ENGLISH
03 އޭޕްރީލު 2025
އެންމެ ނަސީބުގަދަ މީހަކީ މިއީތަ؟
02 ޖެނުއަރީ 2025
|
ފްރޭން ސެލަކް: އޭނާ ވަނީ ނުރައްކާތެރި ހަތް އެކްސިޑެންޓަކުން ސަލާމަތްވެފައި.
އެންމެ މަޤްބޫލު
ނަވާރަ ސަތޭކަ އޮނަތިރީސް ވަނަ އަހަރު ކްރޮއޭޝިއާގައި އުފަންވި ފްރޭން ސެލަކް ވަނީ ހިތާމަވެރި ހާދިސާތަކުން ސަލާމަތްވުމުގެ އާދަޔާ ޚިލާފު ޤާބިލުކަމެއް ލިބިފައިވާ މީހެއްގެ ގޮތުގައި މަޝްހޫރުވެފައެވެ. އޭނާގެ ދިރިއުޅުމުގައި، ހޮލީވުޑް ފިލްމެއްގެ ސްކްރިޕްޓެއް ކަމުގައި ހީވެދާނެ ފަދަ ގިނަ އަދަދެއްގެ މަރާ ކައިރިވި ހާދިސާތަކެއް ދިމާވެފައިވެއެވެ. ދިރި ހުރުމާއި، ކެތްތެރިކަމާއި އަދި ހީނުކުރާ ފަދަ ނަސީބުގެ އޭނާގެ އާދަޔާ ޚިލާފު ވާހަކަ ދުނިޔޭގެ ސަމާލުކަން ހޯދައި، ދުނިޔޭގެ އެންމެ ނަސީބުވެރި މީހުންގެ ތެރެއިން އެކަކުގެ ގޮތުގައި ތާރީޚުގައި އޭނާގެ ނަން ލިޔެވުނެވެ.
ފްރޭން ސެލަކް އަކީ މިޔުޒިކް ޓީޗަރެއް
ފްރޭން ސެލަކްގެ އާދަޔާ ޚިލާފު ދަތުރު ފެށުނީ 1957 ގައެވެ. އެ ދުވަސްވަރު، އޭނާއަކީ ނިސްބަތުން އާދައިގެ ދިރިއުޅުމެއް އުޅެމުން އައި މިއުޒިކް މުދައްރިސެކެވެ. ނަމަވެސް އޭނާ އަރައިގެން ދިޔަ ބަހެއް މަގުން ބޭރުވެ ކޯރަކަށް ވެއްޓުމާއެކު ހުރިހާ ކަމެއް ބަދަލުވެގެން ދިޔައެވެ. އަޖައިބުވާ ފަދަ ގޮތަކަށް ސެލަކް ސަލާމަތްވިއެވެ. އަދި މިއީ އޭނާއަށް ދިމާވާނެ ގިނަ އަދަދެއްގެ މަރާ ކައިރިވި ހާދިސާތަކުގެ ފުރަތަމަ ހާދިސާކަން އޭނާއަކަށް ނޭނގުނެވެ.
ނަވާރަ ސަތޭކަ ފަސްދޮޅަސް ދެވަނަ އަހަރު ސެލަކަށް އަނެއްކާވެސް މަރާ ކައިރިވި ހާދިސާއެއް ދިމާވިއެވެ. އެއީ އޭނާ ދަތުރުކުރަމުންދިޔަ ރޭލު މަގުން ނެއްޓި، އެތައް ފަސިންޖަރުންނެއް މަރުވި ހާދިސާއެކެވެ. ނަމަވެސް ހަލަބޮލިކަމާއި ހަލާކުވުމުގެ ތެރެއިން އޭނާ ނުކުތީ ކުދިކުދި އަނިޔާތަކަކާ އެކުގައެވެ. ނަވާރަ ސަތޭކަ ފަސްދޮޅަސް ތިން ވަނަ އަހަރު ސެލަކަށް ދިމާވީ އެންމެ މަދުން އަދި އެންމެ ބިރުވެރި ހާދިސާތަކުގެ ތެރެއިން އެއް ހާދިސާ ކަމަށްވާ މަތިންދާބޯޓު ވެއްޓުމުގެ ހާދިސާއެކެވެ. ބޯޓު ދަތުރުކުރަމުންދަނިކޮށް ދޮރު މައްސަލަޖެހުމާ ގުޅިގެން އޭނާ ބޯޓުން ބޭރަށް ފުންމާލި، ހުރިހާ އުންމީދެއް ކެނޑިފައިވަނިކޮށް، އޭނާ ވެއްޓުނީ ވިނަ ގަނޑެއްގެ މައްޗަށެވެ. އަދި އެ ބޯޓު ވެއްޓި 19 މީހުން މަރުވިއިރު އަނެއްކާވެސް ސެލަކަށް އެއްވެސް އަނިޔާއެއް ނުވެ ސަލާމަތްވިއެވެ.
އަހަރުތައް ފާއިތުވަމުން ދިޔައިރު ނުރައްކާތެރި ހާދިސާތައް ދިމާވަމުން ދިޔައެވެ. ނަވާރަ ސަތޭކަ ހަތް ދިހަ ވަނަ އަހަރާއި 1973 ގައި ސެލަކް އަނެއްކާވެސް ދެ ހާދިސާއަކުން ސަލާމަތްވިއެވެ.
އެއީ އޭނާގެ ކާރުގައި އަލިފާން ރޯވެ ގޮވައިގެން ދިޔަ ދެ ހާދިސާއެކެވެ. ދެ ފަހަރު ވެސް އޭނާއަށް ގެއްލުމެއް ނުލިބި ސަލާމަތްވިއެވެ. އަހަރުތަކެއް ފަހުން، 1995 ގައި، އޭނާއަށް އަނެއްކާވެސް ފުރާނައަށް ނުރައްކާވާ ފަދަ ހާދިސާއެއް ދިމާވިއެވެ. އެއީ ދުއްވާފަދިޔަ ބަހަކުން އޭނާގެ ގައިގަ ޖެހުމުގެ ހާދިސާއެކެެވެ. އަޖައިބުވާ ފަދަ ގޮތަކަށް އެ ހާދިސާއިން ވެސް އޭނާ ސަލާމަތްވިއެވެ.
ފްރޭން ސެލަކް ވަނީ މިލިޔަން ޑޮލަރުގެ ލޮޓަރީއެއް ކާމިޔާބުކޮށްފައި
ސެލަކަށް ކުރިމަތިވި އެންމެ ބިރުވެރި އެއް ހާދިސާ ހިނގީ 1996 ގައެވެ. އެއީ އޭނާގެ ކާރު ފަރުބަދައަކުން ވެއްޓުނު ހާދިސާއިން އޭނާ ކުއްލިއަކަށް މަރުން ސަލާމަތްވި ހާދިސާއެކެވެ. ކާރު ތިރިއަށް ވެއްޓެމުންދަނިކޮށް، އޭނާ ކާރުން ބޭރަށް ފުންމާލައި، ގަހެއްގައި ހިފެހެއްޓުމުން މަރުވެދާނެ ފަދަ ވެއްޓުމަކުން ސަލާމަތްވިއެވެ.
މަރާ ކައިރިވި ހަތް ހާދިސާއަކުން ސަލާމަތްވުމަށް ފަހު، ސެލަކްގެ ވާހަކައަށް 2003 ގައި އަނެއްކާވެސް އާދަޔާ ޚިލާފު ބަދަލެއް އައެވެ. އެއީ އޭނާގެ ނަސީބުގަދަކަން މުޅިން އެހެން ގޮތަކަށް ދުނިޔެ އަށް ފެނުނު ކަމެކެވެ. އޭނާ ކްރޮއޭޝިއާގެ ލޮޓަރީ ކާމިޔާބުކޮށް، ގާތްގަނޑަކަށް އެއް މިލިއަން ޑޮލަރުގެ އިނާމެއް ލިބުނެވެ. ކުއްލިއަކަށް މުއްސަނދިވި ނަމަވެސް ޚަރަދުކުރުމުގައި ދެއްކުންތެރިކަން ޚިޔާރުކުރުމުގެ ބަދަލުގައި އާދައިގެ ދިރިއުޅުމެއް އިޚްތިޔާރުކުރިއެވެ.
ލޮޓަރީގެ ފައިސާއިން، ސެލަކް ފުރަތަމަ ގަތީ އޭނާ ދިރިއުޅެން އެންމެ ޒަމާނީ ގެއެކެވެ. ނަމަވެސް އާދައިގެ ދިރިއުޅުމަކަށް ލޯބިކުރާ ސެލަކް، 2010 ގައި އެ ގެ ވިއްކާލައި، އޭނާގެ އުފަން އަވަށުގައި އާދައިގެ ދިރިއުޅުމެއް އުޅުމަށް ނިންމިއެވެ. ސެލަކް އޭނާގެ ލޮޓަރީގެ ފައިސާގެ ބޮޑު ބައެއް ހޭދަކުރީ އިޖްތިމާއީ ކަންކަމަށެވެ. އޭގެ ތެރޭގައި އެތަކެއް ބައެއްގެ ބޮޑެޓި އޮޕަރޭޝަންތަކަށް ފައިސާ ޚަރަދު ކުރުމާއި، ފުރާނައަށް ނުރައްކާވާ ފަދަ އެތައް ހާދިސާއަކުން ސަލާމަތްވިކަމަށްޓަކައި ޝުކުރުވެރިވުމުގެ ގޮތުން އޭނާގެ އަވަށުގެ މީހުންނަށް ފައްޅިއެއް ބިނާކުރުން ހިމެނެއެވެ.
ސެލަކް، އޭނާ ބިނާ ކުރި ފައްޅި ކައިރީގައި ހުއްޓިލައިގެން
ފްރޭން ސެލަކްގެ ދިރިއުޅުމުގެ ވާހަކައަކީ ކެތްތެރިކަމާއި ޝުކުރުވެރިވުމުގެ މުހިންމުކަން ދައްކުވައިދޭ ވަރުގަދަ ހެއްކެކެވެ. މަރާ ކައިރިވި ހާދިސާތަކާ ކުރިމަތިލާންޖެހުނު ނަމަވެސް، ސެލަކް އޭނާގެ މުޅި ދިރިއުޅުމުގައި ވެސް ދެމިހުރީ އުފާވެރިކަމާއި ހިތްތިރިކަން އިސްކޮށްގެންނެވެ. މަރާ ކައިރިވި ހާދިސާތަކާ ތަކުރާރުކޮށް ކުރިމަތިލާންޖެހުމާއި ލޮޓަރީ ކާމިޔާބުކުރުމުގެ އުފާ، މި އިމްތިހާނުތައް ތަޖުރިބާކުރުމަށްފަހު، ސެލަކް އިޚްތިޔާރުކުރީ އޭނާ ފަސްވަނަ އަށް ކައިވެނި ކުރި އަނބިމީހާއާއެކު އާދައިގެ ދިރިއުޅުމެއް އުޅުމަށެވެ.
ސެލަކް އޭނާގެ ފަސްވަނަ އަނބިމީހާއާއެކު
ދިރިއުޅުމާ ބެހޭގޮތުން ވާހަކަދައްކަމުން، ސެލަކް ބުނެފައިވަނީ، ޙަޤީޤީ ދިރިއުޅުމުގައި އެއްވެސް ފިލްމަކަށްވުރެ މާ އަޖައިބު ކުރުވަނިވި ކަންކަމާ ދިމާވާނޭ ކަމަށެވެ. އޭނާގެ މިއާދަޔާ ޚިލާފު ތަޖުރިބާތަކުން ޢިބުރަތް ލިބިގަނެގެން ވަރަށް ގިނަ މީހުންގެ ދިރިއުޅުމާދޭތެރޭ އޮތް އުއްމީދު ވަނީ އާވެފައެވެ.
ބަހުގެ ހާދިސާތަކާއި މަތިންދާބޯޓު ވެއްޓުމުގެ ހާދިސާތަކުން ފެށިގެން ލޮޓަރީން މިލިއަން ޑޮލަރު ކާމިޔާބުކުރުމާ ހަމައަށް، ފްރޭން ސެލަކްގެ ދިރިއުޅުމަކީ ނަސީބާއި ކެތްތެރިކަމުގެ އާދަޔާ ޚިލާފު ނަމޫނާއެކެވެ. އެ ވާހަކައިން އަޅުގަނޑުމެން އެންމެންނަށް ވެސް ހަނދާންކޮށްދެނީ ދިރިހުރުމުގެ ރޫޙަކީ އެންމެ ހީނުކުރެވޭ ފަދަ ޙާލަތްތަކުގައިވެސް ކެތްތެރިވެ، ކުރިއަރައިގެން ދިއުމުގެ ޤާބިލުކަން ލިބިފައިވާ އެއްޗެއް ކަމެވެ.