ދެވަނަ ވެޓަރަންސް ކެރަމް ޗެމްޕިއަންޝިޕްގެ އޯޕަން ސިންގަލްސް އިވެންޓުގެ ޗެމްޕިއަންކަން އަހުމަދު ހާމިދު ކާމިޔާބުކޮށްފިއެވެ.

މާލޭ ކެރަމް ހޯލްގައި ކުރިއަށްދިޔަ މި ފަހަރުގެ މުބާރާތުގައި ރޭ ކުޅުނު އޯޕަން ސިންގަލްސް ފައިނަލުގައި ހާމިދު ވަނީ 2-1 ސެޓުން އިބްރާހިމް ލިފާއު ބަލިކޮށްފައެވެ.

މި މެޗުގެ ފުރަތަމަ ސެޓުން 22-20 އިން ހާމިދު ކުރިހޯދާފައިވަނިކޮށް، ލިފާއު ވަނީ ދެވަނަ ސެޓުގައި 15-05 އިން ކާމިޔާބުކޮށްފައެވެ. ވާދަވެރިކޮށް ފެނިގެންދިޔަ ތިންވަނަ ސެޓުން ހާމިދު ކުރި ހޯދީ 24-22 އިންނެވެ.

މުބާރާތުގެ ތިންވަނަ ހޮވުމަށް ކުޅުނު މެޗުގައި، ވެޓަރަންސް ކެރަމް ޗެމްޕިއަންޝިޕްގެ ފުރަތަމަ ޗެމްޕިއަން، އަބްދުﷲ އިސްމާއިލް ވަނީ ސީދާ ދެ ސެޓުން ސަރާހް ބަލިކޮށްފައެވެ. މި މެޗުގެ ސެޓުތައް އަބްދުﷲ އިސްމާއިލް ކާމިޔާބުކުރީ 25-07، 22-17 އިންނެވެ.

އޯޕަން ސިންގަލްސް ޗެމްޕިއަންކަން ހޯދާ ފަރާތަކަށް ޢުމްރާ ދަތުރެއް ދޭ ގޮތަށް ހަމަޖެހިފައިވާ މި މުބާރާތުގެ އިނާމުދިނުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ އަންނަ ބުދަ ދުވަހުގެ ރޭ ހުޅުމާލޭ ކެރަމް ހޯލުގައެވެ.