ޖަޕާނުގެ ނަން އަހަރުމެންނަށް އާންމުކޮށް އަޑުއިވެނީ އެންމެ ފަހުގެ ޓެކްނޮލޮޖީއާ ގުޅުންހުރި ކަންކަމުގައެވެ. އެހެން ނަމަވެސް ޖަޕާނަކީ ވަރަށް މުއްސަނދި ތާރީޚެއް ވެސް އޮތް ގައުމެކެވެ. މިގޮތުން ދުނިޔޭގެ އެންމެ ގިނަދުވަސްވީ ހޮޓާ އަދި ދެވަނަޔަށް އެންމެ ގިނަ ދުވަސްވީ ހޮޓާ ވެސް ހުންނީ ޖަޕާނުގައަވެ.

ރެކޯޑްތަކުން ދައްކާގޮތުން ޖަޕާނުގެ ހަޔަކާވާގައި ހުންނަ ނިޝިޔާމާ އޮންސެން ކިޔުންކަން އަކީ ދުނިޔޭގެ އެންމެ ގިނަ ދުވަސްވީ ހޮޓަލެވެ. މީގެ 1300 އަހަރުކުރިން ބިނާކުރި މި ހޮޓާ 53 ދަރިފަސް ކޮޅަކަށް ވާރުތަވެފައިވެއެވެ. އަދި މި ހޮޓާ ހުންނަނީ ޖަޕާނުގެ މަޝްހޫރު މައުންޓްް ފުޖީއާ މާ ދުރުނޫން ހިސާބެއްގައެވެ.

ގުދުރަތީ ގޮތުން ހޫނުފެން ލިބޭ ބިލިގާތަކުން މަޝްހޫރުވެފައިވާ މި ހޮޓާ ހުންނަ ސަރަހައްދު އެންމެ ފުރަތަމަ ފެނުނީ ޖަޕާނުގެ 38 ވަނަ އެމްޕެރާ، އެމްޕަރާ ޓެންޖީގެ އަރިސްފަރާތެއްގެ ދޮށީ ދަރިފުޅުކަމަށްވާ ފުޖިވާރާ މަހީޓޯއަށެވެ. މަހީޓޯއަށް އެ ސަރަހައްދުން ގުދުރަތީގޮތުން ހޫނުފެން ލިބޭކަން އެނގުމުން އެތަނަތަނުގައި ފެން ވެރޭގޮތަށް ބިލިގާތަކެއް ބިނާކުރިއެވެ. އަދި އެޔަށް ފަހު ކޮންމެ ބިލިގާއަކަށް ކޮޓަރިއެއް ހަދާ އެކި ސަރަހައްދުން މީހުންނަށް ޒިޔާރަތް ކުރެވޭގޮތަށް ހޮޓަލެއް ބިނާ ކުރިއެވެ.

މި ހޮޓާ ބިނާކުރި ފަހުން ވޭތުވެދިޔަ މާޒީގައި، މިތަން ވަނީ އަސްލު ނުގެއްލޭ ގޮތަށް އެތަކެއް ފަހަރު ތަރައްގީ ކޮށްފައެވެ. އެގޮތުން 1909 އަދި 1916 ވަނަ އަހރު ދިމާވި އަލިފާނުގެ ހާދިސާއަށްފަހު ކުރެވުނު މަރާމާތުތަކާ 1925 އަދި 1982 ވަނަ އަހަރު ބާރުގަދަ ތޫފާނެއްގެ އަސަރު ކޮށްގެން ކުރެވުުނު މަރާމާތުތައް ފާހަގަ ކޮށްލެވެއެވެ.

މިހާރު މި ހޮޓަލުގައި 37 ކޮޓަރި ހުންނައިރު، ކޮންމެ ކޮޓަރިއެއް ވެސް ފަރުމާކޮށްފައި ވަނީ މި ސަރަހައްދުން ލިބޭ ގުދުރަތީ ހޫނުފެނުން ފެންވަރާލެވޭނެ ގޮތަށެވެ. މި ހޫނުފެން ލިބޭ ނިޒާމުން މިނިޓަކު 1000 ލީޓަރުގެ ހޫނުފެން ޕަމްޕު ކޮށްދެއެވެ. ޖަޕާނުގެ ސަގާފީ ކެއުން ލިބޭ ޚާއްސަ ރެސްޓޯރެންޓެއް ވެސް މި ހޮޓޮލުގައި ހުންނައިރު، ފެން ދައުރުވާ ގޮތަށް ގުދުރަތީ ގޮތުން ހޫނުފެންލިބޭ ހަތަރު ވެޔޮ ވެސް މިތަނުގައި ހުރެއެވެ.

މިތަނުގެ ހޫނުފެނުގެ ވެޔޮތަކުން ފެންވަރާލުމަށް ވަރަށް ގިނަ ބަޔަކު، ޒަމާނުއްސުރެ މި ހޮޓަލަށް ޒިޔާރަތް ކުރެއެވެ. ބުނެވޭ ގޮތުގައި މިތަނުގައިވާ ވެޔޮތަކުން ފެންވެރުމުން ވަރަށް ގިނަ ސިއްހީ ފައިދާ ތަކެއް ލިބެއެވެ. އޭގެ ތެރޭގައި ހަމުގެ ބަލިތައް، ގައިގައި ރިއްސުން އަދި ހަޖަމްކުރާ ނިޒާމުގެ ބަލިތަކުން ވެސް ރައްކާތެރިކަން ލިބޭކަން ފާހަގަ ކުރެވިފައިވެއެވެ. މިފައިދާތައް ލިބޭ ސަބަބަކީ މިފެނުގައި ހިމެނޭ ސޯޑިއަމް، ކެލްސިއަމް ނައިޓްރޭޓް އަދި ކްލޮރައިޑްގެ މިންވަރުގެ ސަބަބުންނެވެ.

ގުދުރަތީ ރީތިކަމުން ވެސް މުއްސަނދިކަން ލިބިފައިވާ މި ސަރަހައްދަށް ވަރަށް މަޝްހޫރު ފަރާތްތައް ވެސް ޒިޔާރަތް ކޮށްފައިވެއެވެ. އޭގެތެރޭގައި ޖަޕާނުގައި 400 އަހަރުވަންދެން ވެރިކަން ކޮށްފައިވާ ޝޮގުން ޚާންދާނުގެ އިސް ވެރިއެއްކަމަށްވާ ޓޮކުގަވާ އަދި ޖަޕާނުގެ މިހާރުގެ އެމްޕެރަރ ނަރުހީޓޯ ވެސް ހިމެނެއެވެ.

ދެހާސް އެގާރަ ވަނަ އަހަރު ގިނީސް ދުނިޔޭގެ ރެކޯޑު ފޮތުން މި ހޮޓާ ވަނީ އެންމެ ގިނަ ދުވަސްވީ ހޮޓާގެ ގޮތުގައި ޖާގަ ހޯދާފައެވެ. މި ހޮޓާ ފަރުމާ ކުރެވިފައިވާ ގޮތުން މިތަނަށް ވަނުމުން އިހުސާސް ކުރެވޭނީ އެތަކެއް ހާސް އަހަރެއް ކުރީ ޒަމާނެއްގައި އުޅެވޭ ކަހަލަ އިހުސާސެކެވެ.