ނަޓްގެ ބާވަތްތަކުގެ ތެރެއިން މީހުންގެ މަޤްބޫލުކަން ހޯދާފައިވާ އެއް ނަޓަކީ ޕިސްތާޝިއޯއެވެ. ޕިސްތާޝިއޯ ގަސް އާންމުގޮތެއްގައި ހެދެނީ ސެންޓްރަލް އޭޝިއާގެ ގައުމުތަކުގައެވެ. އޭގެ ތެރޭގައި އަފްގާނިސްތާނާއި އީރާނުފަދަ ގައުމުތައް ހިމެނެއެވެ.

ޕިސްތާޝިއޯއަކީ އޭގައި ތަފާތު ގިނަ ވައްތަރުގެ ނިއުޓްރިޝަން ހިއްސާކުރާ ނަޓެކެވެ. އޭގެތެރޭގައި ޕޮޓޭސިއަމްއާއި ފައިބާ އަދި ވިޓަމިން ބީ6 ގެ ބާވަތްތައް ހިމެނެއެވެ. ވިޓަމިން ބީ6 ގެ ބާވަތްތަކަކީ ލޭގެ ޕްރެޝަރ އެއްހަމައެއްގައި ހިފެހެއްޓުމަށް ނުހަނު މުހިންމު އެއްޗެކެވެ. އަދީ ލޭގައި ހަކުރުގެ މިންވަރު ރެގިއުލޭޓް ކޮށްދީ ހީމޯގްލޯބިން އުފެއްދުމަށް ވެސް އެހީވެދެއެވެ.

ސިއްހަތަށް ނުރައްކާތެރި ބަލިތަކުން ސަލާމަތްވުމަށް ބޭނުންވާ މުހިންމު އެންޓި އޮކްސިޑެންޓްސްތަކެއް ވެސް ޕިސްތާޝިއޯގައި ހިމެނެއެވެ. އެގޮތުން ސެލް ހަލާކުވުމުން ރައްކާތެރިކޮށްދިނުމާއި ކެންސަރުފަދަ ބަލިތަކުން ސަލާމަތްވުމަށް އެހީވެދެއެވެ. އަދި ލޮލުގެ ފެނުން ރަނގަޅުކޮށްދޭ ބާވަތެއް ކަމުގައިވާ ލިއުޓެއިން ވެސް މީގައި ހިމެނެއެވެ.

ހަޖަމްކުރުމުގެ ނިޒާމަށް މުހިންމު ބެކްޓީރިއާއެއް ކަމުގައިވާ ގަޓް ބެކްޓީރިއާ އުފެއްދުމަށް މި ނަޓް އެހީވެދެއެވެ. ޕިސްތާޝިއޯ ކެއުމުން ކާތަކެތި ފަސޭހަކަމާއެކު ހަޖަމްކޮށްދީ ފައިބާގެ ބާވަތްތަކުން ކޮންސްޓިޕޭޝަން ނުވަތަ ބަނޑުހަރުވުން ފަދަ މައްސަލަތަކަށް ހައްލެއް ގެނެސްދެއެވެ.

ބަރުދަން ލުއިކޮށްލަން ބޭނުންނަމަ ވެސް ބޭނުންކޮށްލަން މިއީ ކާލަން ބަރާބަރު ބާވަތެކެވެ. މީގައި ހިމެނޭ ފައިބަރ އާއި ޕްރޮޓީންގެ ބާވަތްތަކުން މަދުން ކެއި ނަމަވެސް މީހާ ފުރިފައި ހުންނަ ކަމަށް އިހުސާސްވެއެވެ. ނަތީޖާއެއްގެ ގޮތުން މީހާ ދުވާލެއްގެ މައްޗަށް ކާ ވަރު މަދުވެގެންދެއެވެ.

ޕިސްތާޝިއޯ ހުހަށް ކެއުމުގެ އިތުރުން ފޮނި ކާއެއްޗެތި ހެދުމަށް ވެސް ބޭނުންކުރެވެއެވެ. އެގޮތުން ޕިސްތާޝިއޯ އައިސްކްރީމާއި، ކޭކުގެ އިތުރުން ކުކީސް ވެސް ހެދެއެވެ.