ކޯޗުކަމުން ރިޓަޔާކުރުމަށްފަހު ދާނީ ރާއްޖެއަށް ކަމަށް ރެއާލް މެޑްރިޑްގެ ކޯޗު އަންޗެލޮޓީ ބުނެފިއެވެ.

ކޯޗެއްގެ ގޮތުގައި އޭނާ މަސައްކަތް ކުރަން އަދި ވެސް އޭނާގެ އަންހެނުން ބޭނުންވާ ކަމަށް، މިލާން އާއި ޗެލްސީގައި ކާމިޔާބު ހޯދި އަންޗެލޮޓީ ފާހަގަކުރިއެވެ.

ޔޫރަޕްގެ ފުޓްބޯޅައިގެ އެންމެ ވަރުގަދަ ފަސް ގައުމުގެ ޑޮމެސްޓިކް ލީގު ކާމިޔާބު ކުރި ހަމައެކަނި ކޯޗުގެ ޝަރަފު ހާސިލު ކުރި އަންޗެލޮޓީ ބުނީ އޭނާ ރިޓަޔާ ކުރަން ޖެހުނަސް ދެރައެއް ނުވާނެ ކަމަށެވެ. 

"އަހަންނަށް ޔަގީންވާ ކަމަކީ އަހަރެން ރިޓަޔާކުރާ ދުވަހަކީ ވަރަށް އުފާވެރި ދުވަހަކަށް ވާނެކަން. އަހަރެން ވަރަށް ގިނަ ތަންތަން ބަލަން އެބަހުރި. މިސާލަކަށް އާޖެންޓީނާ، ދިވެހިރާއްޖެ، އޮސްޓްރޭލިއާއަށް ދަތުރުކުރަން އަހަރެން ބޭނުން،" އަންޗެލޮޓީ ބުންޏެވެ.

އަންޗެލޮޓީ ބުނީ އޭނާގެ ދަރިފުޅު، ޑޭވިޑް އަންޗެލޮޓީ ހެޑް ކޯޗަކަށްވެ، ޓީމެއްގައި މަސައްކަތް ކުރާތަން ދެކުމަކީ އޭނާގެ ހުވަފެނެއް ކަމަށެވެ. ޑޭވިޑް މިހާރު މަސައްކަތް ކުރާނީ އޭނާގެ ބައްޕަގެ އެސިސްޓެންޓް ކޯޗުގެ ގޮތުގައި ރެއާލްގަ އެވެ.