އަންނަ ހަފުތާގައި މެންޗެސްޓާ ޔުނައިޓެޑާ ހަވާލުވާން ނިންމާފައިވާ ރުބެން އަމޯރިމްގެ އިރުޝާދުގެ ދަށުން ޗެމްޕިއަންސް ލީގުގައި ސްޕޯޓިން ލިޒްބަން ރޭ ކުޅުނު މެޗު ޔުނައިޓެޑާ ވާދަވެރި މެންޗެސްޓާ ސިޓީ 4-1 އިން ބަލިކޮށްފިއެވެ.

މި ނަތީޖާއާ އެކު އަމޯރިމް މި ވަނީ ޔުނައިޓެޑާ ހަވާލުވުމުގެ ކުރިން ފުރަތަމަ އިމްތިހާނުން ފުލް މާކްސް ލިބިފައި  ކަމަށް ގިނަ ބަޔަކު ޤަބޫލުކުރެއެވެ. އަމޯރިމް ވެސް ވަނީ އިންގްލެންޑުގެ އެންމެ ވަރުގަދަ ޓީމު އަތުން އޭނާ އަށް މޮޅުވެވިއްޖެ ނަމަ ޔުނައިޓެޑުގެ ސަޕޯޓަރުންގެ އުއްމީދު މަތިވާނެ ކަމަށް ކުރިން ބުނެފަ އެވެ. ނަމަވެސް ރޭގެ މެޗަށް ފަހު އޭނާ ބުނީ މި ނަތީޖާ އަކީ، ޔުނައިޓެޑުގައި އޭނާ ކާމިޔާބުވާނެ ކަމުގެ ޔަގީންކަމެއް ނޫން ކަމަށެވެ.

އަނެއްކޮޅުން މިއީ ޕްރިމިއާ ލީގާއި، ޗެމްޕިއަންސް ލީގު ހިމަނައިގެން އެ ޓީމު ވިދިވިދިގެން ބަލިވި ތިން ވަނަ މެޗެވެ. ސިޓީ އެންމެ ފަހުން މިގޮތަށް ސިލްސިލާކޮށް ބަލިވީ 2018 ގަ އެވެ. ސިޓީގެ ކެޕްޓަން ބެނާޑޯ ސިލްވާ ބުނީ އެ ޓީމަށް މިއީ އަނދިރި ދުވަސްތަކެއް ކަމަށެވެ.

އެކަމަކު ސިޓީގެ ކޯޗު ޕެޕް ގާޑިއޯލާ ބުނީ ސިލްވާ ސިފަކުރިހާ ހާލަތު ގޯސް ނޫން ކަމަށާއި އެހެންވިޔަސް މި ގޮންޖެހުމާ ވެސް ކުރިމަތިލާން ތައްޔާރު ކަމަށެވެ.

"ފެށިއިރު ވެސް އެނގޭ މިއީ އުނދަގޫ ސީޒަނަކަށް ވާނެކަން. އަހަރެމެން ބޭނުން މި ގޮންޖެހުމާ ކުރިމަތިލައި ކުޅުންތެރިން މިކަމުން އަރައިގަތުމަށް އެހީވެދޭން،"

އަންނަ ހަފުތާ އިން ފެށިގެން ޕެޕް ގާޑިއޯލާގެ ވާދަވެރި ކޯޗެއްގެ ގޮތުގައި މަސައްކަތްކުރާނެ އަމޯރިމް ވަނީ މި މެޗުން މޮޅުވިޔަސް ގާޑިއޯލާ އަށް އިހުތިރާމް އަދާކޮށްފަ އެވެ. އަމޯރިމް ބުނީ ގާޑިއޯލާ އަކީ އޭނާއާ ބަލާއިރު އެތައް ގޮތަކުން މޮޅެއް ކޯޗެއް ކަމަށާއި ޔުނައިޓެޑުގައި އޭނާ ފަށާނީ އެންމެ ތިރިން ކަމަށެވެ.

ސްޕޯޓިންގެ އެސްޓޭޑިއޯ ހޯސޭ އަލްވަލަޑޭގައި ރޭ ކުޅުނު މެޗުގެ ހަތަރު ވަނަ މިނެޓުގައި ފިލް ފޮޑެންގެ ގޯލުން ސިޓީ ލީޑު ނެގުމާ އެކު ބެލެވުނީ އެ ޓީމު ފަސޭހަކަމާ އެކު މޮޅުވާނެ ކަމަށެވެ. ސްޕޯޓިން އިން އެއްވަރުކުރީ ފުރަތަމަ ހާފު ނިމެނިކޮށް ވިކްޓަ ގްޔޫކެރެސްގެ ގޯލުންނެވެ. ދެ ވަނަ ހާފު ފަށައިގެން ފުރަތަމަ މިނެޓުގައި ސްޕޯޓިންގެ މެކްސިމިލިއާނޯ އަރަހުއޯ އެ ޓީމަށް ކުރި ހޯދައިދިނެވެ. އެ ޓީމުގެ އަނެއް ދެ ލަނޑު ޕެނަލްޓީން ކާމިޔާބުކުރީ ސްވިޑަންގެ ގްޔޫކެރެސް އެވެ.

މި މޮޅާ އެކު 10 ޕޮއިންޓް ހަމަކޮށް ސްޕޯޓިން އޮތީ ޗެމްޕިއަންސް ލީގުގެ ގްރޫޕުގެ ދެ ވަނައިގަ އެވެ. އެއް ވަނައިގައި 12 ޕޮއިންޓާ އެކު އޮތީ ރޭ ބެޔާ ލެވަކޫސަން އަތުން 4-0 އިން މޮޅުވި ލިވަޕޫލެވެ. ސިޓީ އޮތީ ހަތް ޕޮއިންޓާ އެކު ހަ ވަނައިގަ އެވެ.