ޔޫއެފާ ޗެމްޕިއަންސް ލީގުގައި ރޭ އިންޓާ މިލާންއާ ދެކޮޅަށް ކުޅުނު މެޗުން 1-0 އިން އާސެނަލް ބަލިވެއްޖެއެވެ.

މިއީ އާސެނަލްއިން ޗެމްޕިއަންސް ލީގުގައި ބަލިވި ފުރަތަމަ ފަހަރެވެ. ރޭގެ ނަތީޖާއަކީ ބަލައިގަނެވޭނެ ފަދަ ނަތީޖާއެއް ނޫން ކަމަށް އެޓީމުގެ ކޯޗު މިކެލް އާޓެޓާވަނީ ބުނެފައެވެ. 

އިންޓައިން ރޭ ކުރި ހޯދީ ފުރަތަމަ ހާފު ނިމެން ގާތްވެފައި ވަނިކޮށް ލިބުނު ޕެނަލްޓީއެއްގެ ބޭނުން ހިފައި ހަކަން ޗަލްހަނޮގްލޫ ކާމިޔާބު ކުރި ގޯލުންނެވެ.

އާޓެޓާ ބުނީ، ޕެނަލްޓީގައި އާސެނަލްއާ ދެކޮޅަށް ރެފްރީ ނިންމި ނިންމުންތަކުގެ ސަބަބުން މެޗުގެ ނަތީޖާ ގަބޫލު ކުރަން އުނދަގޫ ކަމަށެވެ. 

މެޗުން ބަލިވި ނަމަވެސް އާޓެޓާ ބުނީ، މިއީ އާސެނަލް އިން ފާއިތުވި އަހަރުތަކުގައި ޔޫރަޕްގައި ކުޅުނު އެންމެ މޮޅު މެޗު ކަމަށެވެ. އާސެނަލް އިން ގޯލެއް ޖަހައި ނަތީޖާ ބަދަލުކޮށްލަން ގިނަ މަސައްކަތްތަކެއް ކުރި ނަމަވެސް އިންޓަގެ ޑިފެންސް ފޫއަޅުވައެއް ނުލެވުނެވެ.

މިއީ ޗެމްޕިއަންސް ލީގުގައި އާސެނަލް މިހާތަނަށް ކުޅުނު ހަތަރު މެޗުން ބަލިވި ފުރަތަމަ ފަހަރެވެ. އިނގިރޭސި ޕްރިމިއާ ލީގުގައި ވެސް އެންމެ ފަހުން އެޓީމު ކުޅުނު ތިން މެޗުން ވެސް މޮޅު ވެފައި ނުވާ އިރު، އޭގެ ތެރެއިން ދެ މެޗުން ވަނީ ބަލިވެފަ އެވެ.