ތައިލެންޑްގައި މިހާރު ކުރިއަށްދާ އޭޝިއަން ރައިފަލް އެންޑް ޕިސްޓޯލް ކަޕްގެ ޖޫނިއާ ކެޓަގަރީން ރާއްޖޭގެ މަރިޔަމް އީޝަލް މިސްބާހު ތާރީޚީ ރިހި މެޑެއްޔެއް ހޯދައިފިއެވެ.

މިއީ ރާއްޖޭގެ ޝޫޓިންގ ސްޕޯޓްސްގެ ތާރީޚުގައި ވެސް އޭޝިއާ ބައްރުގެ މުބާރާތެއްގައި ފައިނަލަށް ދަތުރުކޮށް، ރިހި މެޑެލް ހާސިލްކުރި ފުރަތަމަ ފަހަރެވެ.

ބެންކޮކްގައި ކުރިއަށްދިޔަ މި އިވެންޓްގެ ފައިނަލުގައި އީޝަލް އަތުން ޗައިނީޒް ޓައިޕޭގެ ލިއާއޯ ކެ ރޮންގް މޮޅުވީ ވަރަށް ކުޑަ ތަފާތަކުންނެވެ. މި ކެޓަގަރީން ރަން މެޑެލް ހޯދީ ލިއާއޯ ކެ ރޮންގް އަށް ލިބުނީ 231.2 ޕޮއިންޓްގެ ސްކޯރ އެކެވެ. އީޝަލް ދެވަނަ އަށް ދިޔައީ 229.2 ޕޮއިންޓްގެ ސްކޯރ އަކާއެކު އެވެ.

މަޖީދިއްޔާ ސްކޫލުގައި ތަޢުލީމު ހާސިލްކުރަމުން އަންނަ އުމުރުން 15 އަހަރުގެ އީޝަލް ވަނީ މި ފަހަރުގެ މުބާރާތުގެ ފައިނަލަށް ދަތުރުކުރުމުގެ ކުރިން ޤައުމީ ރެކޯޑެއް ޤާއިމުކޮށްފައެވެ. އެއީ، 561 ޕޮއިންޓްގެ ސްކޯރއެއް ހޯދައިގެންނެވެ.

މިއީ އޭޝިއާ ބައްރުގެ ބައިނަލްއަގުވާމީ ބޮޑު މުބާރާތެއްގައި ރާއްޖޭގެ އެތުލީޓަކަށް ލިބުނު ފުރަތަމަ މެޑެލްއެވެ. މި މުބާރާތުގައި މި ބައްރުގެ 23 ޤައުމުން ވާދަކޮށްފައިވެއެވެ.