އެލައިޑް އިންޝުއަރަންސް ކުންފުނީގެ އިސްލާމިކް ވިންޑޯ، އަޔާދީ ތަކާފުލްގެ 11 ވަނަ އަހަރީ ދުވަސް ފާހަގަކުރުމުގެ ގޮތުން އެކުންފުނީގެ އެންމެ މަގުބޫލު އެއް ހިދުމަތް ކަމުގައިވާ "ޙައްޖު އަދި ޢުމްރާ ތަކާފުލް" އިން 50 އިންސައްތައަށްވުރެެ ބޮޑު ޑިސްކައުންޓެއް ދޭން ނިންމައިފިއެވެ.  

ޙައްޖާއި ޢުމްރާގެ އަޅުކަމުގެ ދަތުރުމަތީގައި ދިމާވެދާނެ ޞިއްޙީ އަދި މާލީ ގެއްލުން ލިބޭ ހާލަތްތައް ހިމަނައިގެން ތައްޔާރުކޮށްފައިވާ ޙައްޖު ތަކާފުލް ކުރިން ފޯރުކޮށްދީފައިވާ އަގަކީ 750 ރުފިޔާއެވެ. އަދި ޢުމްރާ ތަކާފުލް ކުރިން ފޯރުކޮށްދެމުންދިޔަ އަގަކީ 550 ރުފިޔާއެވެ. ޑިސްކައުންޓާއިއެކު މިހާރުގެ އަގަކީ 300 ރުފިޔާއެވެ.

މި ޕްލޭނުތަކުގެ މައުލޫމާތު، ބޭންކް އޮފް މޯލްޑިވްސް (ބީއެމްއެލް) އިން ޙައްޖާއި ޢުމްރާވެރިންނަށް ޑޮލަރު ދޫކުރަމުންދާ، ސަލްމާން މިސްކިތުގެ 5 ވަނަ ފަންގިފިލާއިން ލިބެމުންދާނެއެވެ. އަދި މިތަނުން މި ޕްލޭންތައް ނެގުމުގެ ހިދުމަތްވެސް، 27 ފެބްރުވަރީ އާއި ހަމައަށް ހެނދުނު 9:00 އިން މެންދުރު 2:00 އަށް ލިބޭނެއެވެ. އެ ތާރީހަށްފަހު، 13 މާރިޗުގެ ނިޔަލަށް ހިދުމަތަށް ހާއްސަކުރެވިފައިވާ ގަޑިއަކީ ހެނދުނު 9:00 އިން 11:30 އަށެވެ.

މީގެ އިތުރުން، ކުރިއެކޭވެސް އެއްގޮތަށް މައި އެލައިޑް ޕޯޓަލާއި

https://myallied.mv/hajj-umrah/hajj-umrah-takaful އެލައިޑް އެޕް މެދުވެރިކޮށް ވަގުތުން މިޕްލޭން ބައްލަވައިގަނެވޭނެ ކަމުގައި އަޔާދީއިން މައުލޫމާތު ދެއެވެ.

އަޔާދީ ތަކާފުލްއިން މައުލޫމާތު ދޭ ގޮތުގައި ވޭތުވެދިޔަ 11 އަހަރުވެސް ކުންފުނީގެ މައިގަނޑު އަމާޒަކަށްވެފައިވަނީ ރައްޔިތުންނަށް އަތްފޯރާފަށުގައި ރައްކާތެރިކަން ކަށަވަރު ކުރެވޭނެ، އިސްލާމީ ޝަރީއަތާ ރައްޓެހި އިންޝުއަރަންސް ނިޒާމެއް ޤާއިމްކުރުމެވެ. މިފަހަރު މިގެނެވުނު ބަދަލާއި އެކު ޙައްޖު އަދި ޢުމްރާއަށް ދާ ފަރާތްތަކަށް ޕްލޭން ނެގުމަށްޓަކައި ލުއި ފަސޭހަ އިންތިޒާމްތަކެއް ހަމަޖެހިފައިވާކަން އެކުންފުނިން ފާހަގަކުރެއެވެ.