ދިވެހީންގެ އުފެއްދުންތެރިކަމުގެ މައުރަޒް 2025 ގައި ބައިވެރިވުމުގެ ދައުވަތު ރާއްޖޭގެ ހުރިހާ ރަށަކަށް ފޮނުވުމަށްޓަކައި ދިވެހި ސަޤާފީ ޙަރަކާތެއް ބިޒްނަސް ސެންޓަ ކޯޕަރޭޝަން (ބީސީސީ) އިން ފަށައިފި އެވެ.

އިޤްތިޞާދީ ތަރައްޤީ އާއި ވިޔަފާރިއާ ބެހޭ ވަޒީރުގެ މި ދައުވަތު ރާއްޖޭގެ ހުރިހާ ރަށަކަށް ފޮނުވަން ފެށުނުގެ ގޮތުން، މާލެ އަތޮޅުގެ ހުރިހާ ރަށަކަށް ފޮނުވާ ދައުވަތު މިއަދު ވަނީ މާލެ އަތޮޅުގެ ކައުންސިލާ ހަވާލުކޮށްފައެވެ. މި ދައުވަތު މާލެ އަތޮޅު ކައުންސިލަށް އެރުވުމަށްޓަކައި ބީސީސީން ކ. ގުޅީއަށް "ބިލެތާ" ގޮސްފައިވަނީ ޞަޤާފީ ޙަރަކާތްތަކާއެކުއެވެ.

މި މައުރަޒުގެ ދައުވަތު ބިލެތާ ދިއުމުގެ ސަޤާފީ ޙަރަކާތަކާއެކު ފެށުމުގެ މަޤްޞަދަކީ، މި މައުރަޒަކީ ދިވެހީންނަށް ޚާއްޞަ އަދި މިހާތަނަށް ރާއްޖޭގައި ބޭއްވޭ މިފަދަ އެންމެ ބޮޑު މައުރަޒަށް ވުމުން، މިކަމުގައި ރާއްޖޭގެ ހުރިހާ ރަށެއް ތަމްސީލް ކުރުމާއެކު ދިވެހީން ޒަމާނުއްސުރެ ގެންގުޅޭ ދައުވަތު ދިނުމުގެ ޞަޤާފަތް ދިރުވައި އާލާ ކުރުން ހިމެނެއެވެ.

މި ދައުވަތު ދޭން ފެށުމަށް ކ. ގުޅީގައި ބޭއްވި ޚާއްޞަ ރަސްމިއްޔާތުގައި މި ދައުވަތު މާލެ އަތޮޅު ކައުންސިލަށް އެރުވީ މިނިސްޓަރ އޮފް ސްޓޭޓް ފޯރ އިކޮނޮމިކް ޑިވެލޮޕްމަންޓް އެންޑް ޓްރޭޑް، އަލްއުސްތާޛް ޢަބްދު ﷲ ސިޔާޒްއެވެ. މި ދައުވަތު ގުޅީ ކައުންސިލާ ހަވާލުކޮށްދެއްވީ މާލެ އަތޮޅު ކައުންސިލުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމާއެކު އިޤްތިޞާދީ ތަރައްޤީ އާއި ވިޔަފާރިއާ ބެހޭ ވުޒާރާގެ އިރުޝާދާއެކު ދިވެހީންގެ އުފެއްދުންތެރިކަމުގެ މައުރަޒްގެ ހުރިހާ ކަމެއް ކުރިއަަށް ގެންދަނީ ބީސީސީންނެވެ.