ކްރައުން އެންޑް ޗަމްޕާ ރިސޯޓްސްގެ ޗީފް އެގްޒެކްޓިވް އޮފިސަރު (ސީއީއޯ) ގެ މަގާމަށް މުހައްމަދު ސޮލާހު މިއަދު ހަމަޖައްސައިފި އެވެ.

މިއީ ރާއްޖޭގެ ޓޫރިޒަމްގެ އެންމެ ބޮޑު އެއް ކުންފުނީގެ ސީއީއޯގެ މަގާމަށް ދިވެއްސަކު ހަމަޖެއްސި ފުރަތަމަ ފަހަރެވެ. ނުވަ ރިސޯޓް ހިންގާ އެ ކުންފުނީގެ އެންމެ އިސް މަގާމު މީގެ ކުރިން ފުރުއްވަމުން ގެންދެވީ ކުންފުނީގެ ހިއްސާ އޮންނަ ބިދޭސީންނެވެ.

ޗަމްޕާ ކުންފުނީގެ ޗީފް އޮޕަރޭޓިން އޮފިސަރު (ސީއޯއޯ) ގެ މަގާމުގައި މިދިޔަ ދެ އަހަރު ހުންނެވި ސޮލާހު ވަނީ ރާއްޖެ އާއި ރާއްޖޭން ބޭރުގެ ޓޫރިޒަމް ދާއިރާގެ އިސް މަގާމުތައް އަދާކުރައްވައިފަ އެވެ. އޭގެ ތެރޭގައި ދުބާއީގެ ދެ ކުންފުންޏެއްގައި ވެސް އޭނާ ވަނީ މަސައްކަތް ކުރައްވައިފަ އެވެ.

ހއ. ދިއްދު އަށް އުފަން ސޮލާހުގެ ޓޫރިޒަމް ކެރިއަރު ފެއްޓެވީ ވެސް ޗަމްޕާ ކުންފުނީގެ ކުޑައިގެ ދަށުން ހިންގާ މީރު އައިލެންޑް ރިސޯޓުގެ ވަރަށް އާދައިގެ ވަޒީފާއަކުންނެވެ. 

ޓޫރިޒަމް ދާއިރާގައި 20 އަހަރަށް ވުރެ ގިނަ ދުވަހު ޚިދުމަތް ކުރެއްވި ސޮލާހާ ގުޅޭ ގޮތުން ޗަމްޕާ ކުންފުނިން ނެރުނު ބަޔާނުގައި ބުނީ އެއީ އެ ކުންފުންޏަށް ވަރަށް ބޮޑެތި ކުރިއެރުންތައް ގެނެސް ދެއްވި ބޭފުޅެއް ކަމަށާއި ކުރިމަގުގައި ވެސް ކުންފުނި އާ ހަރުފަތަކަށް ގެންދާނެ ކަމުގެ އުއްމީދު އޮތް ބޭފުޅެއް ކަމަށެވެ.