ވިޔަފާރިތަކަށް ޚާއްސަކޮށްގެން މާސްޓަރ ކާޑް ބިޒްނަސް ޕްރީޕެއިޑް ކާޑް ބޭންކް އޮފް މޯލްޑިވްސްްއިން ތަޢާރަފްކޮށްފިއެވެ.

ބީއެމްއެލްއިން ބުނެފައިވާގޮތުން ވިޔަފާރިތަކުން ދުވަހުން ދުވަހަށް ކުރަންޖެހޭ ފައިސާގެ މުޢާމަލާތްތައް ބެލެހެއްޓުމަށް ލުއިފަސޭހަތަކެއް މި ކާޑުގެ އެހީގައި ލިބިގެންދާނެއެވެ. އަދި ބޮޑެތި ވިޔަފާރިތަކުން ކުރަންޖެހޭ ކުދި ޚަރަދުތައް ބެލެހެއްޓުމުގެ އިތުރުން މުވައްޒަފުންކުރާ ޚަރަދުތައް މެނޭޖްކުރުމަށް ވެސް ފަސޭހަވެގެންދާނެކަމަށް ބުނެފައިވެއެވެ.

ބީއެމްއެލްއިން ވަނީ މާސްޓަރކާޑް ބިޒްނަސް ޕްރިޕެއިޑް ކާޑުގެ ޑޮލަރު ކާޑަކާއި ދިވެހި ރުފިޔާގެ ކާޑެއް އުފައްދާފައެވެ. ބޭރު ވިޔަފާރީގެ މުޢާމަލާތްތަކުގައި ޑޮލަރު ކާޑު ބޭނުންކުރެވޭއިރު ރާއްޖޭގެ ވިޔަފާރީގެ މުއާމަލާތްތަކުގައި ރުފިޔާ ކާޑު ބޭނުންކުރެވޭނެއެވެ.

ދިވެހި ރުފިޔާ ކާޑަށް 500،000 ރުފިޔާއާއި ހަމައަށް ރިލޯޑް ކުރެވޭއިރު، ދުވާލެއްގެ މައްޗަށް 200،000 ރުފިޔާގެ މުޢަމަލާތް ކުރެވެއެވެ. އަދި ޑޮލަރު ކާޑަށް 100،000 ޑޮލަރާއި ހަމައަށް ރިލޯޑް ކުރެވި ދުވާލެއްގެ މައްޗަށް 50،000 ޑޮލަރުގެ މުޢާމަލާތް ކުރެވޭނެއެވެ.

މިއަދު ހަވީރު 17:00އާ ހަމައަށް ޖޭން ހޮޓެލްގައި ކުރިޔަށްދާ ބީއެމްއެލްގެ ބިޒްނަސް އެކްސްޕޯ ކުރިޔަށްދާނެއެވެ.