ދިވެހިރާއްޖޭގެ ކުޅިވަރު ދާއިރާއަށް އައު ހިތްވަރަކާއި ކުރިއެރުމެއް ގެނެސްދޭނެ ފިޔަވަޅެއްގެ ގޮތުގައި، "ޤައުމީ ކުޅިވަރު ފަންޑު" ގެ ނަމުގައި އައު ފަންޑެއް ގާއިމުކުރުމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ނިންމަވައިފިއެވެ.

މި މުހިންމު ނިންމުން ނިންމަވާފައިވަނީ ވަޒީރުންގެ މަޖިލީހުގެ ބައްދަލުވުމުގައި ކުރެވުނު ފުޅާ ދާއިރާގެ މަޝްވަރާތަކަށްފަހު، އެ މަޖިލީހުގެ ލަފާގެ މަތިންނެވެ.

މި އައު ފަންޑުގެ މައިގަނޑު މަޤްޞަދުތަކުގެ ތެރޭގައި ދިވެހި ކުޅުންތެރިންނާއި އެތުލީޓުންގެ އަދަދު އިތުރުކުރުމާއި، ކުޅިވަރު ކުރިއަރުވައި ތަރައްޤީކުރުމާއި، އަދި ދިވެހި ކުޅިވަރު ޖަމާޢަތް ނުވަތަ ކުޅިވަރު ޢާއިލާ ބާރުވެރިކުރުވުން ހިމެނެއެވެ. މި ކަމާ ގުޅޭގޮތުން މިނިސްޓަރ އޮފް ސްޕޯޓްސް، ފިޓްނަސް އެންޑް ރެކްރިއޭޝަން ޢަބްދުﷲ ރާފިޢު ހުށަހެޅުއްވި ހުށަހެޅުއްވުމަށް ބިނާކޮށް ވަނީ މި ތާރީޚީ ނިންމުން ނިންމަވާފައެވެ.

މީގެއިތުރުން، ޤައުމީ ކުޅިވަރު ފަންޑު ގާއިމުކުރުމާ ގު ގުޅިގެން ޤާނޫނު ނަންބަރު 30/2015 (ދިވެހިރާއްޖޭގެ ކުޅިވަރު ޤާނޫނު) އަށް ގެންނަންޖެހޭ އިޞްލާޙުތައް ގެނައުމަށްޓަކައި ކުރަންޖެހޭ އެންމެހައި ކަންކަން ކުރިއަށް ގެންދިއުމަށްވެސް ވަޒީރުންގެ މަޖިލީހުގެ ބައްދަލުވުމުގައި ވަނީ އެއްބަސްވެވަޑައިގެންފައެވެ.