އިންސްޓިޓިއުޓް އޮފް ޗާޓަޑް އެކައުންޓެންޓްސް އޮފް ދަ މޯލްޑިވްސް (އައި.ސީ.އޭ.އެމް) އަށް އިންޓަނޭޝަނަލް ފެޑެރޭޝަން އޮފް އެކައުންޓެންޓްސް (އައި.އެފް.އޭ.ސީ) ގެ މެމްބަރުކަން ރާއްޖެ އަށް މިއަދު ލިބިއްޖެއެވެ.

އޮޑިޓަރ ޖެނެރަލް ޙުސައިން ނިޔާޒީ އަދި އައި.ސީ.އޭ.އެމްގެ ރައީސް މުޙައްމަދު ޙަލީމް ޢަބްދުﷲ އަށް މި ކާމިޔާބީ ހޯދުމުން މަރުޙަބާ ވިދާޅުވެ، އިކޮނޮމިކް މިނިސްޓްރީން ވަނީ މި ކަމަކީ އެކައުންޓިން ދާއިރާގައި ބައިނަލްއަޤްވާމީ މިންގަނޑުތަކާއި، ހާމަކަން ބޮޑު ގޮތެއްގައި މަސައްކަތްކުރުމާއި، އިންސާފުވެރިކަން ދެމެހެއްޓުމަށް އައި.ސީ.އޭ.އެމްގެ ފަރާތުން ކުރަމުންދާ މަސައްކަތްތައް އިތުރަށް ހަރުދަނާވެގެންދާނެ ކަމެއް ކަމުގައި ފާހަގަކޮށްފައެވެ.

ރާއްޖޭގެ އިޤްތިޞާދު ތަފާތު ދާއިރާތަކަށް ފުޅާވަމުންދާއިރު، ޚާއްޞަކޮށް މާލީ ޚިދުމަތްތަކުގެ ދާއިރާ ކުރިއަރަމުންދާއިރު، އެކައުންޓިން ދާއިރާއިން މުހިންމު ދައުރެއް އަދާކުރާނެ ކަމަށް މިނިސްޓްރީން ބުނެފައިވެއެވެ.

ނަވާރަ ސަތޭކަ ހަތްދިހަ ހަތްވަނަ އަހަރު ޖަރުމަނުވިލާތުގެ މިއުނިކްގައި އުފެއްދި އައި.އެފް.އޭ.ސީ އަކީ މިހާރު 118 ޤައުމެއްގެ 155 މެމްބަރުން ހިމެނޭ، 2.5 މިލިއަނަށްވުރެ ގިނަ އެކައުންޓެންޓުން ތަމްސީލުކުރާ ޖަމްޢިއްޔާއެކެވެ. މި ޖަމްޢިއްޔާއިން އޮޑިޓިން، ކޮލިޓީ ކޮންޓްރޯލް، ތަޢުލީމު، ޕަބްލިކް ސެކްޓަރ އެކައުންޓިން އަދި ޕްރޮފެޝަނަލް އެކައުންޓެންޓުންގެ އަޚްލާޤީ މިންގަނޑުތައް ކަނޑައެޅުމުގެ މަސައްކަތް ކުރެއެވެ.

އައި.ސީ.އޭ.އެމް އައި.އެފް.އޭ.ސީގެ މެމްބަރަކަށްވުމާއެކު، ބައިނަލްއަޤްވާމީ މިންގަނޑުތަކަށް ތާއީދުކުރުމާއި، މުސްތަޤްބަލަށް ތައްޔާރުވެފައިވާ ޕްރޮފެޝަނަލުން ތައްޔާރުކުރުމާއި، ދުނިޔޭގެ ފެންވަރުގައި އަޑުއުފުލުމުގެ ފުރުޞަތު ލިބެއެވެ

.