މުޅި ރައްޖެއަށް ބޭންކު އޮފް މޯލްޑިވްސްގެ އޭޓީއެމް ޚިދުމަތް ފޯރުކޮށްދިނުމުގެ މަސައްކަތް ރައީސުލްޖުމްހުރިއްޔާ ޑރ. މުޙައްމަދު މުޢިއްޒު އިފްތިތާހުކޮށްދެއްވައިފިއެވެ. 

އެކަމަށްޓަކައި ޚާއްސަ އެއްބަސްވުމެއްގައި އިޤްތިސާދީ ތަރައްޤީއާއި ވިޔަފާރިއާ ބެހޭ ވުޒާރާއާއި ބޭންކު އޮފް މޯލްޑިވްސް ދެމެދު ވަނީ ސޮއިކޮށްފައެވެ.

މިއަދުގެ ރަސްމިއްޔާތުގައި ވަނީ މި މަޝްރޫޢުގެ ދަށުން އދ. އޮމަދޫގައި ބަހައްޓާފައިވާ އޭޓީއެމް އިފްތިތާހުކޮށްފައެވެ. މިއީ މި މަޝްރޫޢުގެ ދަށުން ޤާއިމުކުރި ފުރަތަމަ އޭޓީއެމްއެވެ. މި އޭޓީއެމް އިފްތިތާޙު ކޮށްދެއްވީ ރައީސުލްޖުމްހުރިއްޔާ ޑރ. މުޙައްމަދު މުޢިއްޒެވެ. މި ރަސްމިއްޔާތުގައި އިޤްތިސާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވީ، މުޅި ރާއްޖެއަށް ބީއެމްއެލްގެ އޭޓީއެމް ޚިދުމަތް ފުޅާކުރުމުގެ އިތުރުން ރައްޔިތުންގެ މާލީ ބައިވެރިވުން އިތުރުކުރުމަށް ގިނަ މަސައްކަތްތަކެއް ކުރުމަށް ރާވާފައިވާ ކަމަށެވެ.

"ޖުމްލަ 103 އޭޓީއެމް ބެހެއްޓިގެންދާނެ، މާލީ ބައިވެރިވުން އިތުރުކުރުމަށް ގިނަ މަސައްކަތްތަކެއް ކުރެވިގެންވާނެ،" ވަޒީރު ސައީދު ވިދާޅުވިއެވެ.

މި އެއްބަސްވުމުގައި އިޤްތިސާދީ ތަރައްޤީ އާއި ވިޔަފާރިއާ ބެހޭ ވުޒާރާގެ ފަރާތުން ސޮއިކުރެއްވީ ވަޒީރު މުޙައްމަދު ސައީދެވެ. އަދި ބޭންކު އޮފް މޯލްޑިވްސް، ބީއެމްއެލްގެ ފަރާތުން ސޮއިކުރެއްވީ ޗީފް އެގްޒެކެޓިވް އޮފިސަރ މުޙައްމަދު ޝަރީފެވެ.

މި ރަސްމިއްޔާތުގައި ބީއެމްއެލްގެ ޗީފް އެގްޒެކެޓިވް އޮފިސަރ މުޙައްމަދު ޝަރީފު ވިދާޅުވީ، އަންނަ އަހަރު ނިމެންވާއިރަށް ރާއްޖޭގައި މީހުން ދިރިއުޅޭ ހުރިހާ ރަށެއްގައި ބީއެމްއެލްގެ ޚިދުމަތް ދިނުމުގެ ލަނޑުދަނޑި ހާސިލްކުރެވިގެންދާނެ ކަމަށެވެ.

"މިހާރު ޖުމްލަ 90 ރަށުގައި ޖުމްލަ 150 އޭޓީއެމްގެ ޚިދުމަތްދަނީ ދެމުން، އަންނަ އަހަރު 100 އަށްވުރެ ގިނަ ރަށުގައި އޭޓީއެމް ބަހައްޓާ ނިންމުމަކީ އަމާޒެއް، މި ޚިދުމަތް ކުރިއަށްދާނީ ފިޔަވަހިތަކަކަށް ބަހާލައިގެން،" ޝަރީފް ވިދާޅުވިއެވެ.

ޝަރީފް ވިދާޅުވީ، ފުރަތަމަ ފިޔަވަހީގައި 17 ރަށުގައި އޭޓީއެމް ބެހެއްޓުމަށް ނިންމާފައިވާ ކަމަށެވެ. އަދި މި 31 މާރޗު 2025ގެ ނިޔަލަށް އެ 17 އޭޓީއެމް ބެހެއްޓުމަށް ނިންމާފައިވާކަމަށެވެ. އަދި އަންނަ އަހަރު ނިމޭއިރު، އޭޓީއެމްތަކުގެ އަދަދު 250 އަށްވުރެ ގިނަ ވާނެ ކަމަށް ޝަރީފް ވިދާޅުވިއެވެ