކޮށްފައެވެ.