ޑޮނަލްޑް ޓްރަމްޕް އެމެރިކާގެ ރައީސްކަމަށް އަލުން އިންތިޚާބުވުމާ ގުޅިގެން، އެމެރިކާގެ މާލީ ބާޒާރުތަކުގައި ފާހަގަކޮށްލެވޭ ކުރިއެރުންތަކެއް ފެނިއްޖެ އެވެ.

ވޯލް ސްޓްރީޓްގެ ހިއްސާތައް އާ ރެކޯޑްތަކެއް ހާސިލުކުރިއިރު، ޑޮލަރުގެ އަގު ވެސް ވޭތުވެދިޔަ އަށް އަހަރުގެ ތެރޭގައި ނާރާހާ މަތީ އަދަދަކަށަް އަރައިފިއެވެ.

ޓްރަމްޕްގެ އިންތިޚާބީ މެނިފެސްޓޯގައި ބިޓްކޮއިންއަށް އިސްކަންދޭނެކަމަށް ބަޔާންކޮށްފައިވުމާ ގުޅިގެން، ބިޓްކޮއިންގެ އަގުވެސް މިހާތަނަށް ނުދާ މިންވަރަށް ވަނީ އަރައިފިއެވެ.

އެމެރިކާގެ އިންތިޚާބުގެ ނަތީޖާއާ ގުޅިގެން ބުދަ ދުވަހު ދުނިޔޭގެ އެކި ކަންކޮޅުތަކުގެ މާލީ ބާޒާރުތަކުގެ ފައިސާގެ އަގުތަކަށް ފާހަގަކޮށްލެވޭ ބަދަލުތަކެއް އައިސްފައިވެއެވެ. މީގެ ތެރޭގައި:

- އެމެރިކާގެ މައި ސްޓޮކް އިންޑެކްސްތައް އުފުލުން. ޚާއްޞަކޮށް ބޭންކުތަކުގެ ހިއްސާތަކަށް ހެޔޮ ބަދަލުތަކެއް އައުން.

- ޑޮލަރުގެ އަގު ޕައުންޑް، ޔޫރޯ އަދި ޖަޕާނީ ޔެންފަދަ އެހެނިހެން ފައިސާތަކާ އަޅާބަލާއިރު 1.65 އިންސައްތަ އިތުރުވުން.

- ޕައުންޑުގެ އަގު ޑޮލަރާ އަޅާބަލާއިރު 1.16 އިންސައްތަ ދަށްވެ، އޯގަސްޓް މަހުން ފެށިގެން އެންމެ ދަށް މިންވަރަށް ވެއްޓުން.

- އިނގިރޭސިވިލާތުގެ އެފްޓީއެސްއީ 100 އިންޑެކްސް ކުޑަކޮށް ދަށްވުން.

- ޔޫރޯގެ އަގު ޑޮލަރާ އަޅާބަލާއިރު 1.89 އިންސައްތަ ދަށްވެ، ޖޫން މަހުން ފެށިގެން އެންމެ ދަށް މިންވަރަށް ވެއްޓުން.

- ޖަރުމަނުގެ ޑެކްސް އަދި ފްރާންސްގެ ސީއޭސީ 40 އިންޑެކްސްތައް ވެސް ދަށްވުން.

- ޖަޕާނުގެ ނިކެއި 225 އިންޑެކްސް 2.6 އިންސައްތަ އުފުލުން.

- ޗައިނާގެ ޝަންހާއި ކޮމްޕޯސިޓް އިންޑެކްސް 0.1 އިންސައްތަ ދަށްވިއިރު، ހޮންކޮންގްގެ ހޭންގް ސެންގް އިންޑެކްސް 2.23 އިންސައްތަ ދަށްވުން.

އިންތިޚާބީ ކެމްޕޭނުގައި ޓްރަމްޕް ވަނީ އެމެރިކާގެ ރެގިއުލޭޓަރީ އިދާރާ ކަމުގައިވާ ސެކިއުރިޓީސް އެންޑް އެކްސްޗޭންޖް ކޮމިޝަންގެ ޗެއަރ ގެރީ ގެންސްލަރ މަޤާމުން ދުރުކުރާނެ ކަމަށް ވިދާޅުވެފަ އެވެ.

މި ބަދަލުތަކުގެ ސަބަބުން އިންވެސްޓަރުންގެ މެދުގައި އުއްމީދު އާވެ، މާލީ ބާޒާރުތަކަށް އެދެވޭ ބަދަލުތަކެއް އައިސްފައިވާކަން ފާހަގަކުރެވެއެވެ. އެހެންނަމަވެސް، ބައެއް އިޤްތިޞާދީ މާހިރުން ވަނީ ޓްރަމްޕްގެ އިޤްތިޞާދީ ސިޔާސަތުތަކުގެ ސަބަބުން ދިގު މުއްދަތުގައި އިންފްލޭޝަން އިތުރުވެ، އިޤްތިޞާދީ ހަމަޖެހުމަށް ނޭދެވޭ އަސަރުކުރުމުގެ ފުރުޞަތު އޮތްކަމަށް ވެސް ފާހަގަކޮށްފައެވެ.

މި ބަދަލުތަކާ އެކު، ކުރިއަށް އޮތް ދުވަސްތަކުގައި އެމެރިކާގެ އިޤްތިޞާދީ ސިޔާސަތުތަކަށް އަންނަ ބަދަލުތަކާއި، ދުނިޔޭގެ މާލީ ބާޒާރުތަކުގެ ހަރަކާތްތައް ގާތުން ދިރާސާ ކުރަމުންދާނެއެވެ. އަދި މި ބަދަލުތަކުގެ ސަބަބުން ދުނިޔޭގެ އިޤްތިޞާދަށާއި ވިޔަފާރިތަކަށް ކުރާނެ އަސަރުތައް ވަޒަންކުރުމަށް އިޤްތިޞާދީ މާހިރުންނާއި އިންވެސްޓަރުން އަންނަނީ މަސައްކަތްކުރަމުންނެވެ.