މޯލްޑިވިއަންގެ ފުރަތަމަ ވައިޑް-ބޮޑީ މަތިންދާބޯޓު، އޭ330 މަތިންދާބޯޓުގައި އިންޑިއާގެ ކޮޗިން އާއި ޓްރިވަންޑްރަމަށް ދަތުރުތަކެއް ފަށައިފިއެވެ.

މީގެ ކުރިން ކޮޗިން އާއި ޓްރިވަންޑްރަމަށް ދަތުރުކުރަނީ މޯލްޑިވިއަންގެ އޭޓީއާރު 72 މަރުކާގެ ބޯޓާއި އެއަރބަސް އޭ320 މަރުކާގެ ބޯޓުގައެވެ. މޯލްޑިވިއަނުން ބުނީ، ކުރިއަށް އޮތްތަނުގައި ވެސް ދަތުރުކުރާ މީހުންގެ އަދަދު އިތުރުވާނަމަ އޭ330 ގައި މީހުން އުފުލާނެ ކަމަށެވެ.

އޭ-330ގައި އިންޑިއާގެ ކޮޗިން އާއި ޓްރިވެންޑަރަމަށް ދަތުރެއް ކުރިއިރު، އެއީ ބޭސްފަރުވާއަށް ދިވެހީން އެންމެ ގިނައިން ގޮސް އުޅޭ ސިޓީތަކެވެ. އަދި މި ދުވަސްވަރަކީ ސްކޫލް ބަންދު ދުވަސްވަރަކަށްވުމާއެކު ވައިގެ ދަތުރުފަތުރުގެ ޑިމާންޑް ވެސްވަނީ ބޮޑުވެފައެވެ.

ބައެއް މަންޒިލްތަކަށް ދަތުރުކުރުމަށް އޮންނަ ޑިމާންޑު ބޮޑުވެއްޖެ ނަމަ، މޯލްޑިވިއަނުން ބޮޑެތި ބޯޓުތައް އެ މަންޒިލްތަކަށް އޮޕަރޭޓު ކުރެއެވެ.

މޯލްޑިވިއަނަށް މިދިޔަ ޖެނުއަރީ މަހުގެ ގެނައި 264 މީހުންގެ ޖާގައިގެ ވައިޑް-ބޮޑީ މަތިންދާބޯޓާއެކު އެ އެއަރލައިންގެ ސީދާ ދަތުރުތައް ޗައިނާގެ ތިން މަންޒިލަކަށް ވަނީ ފަށާފައެވެ. މީގެ އިތުރުން ޔޫރަޕްގެ ޤައުމުތަކަށް ދަތުރުތައް ފެށުމަށްޓަކައި ވައިޑް-ބޮޑީގެ އިތުރު ބޯޓެއް ހޯދުމުގެ މަސައްކަތް ވެސް ޤައުމީ އެއަރލައިނުން އަންނަނީ ކުރަމުންނެވެ.

ދެވަނަ ބޯޓު ރާއްޖެ ގެނެސް، މި އަހަރުގެ އޮކްޓޫބަރުގައި އުދުހުންތައް ފެށޭނެ ކަމަށް ރައީސް ޑރ. މުހައްމަދު މުއިއްޒުވަނީ ވިދާޅުވެފައެވެ.