އެޕަލް ކުންފުނީގެ އެންމެ މުހިއްމު އުފެއްދުންކަމަށްވާ އައިފޯނު ވިކޭ މިންވަރު ދަށްވި ނަމަވެސް އެ ކުންފުންޏަށް ލިބުނު އާމްދަނީ އިތުރުވެފައިވާކަން އެ ކުންފުނީގެ މާލީ ހިސާބުތަކުން ދައްކައިފިއެވެ. 

ބުރާސްފަތިދުވަހު އެ ކުންފުނިން އާންމުކުރި ހިސާބުތަކަށް ބަލާއިރު 2024 ވަނަ އަހަރު އެ ކުންފުންޏަަށް ވިއްކުނީ 69.14 ބިލިއަން ޑޮލަރުގެ އައިފޯނެވެ. އެއީ އޭގެ ކުރީ އަހަރަށްވުރެ 0.8 އިންސައްތަ މަދު އަދަދެކެވެ. އަދި 2022 ވަނަ އަހަރަށްވުރެ 3.5 އިންސައްތަ ދަށް އަދަދެކެވެ. 

އައިފޯނު ވިކުނު މިންވަރު ދަށްވި ނަމަވެސް އެޕަލް މިއުޒިކާއި އެޕަލް ޓީވީ+ ފަދަ ޚިދުމަތްތަކުން ލިބުނު އާމްދަނީ އިތުރުވުމުގެ ސަބަބުން އައިފޯނު ވިއްކަައިގެން ލިބުނު އާމްދަނީ ދަށްވުމުގެ އުނިކަން ކުންފުނީގެ ޖުމްލަ އާމްދަނީއަށް އައިސްފައިނުވެއެވެ. 

މާލީ ހިސާބުތަކަށް ބަލާއިރު 2024 ވަނަ އަހަރުގެ ފަހު ކުއާޓާގައި އެ ކުންފުންޏަށް ލިބުނު އާމްދަނީ ހަތަރު އިންސައްތަ އިތުރުވެފައިވެއެވެ. އަދި އެ މުއްދަތުގައި އެ ކުންފުންޏަށް ލިބުނު ސާފު ފައިދާ ހަތް އިންސައްތަ އިތުރުވެ 36.33 ބިލިއަން ޑޮލަރަށް އަރާފައިވެއެވެ. އެއީ އޭގެ ކުރީ ކުއާޓާގައި ޔޫރަޕުގެ ރެގިއުލޭޓަރުންނަށް އެތައް ބިލިއަން ޑޮލަރެއް ޖޫރިމަނާގެ ގޮތުގައި ދައްކަންޖެހުމުން ފައިދާ ދަށަށްދިޔަ ދިއުމުން އަރައިގަނެވުނު ކަމުގެ އަލާމާތެކެވެ. 

މި ނަތީޖާތަކަށް ބަލާއިރު ވޯލް ސްޓްރީޓުގެ މުހައްލިލުން ކުރިން އަންދާޒާކުރެއްވި 124.4 ބިލއިަން ޑޮލަރުގެ އާމްދަނީ ނުލިބުނު ނަމަވެސް ފައިދާގެ ގޮތުގައި ލިބޭނެކަމަށް އެ ބޭފުޅުން އަންދާޒާކުރެއްވި 35.62 ބިލިއަން ޑޮލަރަށްވުރެ ބޮޑު ފައިދާއެއް އެޕަލްއަށް އެ ކުއާޓާގައި ލިބުނެވެ. 

އައު ފީޗާއެއްގެ ގޮތުގައި އެޕަލް އިންޓެލިޖެންސްގެ ނަންދީފައިވާ އާޓިފިޝަލް އިންޓެލިޖެންސް ތައާރަފުކުރާނެކަން ވަރަށް ބޮޑަށް އިޝްތިހާރުކުރި ނަމަވެސް ސެޕްޓެންބަރު މަހު އެޕަލްއިން އައު އައިފޯނު ނެރުނީ އެ ފީޗާ ނުހިމަނައެވެ. އެމެރިކާގައި އައިފޯނު ގަތް މީހުންނަށް އެ ފީޗާ ލިބުނީ ފޯނު ނެރުނުތާ މަސްދުވަސް ފަހުންނެވެ. އިނގިރޭސިން ވާހަކަދައްކާ އެހެނިހެން ޤައުމުތަކަށް އޭގެ ދުވަސްކޮޅެއް ފަހުން އެފީޗާ ލިބުނެވެ. 

އެޕަލްގެ ދެވަނައަށް އެންމެ މުހިއްމު ބާޒާރަކީ ޗައިނާކަމަށްވާއިރު މިހާތަނަށްވެސް އެ ޤައުމުގައި އެޕަލް އިންޓެލިޖެންސް ތައާރަފުކޮށްފައިނުވެއެވެ. ޗައިނާގެ ބާޒާރުގައި އެޕަލްގެ ހިއްސާ ފާއިތުވި އަހަރު 2.4 އިންސައްތަ ދަށްވެފައިވާކަމަށް މާކެޓު ދިރާސާކުރާ ފަރާތްތަކުން އަންދާޒާކުރެއެވެ.