އޭ- 330 މޮޑެލްގެ ވައިޑް ބޮޑީ މަތިންދާބޯޓު ގެނައުމުގެ ދުރު ރާސްތާ އަމާޒުގެ ބޭނުމަކީ ގައުމީ އެއާލައިން، މޯލްޑިވިއަން އަކީ ރާއްޖެއަށް އެންމެ ގިނަ ފަތުރުވެރިން އުފުލާ ލީޑިން އެއާލައިނަށްވުން ކަމަށް، އައިލެންޑް އޭވިއޭޝަން ސާވިސް (އައިއޭއެސް) އިން ވިދާޅުވެއްޖެއެވެ.

އެމްއެމްޓީވީގެ "ބޮޑު ޚަބަރު" ޕްރޮގްރާމުގައި މޯލްޑިވިއަންއިން ގެންނަ ފުރަތަމަ ވައިޑް ބޮޑީ މަތިންދާބޯޓު ގެނައުމާ ބެހޭ ގޮތުން މައުލޫމާތު ދެއްވަމުން، އައިއޭއެސްގެ އޮފިޝަލުން ވިދާޅުވީ މޯލްޑިވިއަންގެ ފްލީޓަށް ވައިޑް ބޮޑީ މަތިންދާބޯޓު ތައާރަފު ކުރުމަކީ ރައީސް ޑރ. މުޙައްމަދު މުޢިއްޒު ވަޢުދުވެވަޑައިގެން، ޤައުމީ އެއާލައިންއާ ހަވާލުކުރައްވާފައިވާ މުހިންމު މަސައްކަތެއް ކަމަށެވެ. އެހެން ކަމުން ވައިޑް ބޮޑީ މަތިންދާ ބޯޓު ގެނައުމުގެ މަސައްކަތް ކުރަމުން ދަނީ ޤައުމީ ޒިންމާއެއްގެ ގޮތުގައިކަން އައިއޭއެސްގެ އޮފިޝަލުން ފާހަގަ ކުރެއްވިއެވެ.

"ޤައުމީ އެއާލައިން މޯލްޑިވިއަންއަށް މި އިތުރުކުރެވޭ ވައިޑް ބޮޑީ އެއާކްރާފްޓް އިތުރުކުރުމަކީ ޤައުމީ ޕްރޮޖެކްޓެއް. މިކަމުގެ ސަބަބުން ކޮންމެ ގޭޓްވޭއެއް ވެސް އަޅުގަނޑުމެންނަށް ހުޅުވާލެވޭ އެބަ،" އައިއޭއެސްގެ ބިޒްނަސް ޑިވެލޮޕްމަންޓް ސްޓްރެޓެޖިސްޓް މުޙައްމަދު ސައްފާހް ވިދާޅުވި އެވެ.

އޭނާ ވިދާޅުވީ ވައިޑް ބޮޑީ މަތިންދާބޯޓު ގެނައުމުގެ ޕްރޮޖެކްޓަކީ ސަރުކާރުން ވަރަށް ގާތުން ބަލަމުންގެންދާ ޕްރޮޖެކްޓެއް ކަމަށެވެ.

އައިއޭއެސް އިން ވިދާޅުވީ ޤައުމީ އެއާލައިންގެ ފްލީޓް ވަރުދަރަވުމަކީ، ވަރަށް މުހިންމު ބޮޑެތި ފައިދާތަކެއް ލިބިގެންދާނެ ކަމެއް ކަމަށެވެ.

ޤައުމީ އެއާލައިންގެ ފައިނޭންޝަލް ކޮންޓްރޯލަރ އަޙްމަދު ރަމީޒު ވިދާޅުވީ ފުރަތަމަ ކަމެއްގެ ގޮތުން، ހައްޖުވެރިންނަށް ރަނގަޅު ޚިދުމަތެއް ފޯރުކޮށްދެވޭނެ އެކަށީގެންވާ ބޯޓެއް ލިބުމަކީ ދިވެހި ހައްޖުވެރިނަށް ލިބިގެންދާނެ ވަރަށް ބޮޑު ފަސޭހައަކަށްވާނެ ކަމަށެވެ.

"ތަކުލީފު އުފައްދާ އެއް ކަންތައް، ހައްޖާޖީން ބޭރަށް ގެންދިއުމަށް ދިމާވާ ދަތިތައް، މިބޯޓު ތައާރަފުކުރުމާއެއްކޮށް މި ކަންތައްތަކަށް ވެސް ތަސައްލީއެއް ލިބިގެންދާނެ. ހަމައެހެންމެ ރާއްޖެއިން ބޭރަށް (މުދާ) އެކްސްޕޯޓް ކުރުމުގެ ދޮރުވެސް ހުޅުވިގެންދޭ،" ރަމީޒު ވިދާޅުވިއެވެ. "ޕާފޯމަސް ވައިސްކޮށް ބަލަންޏާ ވެސް މިއީ މިހާރު ދުނިޔޭގެ އެހެން އެއާލައިންތަކުން ވެސް ބޭނުކުރާ އެންމެ ޒަމާނީ އެއް ބޯޓު، ޕާފޯމަންސް އާއި އެފިސަންސީ އަށް ބަލާކަމުގައި ވިއަސް ކުންފުންޏާއި ދިވެހިންނަށް ވެސް ވަރަށް ގިނަ ފައިދާތަކެއް ލިބިގެންދާނެ."

އޭނާ ވިދާޅުވީ ހައްޖުވެރިން އުފުލުމާ ގުޅޭ ގޮތުން ހައްޖު ކޯޕަރޭޝަންއާ މަޝްވާރާ ކުރައްވަމުން ގެންދަވާ ކަމަށެވެ. މީގެ ގާތްގަނޑަކަށް 25 އަހަރުކުރިން ސަރުކާރުން އައިއޭއެސް އުފެއްދެވީ ވެސް، ކުރީގެ ޤައުމީ އެއާލައިން އެއާމޯލްޑިސް ބަނގުރޫޓުވާން ދިމާވުމާ ގުޅިގެން، އޭރު މައްކާގައި ތިބި ދިވެހި ހައްޖުވެރިން ގެނައުމަށް ގޮންޖެހުންތަކެއް ދިމާވުމާއި ގުޅިގެންނެވެ. އެއާމޯލްޑިވްސްގައި ވައިޑް ބޮޑީ ދެ ބޯޓު ބޭނުންކުރިއެވެ.

ބިޒްނަސް ކްލާސް 18 ސީޓާއި، 36 ޕްރިމިއަމް އިކޮނޮމީ އަދި 210 އިކޮނޮމީ ސީޓާއެކު ޖުމްލަ، 264 ސީޓު ހިމެނޭ މި ބޯޓު ހޯމަ ދުވަހު ރާއްޖެ ގެންނަން ހަމަޖެހިފައިވާއިރު، މި ބޯޓުގެ ފުރަތަމަ ދަތުރުތައް ކުރާނީ ޗައިނާގެ ވެރިރަށް ބެއިޖިން އާއި ޝަންހާއި އާއި ޗެންދޫ އަށް ކަމަށް އައިއޭއެސްއިން ވިދާޅުވެއެވެ. މިގޮތުން އެ ތިން ސިޓީއަށް ހަފުތާއަކު ދަތުރެއް ކުރަން ނިންމާފައިވާއިރު، އަހަރަކު 60،000 ފަތުރުވެރިން ރާއްޖެއަށް އިތުރަށް ގެނެވޭނެކަމަށް އައިއޭއެސްއިން އަންދާޒާކުރެއެވެ.

"ޤައުމީ އެއާލައިން ޑޮމެސްޓިކާއި ރީޖަނަލް މަންޒިލުތަކަށް ގޮސްގެން އެކަނި ފުއްދާލެވޭކަށް ނެތް، އަޅުގަނޑުމެން އެބަޖެހޭ އަޅުގަނޑުމެންގެ އެއާލައިންގެ ފިޔަގަނޑު އެހެން އެއާލައިންތަކެކޭ އެއްވަރަށް ފުޅާކުރަން، ފްލެގް ކެރިޔާގައި މި ރާއްޖެއަށް ޓޫރިސްޓުން ގެނެސް އަޅުގަނޑުމެންނަކީ ރާއްޖެއަށް އެންމެ ގިނައިން ޓޫރިސްޓުން ގެންނަ އެއާލައިނަކަށްވާން، އެއީ އަޅުގަނޑުމެންގެ ދުރުރާސްތާ ވިސްނުމަކީ،" ރަމީޒު ވިދާޅުވިއެވެ.

މޯލްޑިވިއަން އިން އިތުރަށް ފާހަގަ ކުރެއްވި ގޮތުގައި ޤައުމީ އެއާލައިން ވަރުގަދަވުމުގެ ތިންވަނަ ފައިދާއަކީ ނާޒުކު ހާލަތްތަކުގައި ޤައުމީ ޚިދުމަތެއްގެ ގޮތުން ކުރަންޖެހޭ ދަތުރުތައް ކުރުމެވެ.

ޒަމީޒް ވިދާޅުވީ ކޮވިޑާ-19 އާއި އެނޫން ހާދިސާތަކާ ގުޅިގެން، ބޭރު ޤައުމުތަކުގައި ތިބި ދިވެހިން އަނބުރާ ޤައުމަށް ގެނެސްދިނުމާއި، ޒަރޫރީ ބޭސްފަރުވާ އާއި ކާބޯތަކެތި ގެނައުމުގައި ވެސް މޯލްޑިވިއަނުން މުހިންމު ރޯލެއް އަދާކުރައްވާފައިވާ ކަމަށެވެ.

"މި ބޯޓުތަކުގެ އެންމެ ބޮޑު އެއް ބޭނުމަކީ ޤައުމަށް ދިމާވާ ދަތިހާލަތްތަކުގައި އަބަދުވެސް ނެޝެނަލް ފްލެގް ކެރިއާ ބޯޓެއްގައި ރެސްކިޔު ޕްލޭނތައް ކުރެވިފައިހުރުން،" ކޮވިޑް ތެރޭގައި ކުރި ދަތުރުތައް ފާހަގަ ކުރައްވައި ރަމީޒު ވިދާޅުވިއެވެ.

އައިއޭއެސްއިން ވިދާޅުވީ ތަނަކަށް މަޑުނުކޮށް 10 ގަޑިއިރު ދަތުރުކުރުމުގެ ޤާބިލުކަން ލިބިފައިވާ، ވައިޑް ބޮޑީ މަތިންދާބޯޓުގައި 10 ޓަނުގެ ކާގޯ އުފުލުމަކީ، ރާއްޖެއިން ޗައިނާ އަށް މުދާ ފޮނުވާށާ އަދި ޗައިނާ އިން މުދާ ގެންނަން ބޭނުންވާ ފަރާތްތަކަށް ވެސް ލިބޭނެ ރަނގަޅު ފުރުސަތެއް ކަމަށެވެ. ވާދަވެރި އަގެއްގައި މި ބޯޓުގައި ދިވެހިންނަށް ޗައިނާއަށް ދަތުރުކުރެވޭނެ ކަމަށް ވެސް އެ ކުންފުނިން ވިދާޅުވިއެވެ.

އާބޯޓު ގެނައުން ފާހަގަ ކުރުމަށްޓަކައި ހޯމަ ދުވަހު ހަވީރު ޚާއްސަ ޖަލްސާއަކާއި އެއާޝޯއެއް ކުރިއަށް ގެންދިއުމަށް ވަނީ ހަމަޖައްސައިފައެވެ.