ބެންފީކާ އަތުން ލިބުނު ހަނި މޮޅުން، ޗެމްޕިއަންސް ލީގުގައި ބަޔާން މިއުނިކްގެ ހާސްކަން ފިލައިފިއެވެ.

އަމިއްލަ ދަނޑުގައި ބަޔާން އިން ބެންފީކާ ބަލިކުރީ 1-0 އިންނެވެ. މެޗުގެ ހަމައެކަނި ލަނޑު، ދެވަނަ ހާފްގައި ހެރީ ކޭން ތަނަވަސްކޮށްދިން ފުރުޞަތެއްގައި ޖެހީ ޖަމާލް މުސިއާލާ އެވެ. ބަޔާން ޗެމްޕިއަންސް ލީގުގައި މޮޅެއް މި ހޯދީ ދެ މެޗުން ބަލިވުމަށްފަހު އެވެ. މެޗުގައި އިތުރު ލަނޑުތަކެއް ނުޖެހުނަސް ކޭން އާއި ސާޖް ގްނަބްރީގެ ފަރާތުން ރަނގަޅު އެޓޭކްތަކެއް ކުރިއެވެ. މި ސީޒަންގެ ޗެމްޕިއަންސް ލީގުގައި ބާޔާން ކުޅުނު ފުރަތަމަ މެޗުގައި 9-2 އިން ޑައިނަމޯ ޒަގްރަބް ބަލިކުރި ނަމަވެސް ޖެހިގެން އައި ދެ މެޗުގައި އެސްޓަން ވިލާ އާއި, ބާސެލޯނާ އަތުން ވަނީ ބަލިވެފައެވެ. މި މޮޅާއެކު ލީގު ފޭސް ތާވަލްގައި ބަޔާން އޮތީ 17 ވަނައިގައެވެ.

ޗެމްޕިއަންސް ލީގުގައި މި ހަފްތާގައި ވެސް އާސެނަލް އަށް ކުރިމަތިވީ ނާކާމިޔާބެވެ. އިންޓަރ މިލާން އަތުން 1-0 އިން ބަލިވީ އެވެ. އެ މެޗުގައި ވެސް އާސެނަލްގެ ކޯޗް އާޓެޓާ ގޯސްކުރީ ރެފްރީ އެވެ.