ENGLISH
03 އޭޕްރީލު 2025
ހަވަނަ ކަނޑެއް އުފެދެނީ!
11 ފެބްރުއަރީ 2025
|
އާކަނޑެއް އުފެދެން ފަށާފައިވަނީ އެފްރިކާގެ ހިސާބަކުން
އެންމެ މަޤްބޫލު
ދުނިޔޭގައިވާ ކަނޑުތަކުގެ ވާހަކަ ދައްކާއިރު އަހަރުމެންނަށް އާއްމުކޮށް އަޑު އެވެނީ ފަސް ކަނޑެއްގެ ވާހަކައެވެ. އެއީ ޕެސިފިކް، އެޓްލާންޓިކް، އިންޑިއަން، އެންޓާޓިކް އަދި އާޓިކް ކަނޑެވެ. ނަމަވެސް ގުދުރަތީ ނިޒާމަށް އަންނަ ބަދަލުތަކުގެ ސަބަބުން ހަ ވަނަ ކަނޑެއް އުފެދުމުގެ ޕްރޮސެސް މިހާރު ފެށިފައިވާކަމަށް ސައިންސްވެރިން ބުނެއެވެ.
ސައިންޓިސްޓުން ދެކޭގޮތުގައި ޓެކްޓޮނިކް ޕްލޭޓްތައް، އެއްޕްލޭޓް އަނެއް ޕްލޭޓާ ޖެހެމުން ދިއުމުގެ ސަބަބުން ދުނިޔޭގެ ހަ ވަނަ ކަނޑެއް އުފެދެމުން އެބަދެއެވެ.
މި ޖިއޮލޮޖިކަލް ޕްރޮސެސްއަކީ އެފްރިކާގައި ދެ ބިންގަނޑެއް ލަސްލަހުން ވަކިވަމުންދާތީ ދިމާވާ ކަމެކެވެ.
މި ޕްރޮސެސްގެ ސަބަބުން އެފްރިކާ ބައިވެގެން، އެންމެ ފަހުން ދެ ބަޔަކަށް ދިއުމަކީ އެކަށީގެންވާ ކަމެކެވެ. އަދި މިހާރު ކަނޑާ ގުޅިފައިނުވާ ޒެމްބިއާ އަދި ޔުގަންޑާ ފަދަ ޤައުމުތަކަށް އަމިއްލަ ކަނޑުގެ ސަރަޙައްދެއް ލިބުން އެކަށީގެންވެއެވެ.
އާކަނޑެއް އުފެދެނީ ޕްލޭޓްތައް ވަކިވެގެން ދިޔުމުގެ ސަބަބުން
ބިމުގެ ބޭރު ހަރު ފަށަލައަށް ލިތޮސްފިއަރއޭ ކިޔާއިރު، މިއީ އެކި ޓެކްޓޮނިކް ޕްލޭޓްތަކަކަށް ބެހިފައިވާ ފަށަލައެކެވެ.
މި ޕްލޭޓްތަކަކީ އަބަދުވެސް ހަރަކާތްތެރިވަމުންދާ ޕްލޭޓްތަކަކަށް ވާއިރު، ޖީޕީއެސް އަދި އެހެނިހެން ޓެކްނޮލޮޖީތަކުގެ ތަރައްޤީގެ ސަބަބުން މި ޕްލޭޓްތަކުގެ ހަރަކާތްތައް ވަރަށް ސީދާކޮށް ދެނެގަނެވެއެވެ.
ދެ ހަފްތާއިން އެއްފަހަރު ނެރޭ "ޖިއޮފިޒިކަލް ރިސާރޗް ލެޓާރސް" ގައި ބުނެފައިވާ ގޮތުގައި އެފްރިކާ ބައިވަމުންދާތީ އާ ކަނޑެއް އުފެދެމުންދާކަން ފަހުގެ ދިރާސާތަކުން ދައްކައެވެ.
މި ފަޅައިގެން ދިއުން ފެންނަނީ އެފްރިކާ، އަރަބި އަދި ސޯމާލިއާގެ ޓެކްޓޮނިކް ޕްލޭޓްތަކުގެ ބޯޑަރުތަކުގައެވެ.
ވޭތުވެދިޔަ 30 މިލިއަން އަހަރު ވަންދެން އަރަބި ޕްލޭޓް ދަނީ ލަސްލަހުން އެފްރިކާ ބައްރާ ދުރަށް ޖެހެމުންނެވެ.
ސޯމާލި ޕްލޭޓްވެސް ދަނީ އެފްރިކާ ޕްލޭޓާ ދުރަށް ޖެހެމުންދާއިރު، އިރުމަތީ އެފްރިކާ ޕްލޭޓް މެދުން ފަޅައިގެންދާ ކަމަށް ވެސް ވަނީ ފާހަގަ ކުރެވިފައެވެ. މި ޖިއޮލޮޖިކަލް ބަދަލުތަކާ ގުޅޭގޮތުން ކެލިފޯނިއާ ޔުނިވަރސިޓީގެ މެރިން ޖިއޮފިޒިސިސްޓް އަދި ޕްރޮފެސަރެއް ކަމުގައިވާ ކެން މެކްޑޮނަލްޑް ވިދާޅުވެފައިވަނީ، އަދަން ކަނޑާއި ރަތް ކަނޑު އަދި އަފާރު ސަރަޙައްދާއި އިރުމަތީ އެފްރިކާގެ ރިފްޓް ވެލީއަށް ފެތުރިގެން ގޮސް އާ ކަނޑަކަށް ވެގެންދާނެ ކަމަށެވެ. އަދި އިރުމަތީ އެފްރިކާގެ އެ ބައި ވަކި ކުޑަ ބައްރަކަށް ވެގެންދާނެ ކަމަށެވެ.
ނަމަވެސް، ދުނިޔޭގެ ހަ ވަނަ ކަނޑު ފެންނާނީ އަދި ވަރަށް ގިނަ ޒަމާންތަކަކަށްފަހުއެވެ.
ދުނިޔޭގެ އެންމެ އައު ކަނޑުގައި އުޅަނދުފަހަރު ދަތުރުކުރަން ފެށުމަށް އަދި މިލިއަން އަހަރު ނަގާނެ ކަމަށް ލަފާކުރެވެއެވެ.
އިރުމަތީ އެފްރިކާ ރިފްޓް ސިސްޓަމްގެ ނަމުން މަޝްހޫރު މި ސަރަޙައްދު އުތުރުގައި، ރަތް ކަނޑުން ފެށިގެން ދެކުނުގައި މޮޒަމްބީކާ ހަމައަށް 3،500 ކިލޯމީޓަރު ދިގުމިނަށް ފެތުރިފައިވެއެވެ.
މިއީ ރިފްޓްތަކާއި، ފޯލްޓްތަކާ އަދި ވޮލްކޭނިކް ހަރަކާތްތަކުގެ މައްޗަށް އެކުލެވިގެންވާ އުނދަގޫ ނިޒާމެކެވެ. މި ނިޒާމުގެ ސަބަބުން މިލިއަން އަހަރު ވަންދެން އެފްރިކާގެ ބިމުގެ ސިފަތައް ބަދަލުވަމުން އައިސްފައިވެއެވެ.
މި ރިފްޓްގެ ސަބަބުން އެފްރިކާގެ އެންމެ މަޝްހޫރު ބައެއް ތަންތަން އުފެދިފައިވެެއެވެ. މީގެ ތެރޭގައި ކިލިމަންޖާރޯ ފަރުބަދަ އާއި ކެންޔާ ފަރުބަދައިގެ ޕީކްތައް ހިމެނެވެ.
ކިލެމިންޖާރޯ ފަރުބަދަ
މި ރިފްޓް އުފެދެން ފެށީ ގާތްގަނޑަކަށް 25 މިލިއަން އަހަރު ކުރިންނެވެ. ނަމަވެސް މީގެ އަސަރުތައް މިހާރުވެސް މެދުނުކެނޑި ކުރަމުންދެއެވެ. ސައިންސްވެރިންގެ އެންމެ ފަހުގެ ދިރާސާތަކުން ދައްކާ ގޮތުން އަހަރަކު 0.8 ސެންޓިމީޓަރަށް މިސަރަހައްދު އިތުރަށް ފުޅާވެއެވެ. އެހެން ކަމުން ކުރިން ހީކުރެވިފައިވާ މުއްދަތުގެ ކުރިން ދުނިޔޭގެ ހަވަނަ ކަނޑު އުފެދިދާނެ ކަމަށް ސައިންސްވެރިން ލަފާކުރެއެވެ.