އާމްދަނީ އިތުރުކޮށް މޯލްޑިވްސް ޙައްޖު ކޯޕަރޭޝަނަކީ ފައިދާވާ ކުންފުންޏަކަށް ހެދުމަށް ކުރަމުންދާ މަސައްކަތްތަކުގެ ތެރޭގައި ހިމަނައިގެން ކ. މާފުށީގައި ސިޓީ ހޮޓަލެއް އެޅުމަށް ނިންމާފައިވާކަމަށް އެ ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލް ވިދާޅުވެއްޖެއެވެ.

"ހަލާލް ޓުވަރިޒަމް ތަޢާރަފްކޮށް މާފުށީގައި ސިޓީ ހޮޓަލެއް ހިންގުމަށް މާފުށީ ކައުންސިލްގެ ކުންފުންޏާއި ކޯޕަރޭޝަނާ ގުޅިގެން ސަބްސިޑަރީ ކުންފުންޏެއް އުފެއްދުމުގެ މަސައްކަތް ދަނީ ކުރަމުން. އިންވެސްޓްކުރާނެ ފަރާތްތަކެއްވެސް އެޕްރޯޗްކޮށްފައިވަނީ." ޙައްޖު ކޯޕަރޭޝަނަށް ބޭރުފައިސާ ހޯދުމުގެ ޕްލޭނާ ބެހޭ ގޮތުން ވާހަކަ ދައްކަވަމުން ޝަކީލް ވިދާޅުވިއެވެ.

ޝަކީލް މިހެން ވިދާޅުވީ ރައްޔިތުންގެ މަޖިލީހުގެ ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީގައި މެންބަރުން ކުރެއްވި ސުވާލުތަކަށް ޖަވާބުދެއްވަމުންނެވެ. ޙައްޖު ކޯޕަރޭޝަންގެ ކުރިމަގާ ގުޅޭގޮތުން ފުވައްމުލަކު މެދު ދާއިރާގެ މެންބަރު އަލީ ފަޒާދު ސުވާލުކުރެއްވި ސުވާލަށް ޖަވާބުދެއްވަމުން ޙައްޖު ކޯޕަރޭޝަންގެ މެނޭޖިން ޑިރެކްޓަރ މުޙައްމަދު ޝަކީލް ވިދާޅުވީ އަދުގެ ސަރުކާރުގެ އަމާޒަކީ ޙައްޖު ކޯޕަރޭޝަނަކީ ފައިދާވާ ކުންފުންޏަކަށް ހަދައި، ޙައްޖަށް މީހުން ގެންދިއުމަށް ނަގާ އަގު ކުޑަކުރުން ކަމަށެވެ.

އެގޮތުން އާމްދަނީ އިތުރުކުރުމަށް ރިއަލް އެސްޓޭޓް ވިޔަފާރީގެ ދާއިރާއަށް ވަނުމަށް ނިންމާފައިވާކަމަށް ޝަކީލް ވިދާޅުވިއެވެ.އެގޮތުން ހުޅުމާލޭގައި ލަގްޒަރީ ފެންވަރުގެ އެޕާޓްމަންޓުތަކެއް ތަރައްޤީކޮށް، އެތަން ވިއްކުމަކީ އަމާޒެއްކަމަށާއި މިހާރު އެ އެޕާޓްމަންޓުތައް ކުރެހުމުގެ މަސައްކަތްކުރަމުންދާކަން ފާހަގަ ކުރެއްވިއެވެ.