އިނގިރޭސި ޕްރިމިއަރ ލީގުގައި ރޭ ކުޅުނު މެޗުގައި ވުލްވްސް 3-1 އިން ބަލިކޮށް، ޗެލްސީގެ މޮޅުނުވުމުގެ ސިލްސިލާ ނިމުމަކަށް ގެނެސްފިއެވެ.

މިއީ ލީގުގައި ޗެލްސީ އެންމެ ފަހުން ކުޅުނު ހަ މެޗުގެ ތެރެއިން މޮޅުވި ފުރަތަމަ ފަހަރެވެ. ދެ މެޗުން ބަލިވިއިރު، ތިން މެޗުން ވަނީ އެއްވަރުވެފައެވެ.

ސްޓެމްފޯޑް ބްރިޖްގައި ރޭ ކުޅުނު މެޗުގައި ޗެލްސީގެ ލަނޑުތައް ޖަހައިދިނީ ޓޮސިން އަޑަރާބިއޮޔޯ، މާކް ކުކުރޭޔާ އާއި ނޮނީ މަޑުއެކޭ އެވެ.

މި މެޗުގައި ވުލްވްސް އިން ކާމިޔާބުކުރި ހަމައެކަނި ލަނޑު ޖަހައިދިނީ މެޓް ޑޮހާޓީ އެވެ.

މި ނަތީޖާއާއެކު، ޗެލްސީ ވަނީ ތާވަލްގެ ހަތަރުވަނަ އަށް ޖެހިލައިފައެވެ. ޗެލްސީ އަށް ކުޅުނު 22 މެޗުން ލިބިފައިވަނީ 40 ޕޮއިންޓެވެ. ލީގުގެ އެއްވަނައިގައި އުޅޭ ލިވަޕޫލާއި ޗެލްސީއާ ދެމެދު 10 ޕޮއިންޓުގެ ފަރަގެއް އޮތްއިރު، ދެވަނައިގައި އޮތް އާސެނަލްގެ އިތުރުން ތިންވަނައިގައި އުޅޭ ނޮޓިންގހަމް ފޮރެސްޓަށް 22 މެޗުން ލިބިފައިވަނީ 44 ޕޮއިންޓެވެ.

ވުލްވްސް އޮތީ 17 ވަނައިގައެވެ. ރެލިގޭޝަނަށްވުރެ މަތީގައި އެ ޓީމު އޮތީ ފައިދާ ގޯލްގެ ތަފާތުންނެވެ. ވުލްވްސްގެ އިތުރުން މި ވަގުތު 18 ވަނައިގައި އޮތް އިޕްސްވިޗް ޓައުނަށް ވެސް 22 މެޗުން ލިބިފައިވަނީ 16 ޕޮއިންޓެވެ.

ލީގުގައި ޗެލްސީ އަށް ދެން އޮތީ މި މަހުގެ 25 ވާ ހޮނިހިރު ދުވަހު ރަށުން ބޭރުގައި، އެންމެ ފަހުގެ ޗެމްޕިއަން، މެންޗެސްޓަރ ސިޓީއާ ދެކޮޅަށް ކުޅެން ޖެހޭ މެޗެވެ.