އަތައަކީ އެންމެ ކުރިއްސުރެވެސް ރާއްޖޭގައި ހައްދާ އޭގައި ފޮނި ރަހައެއް އެކުލެވޭ މޭވާއެކެވެ.

"އަނޯނާ" އާއިލާއަށް ނިސްބަތްވާ މި މޭވާއަކީ ވިޓަމިން ސީ އިން މުއްސަނދިވެފައިވާ މޭވާއެކެވެ. 

ދިވެހިންގެ މެދުގައި މަޤްބޫލް މި މޭވާއަކީ ހަށިގަނޑަށް ނުހަނު ބޭނުންވާ މާއްދާތައް އެކުލެވޭ ފައިދާހުރި މޭވާއެކެވެ.

މިގޮތުން އަތާގައި ގިނަ އަދަދަކަށް ފައިބަރ އެކުލެވިގެންވާތީ އަތަ ކެއުމުގެ ސަބަބުން ބަނޑު ހިކުމުން ސަލާމަތްކޮށްދީ ހަޖަމުކުރާ ނިޒާމު ވަރުގަދަކޮށްދެއެވެ. މި މޭވާގައި ވިޓައިން އޭގެ އެންޓި އޮކްސިޑެންޓެއް ކަމަށްވާ ލިއުޓިން ގިނަ އަދަދަކަށް ހުރެއެވެ. މީގެ ސަބަބުން ލޮލުގެ ފެނުން ރަނގަޅުކޮށްދީ ލޮލަށް ދިމާވާ އެކި ކަހަލަ މައްސަލަތަކުން ދުރުކޮށްދެއެވެ. ފަހުގެ ދިރާސާތަކުން ދައްކާގޮތުގައި ގަވައިދުން އަތަ ކާ މީހުންނަށް ކެޓަރެކްޓް ފަދަ ލޮލުގެ އާންމު ބަލިތައް ޖެހުމުގެ ފުރުސަތު %27 އަށް ދަށްކޮށްދެއެވެ.

އަތައިގާ ގިނަ އަދަދަކަށް ސޯޑިއަމާއި ޕޮޓޭސިއަމް ހުރުމުގެ ސަބަބުން، އަތައަކީ ލޭމައްޗަށް ދާމީހުންނަށް މުހިންމު މޭވާއެކެވެ. މި ދެމާއްދާގެ ސަބަބުން ލޭހޮޅިތަކުގެ ސިއްޙަތު ރަނގަޅުކޮށްދީ ހިތުގެ ބަލިތައް ޖެހުމުގެ ފުރުސަތު ކުޑަކޮށްދެއެވެ.

ދިވެހިންގެ ތެރޭގައި އާންމުވަމުން އަންނަ ކެންސަރު ބައްޔާ ހަނގުރާމަކުރުމުގެ ޤާބިލުކަން ހުންނަ ތިން މާއްދާއެއް އަތާގައި އެކުލެވިގެންވެއެވެ. މި މާއްދާތަކުގެ ސަބަބުން ގޮހޮރުގެ ކެންސަރުންދުރުކޮށްދޭކަމަށް ދިރާސާތަކުން ބުނެއެވެ.

 ދިފާއީ ނިޒާމު ވަރުގަދަ ކޮށްދިނުމާއި ހުޅުތަކުގައި ރިއްސުމާއި ކަށީގެ ބަލިތަކަށްވެސް އަތަ ކެއުމުން ފަރުވާލިބެއެވެ.

އަތައިގާ ކިތަންމެ ފައިދާއެއް ހުރިކަމުގައިވިޔަސް މާގިނައިން އަތަކެއުމަކީ ސިއްޚީ ގޮތުން ރަނގަޅު ކަމެއްނޫނެވެ. ސަބަބަކީ އަތައިގާ އަނޯނޭސިން ކިޔާ ވިހަ މާއްދާއެއް އެކުލެވޭތީއެވެ. މާ ގިނައިން އަތަ ކެއުމުން ނާރުތަކަށް ޖެހޭ ބައްޔެއް ކަމަށްވާ ޕާކިންޒަންސް ބަލި ޖެހުމަށް މަގުފަހިކުރުވައެވެ. މި ބައްޔަކީ އާންމު ބޭސްތަކަށް ނުގުޑާ މީހާގެ ޙާލަތު ގޯސްކޮށްލާ ބައްޔެކެވެ. އަނޯނޭސިން އެންމެ ގިނައިން ހުންނަނީ އަތައިގެ ތޮށްޓާއި އޮށުގައެވެ. އެހެންކަމުން އަތާއިގެ ތޮށްޓާއި އޮށް ވަކިކޮށްގެން މި މޭވާ ކެއުމަކީ މުހިންމު ކަމެކެވެ.