ދިވެހިންގެ މެދުގައި މަޤްބޫލު މޭވާތަކުގެ ތެރޭގައި ހިމެނޭ ބިލިމަގަކީ ހުތް ރަހައެއް ހުންނަ ގިނަ ފައިދާތަކެއް އެކުލެވިގެންވާ މޭވާއެކެވެ.

އެންމެ ކުރިންސުރެ ދިވެހިންގެ ރިހަތަކުގެ ރަހަ މީރުކޮށްލުމަށް ނުވަތަ އަސާރަ ހެދުމަށް ބޭނުން ކުރަމުންދާ މި މޭވާއަކީ ވިޓަމިންސީގެ އިތުރުން ވިޓަމިން އޭ އާއި ވިޓަމިން ބީ އިން މުއްސަނދިވެފައިވާ މޭވާއެކެވެ. މީގެ އިތުރުން މައުދަނުގެ ބާވަތްތަކުގެ ތެރެއިން ދަގަނޑާއި ފޮސްފަރަސް އަދި ކެލްޝިއަމްއިން ބަރާވެފައިވާ މޭވާއެއްވެސް މެއެވެ.

ވަރަށް ފަހަކާޖެހެންދެންވެސް ބިލިމަގަކީ ދުނިޔޭގައި މާ މަޤްބޫލު މޭވާއެއް ނޫނެވެ. ނަމަވެސް ފަހުގެ ދިރާސާތަކުގެ ނަތީޖާއާއެކު ބިލިމަގުގެ މަޤްބޫލުކަން މިވަނީ އިތުރުވެފައެވެ.

ބިލިމަގަކީ ވިޓަމިންސީ ފަދަ ގިނަ އަދަދެއްގެ އެންޓި އޮކްސިޑެންޓްސް ހިމެނޭ މޭވާއެއްކަމުން ފްރީ ރެޑިކަލްތަކުގެ ސަބަބުން ހަށިގަނޑުގެ ސެލްތަކަށް ލިބޭ ގެއްލުންތައް ބިލިމަގު ކެއުމުން ކުޑަކޮށްދެއެވެ. ފްރީ ރެޑިކަލްތަކުން ހަށިގަނޑުގެ ސެލްތައް ރައްކާތެރިކުރުމަކީ މުސްކުޅިވުން ލަސްވެ، އެކިބާވަތުގެ ކެންސަރުތަކަށް ހަށިގަނޑު ހުށަހެޅުން ކުޑަކޮށްދޭނޭ ކަމެކެވެ.

ބިލިމަގަކީ ގިނަ އަދަދަކަށް ވިޓަމިން ސީ ހުންނަ މޭވާއެއްކަމުން ވަރަށް ގިނަ ބަލިތަކުން ރައްކާތެރިވުމަށާއި ރަނގަޅުވުމަށް ބިލިމަގު ބޭނުން ކުރެވިދާނެއެވެ. މިގޮތުން ބިލިމަގު ބޭނުން ކުރާނަމަ އަނިޔާތަކުން އުފެދޭ ފާރުތައް އަވަހަށް ފަސޭހަ ކޮށްދީ، ދިފާއީ ބާރު ގަދަކޮށްދީ އަރިދަފުސް ރޯގާފަދަ ގައިން ގަޔަށް އަރާ ބަލިތަކުން ހަށިގަނޑު ސަލާމަތްކޮށްދެއެވެ. އަދި ފުރަގަސް ފަރާތު ބަލި ހުންނަ މީހުންނަށް ބިލިމަގަކީ ބޭނުން ކުރަން ރަނގަޅު މޭވާއެއްކަމަށް ވަނީ ފާހަގަ ކުރެވިފައެވެ.

ބިލިމަގު ގަހުގެ މޭވާގެ އިތުރުން ފަތާއި މުލާއި މަލުންވެސް އެކި ބޭނުންތައް ފުދެއެވެ. އެގޮތުން ބިލިމަގުގެ ދިޔަ ބޭނުން ކުރުމުގެ ސަބަބުން  ހަށިގަނޑުގެ ތަންތަން ކެހުމުންނާއި ހަންގަނޑު ފަޅައިގެން ދިޔުމުން ސަލާމަތްކޮށްދެއެވެ. އަދި ބިލިމަގު ފަތުގެ ދިޔަ ބޭނުންކޮށްގެން ދުޅަވާ ތަންތަނުގެ ދުޅަ ތިރި ކުތެވޭނެއެވެ. އަރިދަފުސް ރޯގާޖެހި މާގަދަޔަށް ކެއްސާނަމަ، ކެއްސުން ލުއި ކުރުމަށް ބިލިމަގު މަލުގެ ދިޔަ ބޭނުން ކުރެވިދާނެއެވެ.