ރާއްޖެއަށް އާ ސިނާއަތްތައް ތަޢާރަފްކުރުމަކީ ގިނަ ގޮންޖެހުންތަކެއް ހުރި ކަމެއް ކަމަށާއި އެހެން ނަމަވެސް އެކަމުގައި ސަރުކާރުން ފަހަތަށް ނުޖެހޭނެކަމަށް އިޤްތިސާދީ ތަރައްޤީ އާއި ވިޔަފާރިއާ ބެހޭ ވަޒީރު މުޙައްމަދު ސައީދު މިއަދު ވިދާޅުވެއްޖެއެވެ.

އިހަވަންދިއްޕޮޅުގައި ތަރައްޤީކުރާ "މޯލްޑިވްސް އިކޮނޮމިކް ގޭޓުވޭ ޕްރޮޖެކްޓު"ގެ ޕޯޓު ތަރައްޤީކުރުމާއި، މަޝްރޫޢާ އި ގުޅުންހުރި އިތުރު މަސައްކަތްތައް ކުރުމަށް ސިންގަޕޫރުގެ ކެޕިޓަލް އޭޝިއާ އިންވެސްޓުމަންޓު ކުންފުންޏާއެކު ފްރޭމްވޯކް އެއްބަސްވުމެއްގައި ސޮއިކުރުމަށް ބޭއްވި ރަސްމިއްޔާތުގައި ސަޢީދު ވިދާޅުވީ މީގެ ފަންސާހަކަށް އަހަރު ކުރިން ރާއްޖެއަށް ފަތުރުވެރިކަން ތަޢާރަފްވެގެންދިޔައީ ވެސް ގިނަ ގޮންޖެހުންތަކާ އެކު ކަމަށެވެ. އޭރު ރާއްޖޭގައި ފަތުރުވެރިކަން ކާމިޔާބުކަމާ އެކު ނުހިންގޭނެ ކަމަށް ބުނަމުން ދިޔަ ބަޔަކުވެސް ތިބިކަން ވަޒީރު ފާހަގަކުރެއްވިއެވެ.

އެހެންނަމަވެސް މިހާރު ރާއްޖެއަކީ ފަތުރުވެރިކަމުގެ ދާއިރާގައި އެންމެ ކުރީ ސަފުގައި ގުނާލެވޭ ޤައުމެއްކަން ވަޒީރު ފާހަގަކުރެއްވިއެވެ.

ރާއްޖެއަށް އާ ސިނާއަތްތައް ތައާރަފްކުރުމަށް ގިނަ ފުރުޞަތުތަކެއް އެބަހުރި ކަމަށް ސައީދު ވިދާޅުވިއެވެ. އެހެން ނަމަވެސް މިހާ ޒަމާންވީ އިރުވެސް އެކަމަށް އަޅަން ޖެހޭ ފިޔަވަޅުތައް އަޅާފައި ނުވާކަން ވަޒީރު ފާހަގަކުރެއްވިއެވެ.

ރައީސުލްޖުމްހުރިއްޔާ ޑރ. މުހައްމަދު މުޢިއްޒުގެ ވިސްނުންފުޅު ހުރީ މި ފުރުޞަތުތަކުގެ ބޭނުން ހިފާ ރާއްޖެ ތަރައްޤީގެ އެހެން ހަރުފަތަކަށް ގެންދިޔުމަށް ކަމަށް ވިދާޅުވިއެވެ.

"އަދުގެ ސަރުކާރުން މަސައްކަތްކުރަމުންދަނީ ރާއްޖޭގެ އިޤްތިސާދަށް އާ ސިނާއަތްތައް ތައާރަފްކޮށް ރާއްޖެއަށް މާލީ ގޮތުންނާއި އިޤްތިސާދީގޮތުން ގިނަ ކުރިއެރުންތަކެއް ގެނައުމަށް. އެގޮތުން ދާދިފަހުން ރާއްޖެއަށް ވަނީ ބަންކަރިންގެ ޚިދުމަތް ތަޢާރަފްކޮށްފައި. އަދި މީގެއިތުރަށް ވެސް ތަރައްޤީގެ ބިޔަ އެތައް މަޝްރޫޢުތަކެއް ފެށުމަށް ސަރުކާރުން ދަނީ ތައްޔާރުވަމުން،" ސައީދު ވިދާޅުވި އެވެ.  

ރައީސުލްޖުމްހުރިއްޔާ ޑރ. މުހައްމަދު މުޢިއްޒުގެ ވިސްނުންފުޅު ހުރީ މި ފުރުޞަތުތަކުގެ ބޭނުން ހިފާ ރާއްޖެ ތަރައްޤީގެ އެހެން ހަރުފަތަކަށް ގެންދިޔުމަށް ކަމަށް ވެސް ވަޒީރު ސައީދު ވިދާޅުވިއެވެ.