ގިނަ ބައެއްގެ މަޤްބޫލުކަން ހޯދި ބޮލީވުޑްގެ މަޝްހޫރު ފިލްމް "ވީރް ޒާރާ" އަށް 20 އަހަރު ފުރުމުގެ މުނާސަބަތުގައި އެ ފިލްމް ރީ ރިލީޒްކުރުމަށް މިއަދު ނިންމައިފިއެވެ.

ޝާހްރުކް ޙާން އާއި ޕްރިތީ ޒިންތާ ލީޑު ރޯލު އަދާކުރި ލޯބީގެ މި ފިލްމު ޕްރިމިއާ ކުރީ 12 ނޮވެމްބަރ 2004 ގައެވެ. "ވީރް ޒާރާ" އަކީ ބޮލީވުޑްގެ އެންމެ މަޝްހޫރު ފިލްމުތަކުގެ ތެރޭގައި ހިމެނޭ ފިލްމެކެވެ. އަދި ފިލްމް އުފެއްދި އަހަރު އެންމެ ބޮޑު އާމްދަނީއެއް ހޯދި ފިލްމުވެސްމެއެވެ.

އެންމެ 23 ކްރޯޑް ރުޕީސް (2.7 މިލިއަން ޑޮލަރު)ގެ ބަޖެޓަކުން އުފެއްދި މި ފިލްމަށް ވަނީ ބޮކްސް އޮފީހުގައި 98 ކްރޯޑް ރުޕީސް (11.6 މިލިއަން ޑޮލަރު) ލިބިފައެވެ. އެއީ އޭރު ފިލްމުތައް އުފައްދައިގެން ލިބޭ އާމްދަނީއަށް ބަލާއިރު ވަރަށް ބޮޑު އަދަދެކެވެ.

ފިލްމު ގެނެސްދިން ޔަޝް ރާޖް ފިލްމްސް އިން ވަނީ، ފިލްމަށް 20 އަހަރު ފުރޭތީ އަނެއްކާވެސް ފިލްމް ސިނަމާތަކުގައި ދައްކަން ނިންމައިފައެވެ. އަދި މި ފިލްމް އިންޑިއާގެ އިތުރުން ދުނިޔޭގެ އެކި ގައުމުތައް ހިމެނޭ ގޮތަށް 600 ސްކްރީނުގައި އަޅުވަން ތާވަލުކޮށްފައެވެ.

ސައުދީ އަރަބިއްޔާ އާއި އޮމާން އަދި ޤަތަރު ވެސް މިފަހަރު މި ފިލްމު އަލަށް ދައްކާ ޤައުމުތަކުގެ ތެރޭގައި ހިމެނެއެވެ.

ކުރީގެ ކުޅަދާނަ ޑައިރެކްޓަރު ޔަޝް ޗޯޕްރާ ޑައިރެކްޓްކުރި މި ފިލްމުގައި ދައްކަނީ އިންޑިއާގެ ސިފައިންގެ ތެރޭގައި މަސައްކަތްކުރާ މީހަކާއި ޕާކިސްތާނުގެ އަންހެން ކުއްޖަކު ދިމާވެ، އެ ދެމީހުންގެ މެދުގައި ލޯބީގެ ގުޅުމެއް އުފެދޭ ހިސާބުން ހިނގާ ކަންތައްތަކެވެ. އެ އަންހެން ކުއްޖާއަކީ ޕާކިސްތާނުގެ ނުފޫޒުގަދަ ސިޔާސީ ލީޑަރެއްގެ ދަރިއެކެވެ. އަންހެން ކުއްޖާގެ އާއިލާއިން އެ ގުޅުމަށް ނުރުހެއެވެ. އެހެންވެ، އެ ދެމީހުން ދުރުކުރުމަށް ކުރާ ކަންކަމުގެ ތެރޭގައި ހިނގާ ބެލުންތެރިން ރޮއްވާލައި އެތައް ކަމެއް މި ފިލްމުގައި ދައްކައެވެ.

"ވީޒް ޒާރާ"ގެ ސްކްރީންޕްލޭ ޔަޝް ޗޯޕްރާގެ ދަރިފުޅު އަދިތުޔަ ޗޯޕްރާ ލިޔެފައިވާއިރު، ޝާހު ރުކް އާއި ޕްރިތީއާ އެކު މި ފިލްމުގައި ދެން ފެނިގެންދަނީ ރާނީ މުކަރްޖީ، އަމީތާބް ބައްޗަން، ހެމާ މާލިނީ، ދިވްޔާ ދައްތާ، ބޯމަން އިރާނީ، ކިރަން ކޭރް، އަނުޕާމް ކޭރް، މަނޯޖް ބަޖްޕާއީ އަދި ޒޮހްރާ ސޭގަލް އެވެ.