އަނިޔާގައި އަހަރެއްހާ ދުވަސް ހޭދަކުރުމަށް ފަހު ބްރެޒިލްގެ ފޯވާޑް ނޭމާ އެނބުރި އައިސް ކުޅުނު ދެ ވަނަ މެޗުގައި އަނިޔާވެއްޖެ އެވެ.

ސައޫދީ އަރަބިއްޔާގެ އަލް ހިލާލް އަށް ކުޅެމުން އަންނަ ނޭމާ އަށް އަނިޔާވީ، އޭއެފްސީ ޗެމްޕިއަންސް ލީގުގެ އެލީޓް ލީގު ބުރުގައި، އީރާން ލީގުގެ ދެވަނަ ހޯދި އިސްތިގްލާލްއާ ވާދަކޮށް 3-0 އިން ރޭ ހިލާލް މޮޅުވި މެޗުގަ އެވެ. ހިލާލް މި މެޗު ކާމިޔާބު ކުރީ އަލެކްސެންޑަ މިޓްރޮވިޗްގެ ހެޓްރިކުންނެވެ.

ރޭގެ މެޗުގައި 58 ވަނަ މިނިޓުގަ ކުޅެން އެރި ނޭމާ ވަނީ 90 މިނިޓު ހަމަވާން ތިން މިނިޓަށް ވެފައި ވަނިކޮށް އަނިޔާ ވެގެން ބަދަލު ކުރަން ޖެހިފަ އެވެ. ނޭމާގެ ފަލަމަސްގަނޑަށް ލިބުނު މި އަނިޔާގެ ސީރިއަސްކަމާ މެދު ކްލަބުގެ ބަހެއް އަދި ނުލިބެ އެވެ.

އަލް ހިލާލުން ސައުދީ ލީގުގައި ކުޅޭ ސްކޮޑުގައި ނޭމާ ހިމަނާފައެއް ނުވެ އެވެ. އެއީ އޭނާގެ އަނިޔާ އިތުރަށް ސީރިއަސް ވެދާނެތީ އެވެ. ނަމަވެސް ޗެމްޕިއަންސް ލީގު ސްކޮޑުން ވަނީ އޭނާ އަށް ފުރުސަތު ދީފަ އެވެ. އެގޮތުން އޭނާ ވަނީ އަނިޔާއިން ރަނގަޅު ވުމަށް ފަހު، މިދިޔަ މަހު ޔޫއޭއީގައި އެގައުމުގެ އަލް އައިންއާ ދެކޮޅަށް ކުޅުނު މެޗުގެ ފަހު 15 މިނިޓުގައި ކުޅެފަ އެވެ.

އޭއެފްސީ ޗެމްޕިއަންސް ލީގުގައި ހިލާލް މިހާތަނަށް ކުޅުނު ހަތަރު މެޗު ވެސް ވަނީ ކާމިޔާބުކޮށްފަ އެވެ.

ހަމަ އެއާ އެކު ސައުދީ އަރަބިއްޔާގެ އަލް އަހްލީ ވެސް މިހާތަނަށް ކުޅުނު ހަތަރު މެޗު ވަނީ ކާމިޔާބު ކޮށްފަ އެވެ. އެޓީމުން ރޭ ވަނީ 5-1 އިން އިރާގުގެ އައް ޝުރުތާ (ޕޮލިސް ކްލަބް) ބަލިކޮށްފަ އެވެ. މި މެޗުގައި އަހްލީގެ ރޮބާޓޯ ފިރްމީނޯ ދެ ގޯލު ޖެހި އިރު، ރިޔާދު މަހްރޭޒް ވެސް ވަނީ ގޯލެއް ޖަހައިފަ އެވެ.

ޕޯޗުގަލްގެ ތަރި ކްރިސްޓިއާނޯ ރޮނާލްޑޯ ކުޅޭ އައް ނަސްރު ވަނީ މިހާތަނަށް ކުޅުނު ތިން މެޗުގެ ތެރެއިން ދެ މެޗު ކާމިޔާބުކޮށް، އެއް މެޗު އެއްވަރު ކޮށްގެން ހަތް ޕޮއިންޓް ހޯދައިފަ އެވެ. އެޓީމުގެ ހަތަރު ވަނަ މެޗުގައި މިރޭ އަލް އައިންއާ ދެކޮޅަށް ކުޅޭނެ އެވެ.