ފުޓްބޯޅައިގެ މައި އިދާރާއިން (ފީފާ) އިން ކުރި ދެ މެޗުގެ ސަސްޕެންޝަނަށް ފަހު އާޖެންޓިނާގެ އެއްވަނަ ގޯލް ކީޕަރު އެމިލިއާނޯ މާޓިނޭޒް އެނބުރި ޤައުމީ ޓީމާ ގުޅިއްޖެއެވެ.

މި މަހުގެ 14 ވަނަ ދުވަހު އާޖެންޓީނާ އިން ވޯލްޑް ކަޕް ކޮލިފައިންގައި ކުޅުމަށް ހަމަޖެހިފައިވާ މެޗަށް މާޓިނޭޒް އެނބުރި ޓީމާ ގުޅިފައިވާއިރު، ފީފާއިން މާޓީނޭޒް ސަސްޕެންޑްކޮށްފައި ވަނީ ކުޅިވަރުގެ އަޚްލާޤީ މިންގަނޑާ ޚިލާފުވުމާ ގުޅިގެންނެވެ.

އާޖެންޓީނާގެ ގޯލް ކީޕަރު އެމިލިއާނޯ މާޓިނޭޒް

ޗިލީ އާ ދެކޮޅަށް އާޖެންޓީނާއިން ކުޅުނު މެޗުގައި ކޮޕާ އެމެރިކާ ޓްރޮފީއާއެކު އަމަލު ކުރި ގޮތުންނާއި ކޮލޮމްބިއާ އަތުން އާޖެންޓީނާ ބަލިވި މެޗުގައި ނޫސްވެރިއެއްގެ ކެމެރާގައި ޖެހި މައްސަލައިގައި ފީފާ އިން ވަނީ މާޓިނޭޒް ދެ މެޗަށް ސަސްޕެންޑް ކޮށްފަ އެވެ. އެހެން ކަމުން އާޖެންޓީނާ އިން އެންމެ ފަހުން ކުޅުނު ދެ މެޗު ކުޅުނީ މާޓިނޭޒްއާ ނުލައެވެ.

އާޖެންޓީނާގެ ފުލް ސްކޮޑުގައި މާޓީނޭޒް ހިމަނާފައިވާ އިރު، ވެލެންސިޔާގެ މިޑްފިލްޑަރު އެންޒޯ ބެރެނެކިއާ އަށް ވެސް ކޯޗު ލަޔޮނެލް ސްކަލޯނީ ވަނީ ފުރުސަތު ދީފައެވެ. އަދި އަލެހަންދުރޯ ގާނާޗޯ އާއި ނިކޮލަސް ޕޭޒްގެ އިތުރުން ފަކުންޑޯ ބޮނަނެޓޭ އަށްވެސް ސްކަލޯނީ ވަނީ ޖާގަ ދީފައެވެ.

ވޯލްޑްކަޕް ކޮލިފައިންގައި މި މަހުގެ 14 ވަނަ ދުވަހު ކުޅޭ މެޗުގައި އާޖެންޓީނާ ނުކުންނާނީ ރަށުން ބޭރުގައި ޕެރެގުއޭއާ ދެކޮޅަށެވެ. އަދި އޭގެ ފަސް ދުވަސް ފަހުން ނުކުންނާނީ އަމިއްލަ ޤައުމުގައި ޕެރޫއާ ދެކޮޅަށެވެ. އާޖެންޓީނާ އިން މި ދެ މެޗުގައި ވެސް ނުކުންނާނީ ލަޔޮނެލް މެސީގެ ކެޕްޓަންކަމުގެ ދަށުންނެވެ.