މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ/ ވިޒިޓް މޯލްޑިވްސް) އިން ބުކިންގ ޑޮޓްކޮމްއާ ގުޅިގެން ރާއްޖެ އެންމެ އެކަށީގެންވާ ގޮތަށް އިޝްތިހާރު ކުރުމަށް އެއްބަސްވުމެއްގައި ސޮއިކޮށްފިއެވެ.

މި އެއްބަސްވުމުގެ ދަށުން، ބުކިންގ ޑޮޓް ކޮމްގެ ބައިނަލްއަގުވާމީ ވަސީލަތްތަކާއި، މާކެޓިނގ ތަޖުރިބާގެ ބޭނުން ހިފޭނެއެވެ. އަދި މީގެ ސަބަބުން އެންމެ ފުރިހަމަ ގޮތުގައި ރާއްޖޭގެ ރަށްރަށުގެ ގުދުރަތީ ރީތިކަމާއި، ހިތްގައިމު ސަގާފަތާ، ތަފާތު ތަޖުރިބާތައް ދައްކުވައިދީ ދިވެހި ރާއްޖޭގެ ފަތުރުވެރިކަން އިތުރަށް ކުރިއެރުވޭނެ ފުރުސަތު ލިބޭނެއެވެ.

އެމްއެމްޕީއާރުސީގެ ސީއީއޯ އަދި މެނޭޖިން ޑިރެކްޓަރު އިބްރާހިމް ޝިއުރީ ވިދާޅުވީ މި ޕާޓްނަޝިޕަކީ ރާއްޖޭގެ ޑައިވަރސިޓީ ދުނިޔޭގެ ފެންވަރުގައި ދައްކާލުމަށް ވަރަށް މުހިންމު ފުރުސަތެއް ކަމަށެވެ. އޭނާ ވިދާޅުވީ ބުކިން ޑޮޓްކޮމްގެ ނެޓްވޯކާއި ޑިޖިޓަލް ކެޕޭސިޓީތައް ބޭނުންކޮށްގެން، ރާއްޖެ ޒިޔާރަތްކުރާ މީހުންގެ އަދަދު އިތުރުކުރެވޭނެ ކަމަށެވެ.

މީގެއިތުރުން، ބުކިން ޑޮޓްކޮމްގެ ކަންޓްރީ މެނޭޖަރު ސަންޓޯޝް ކުމާރު ވަނީ ދުނިޔޭގެ ފެންވަރުގައި ރާއްޖެ އިޝްތިހާރުކުރުމަށް ގާއިމްކުރި މި ޕާޓްނަޝިޕާ މެދު އުފާވާ ކަމަށް ވިދާޅުވެފައެވެ. އޭނާ ވަނީ ދިގު މުއްދަތަކަށް ފަތުރުވެރިކަން ދެމެހެއްޓެނިވި ގޮތެއްގައި ކުރިއަށް ގެންދިއުމަށް ތަމްރީނު ދިނުމުގެ މަސައްކަތްތަކުގެ ތެރެއިން ލޯކަލް ޕްރޮވައިޑަރުންނަށް އެހީތެރިވުމަށް ދޭ ސަމާލުކަމަށް އަލިއަޅުވާލައްވާފައެވެ.

މި އެގްރިމެންޓްގެ ދަށުން، ރާއްޖެގެ ފަތުރުވެރިކަން މާކެޓުކުރުމަށް އިތުރު ފުރުސަތުތަކެއް ލިބިގެންދާނެއެވެ.