ޑޮލަރު އޭޓީއެމްގެ ޚިދުމަތް އުތުރުގެ ކުޅުދުއްފުށި ސިޓީގައި ރަސްމީކޮށް ފަށައިފި އެވެ.

ބޭންކު އޮފް މޯލްޑިވްސް އިން މިއަދު ބުނީ މާލެ ސަރަހައްދުން ބޭރުގެ ތިންވަނަ މަންޒިލެއްގެ ގޮތުގައި ކުޅުދުއްފުށި ސިޓީގައި ޑޮލަރު އޭޓީއެމްގެ ޚިދުމަތް މިއަދު ފަށާފައިވާ ކަމަށެވެ.

މި ވަގުތު އެ ބޭންކުގެ ޑޮލަރު އޭޓީއެމްގެ ޚިދުމަތް ލިބެމުން ދަނީ މާލެއާއި ހުޅުމާލެ އަދި ވެލާނާ އިންޓަނޭޝަނަލް އެއާޕޯޓްގެ އިތުރުން އައްޑޫ ސިޓީއާއި ކ. މާފުއްޓާއި ކުޅުދުއްފުށި ސިޓީގަ އެވެ.

މިއަދުގެ ރަސްމިއްޔާތު ޝަރަފުވެރިކޮށް ދެއްވާ ވާހަކަފުޅު ދައްކަވަމުން ޓޫރިޒަމް މިނިސްޓަރު ތޯރިގް އިބްރާހިމް ވިދާޅުވީ ޑޮލަރު އޭޓީއެމްގެ ޚިދުމަތް ފެށުމުން ކުޅުދުއްފުށި ސިޓީގެ ރައްޔިތުންނާއި އެ ސަރަހައްދުގައި ދިރިއުޅޭ އެހެނިހެން ރައްޔިތުންނަށް ފަސޭހަތަކެއް ލިބިގެންދާނެ ކަމަށެވެ. އަދި ރައީސް ޑޮކްޓަރ މުހައްމަދު މުޢިއްޒުގެ އަމާޒަކީ މުޅި ރާއްޖެއަށް ބޭންކުގެ ޚިދުމަތް ފުޅާ ކުރެއްވުން ކަމަށް ވިދާޅުވި އެވެ.

ރައީސް މުޢިއްޒު ވަނީ މި އަހަރު ނިމުމުގެ ކުރީން ރާއްޖޭގެ ހުރިހާ ރަށެއްގައި ބީއެމްއެލްގެ އޭޓީއެމް ބަހައްޓާ ޚިދުމަތް ދިނުމަށް ވެސް ނިންމާފަ އެވެ. އެ މަސައްކަތް ވަރަށް ބާރު ސްޕީޑްގައި ކުރިއަށް ދެ އެވެ.