ފްރިޖް ހުޅުވާލުމާއެކު ނުބައި ވަހެއް ދުވުމަކީ ގިނަ ބަޔަކު ކަންބޮޑުވާ ކަމެކެވެ. މިފަދަ ވަސް ދުވަނީ ގިނަފަހަރު ހަނދާންނެތުމުގެ ސަބަބުން ނުވަތަ ވަގުތު ނެތުމުގެ ސަބަބުން ފްރިޖުގައި ގިނަ ދުވަސްވެ ހަލާކުވެފައިވާ ކާބޯތަކެތި ބެހެއްޓުމުންނެވެ. މިފަދަ ތަކެތީގެ ވަސް ފްރިޖުގައި ހަރުލުމަކީ އާދައިގެ ކަމެކެވެ. ކޮންމެ މީހަކުވެސް ބޭނުންވާނީ ތާޒާކަމާއި ސާފުތާހިރުކަން ފުރިހަމަ ފްރިޖެކެވެ. ތިރީގައި މިވާ ފަސް ކަންތައް ކުރުމުން ފްރިޖުގެ ތާޒާކަމާއި ސާފުތާހިރުކަން ދެމެހެއްޓުމަށް އެހީތެރިވެދޭނެއެވެ:

1. ފްރިޖް މުޅިން ހުސްކޮށް ސާފުކުރުން:

ފްރިޖް ސާފުކުރުމުގެ ފުރަތަމަ ފިޔަވަޅަކީ އޭގައި ހުރި ހުރިހާ އެއްޗެއް ނަގައި، އެތެރެއާއި ބޭރު ރަނގަޅަށް ފޮހެލުމެވެ. މިކަމަށް ވަގުތު ނަގާނެތީ، ފިނިހޫނުމިނަށް ނާޒުކު ތަކެތި ވަގުތީގޮތުން ފިނި ތަނެއްގައި ބެހެއްޓުމަށް ސަމާލުކަން ދޭންވާނެއެވެ. ތާފަނާ ފެނުގައި އޮކްސީ ޕޮޑެއް ގިރުވުމަށްފަހު، އެ ބޭނުންކޮށްގެން ފޮތިގަނޑަކުން ފްރިޖުގެ އެތެރެއާއި ބޭރު ފޮހެލާށެވެ. ފޮހޭއިރު ފްރިޖުގެ އަތްގަނޑުތައް ހަނދާން ނައްތާނުލުން މުހިންމެވެ.

2. ޑީއޯޑަރައިޒް ކުރުން:

ފްރިޖުގައި ހުންނަ ދިގުދެމިގެންދާ ނުބައި ވަސްތަކުން ސަލާމަތްވުމަށް ޤުދުރަތީ ޑީއޯޑަރައިޒަރެއް ބޭނުންކުރުން މުހިންމެވެ. މިކަމަށް ބޭކިން ސޯޑާ ނުވަތަ ވައިޓް ވިނެގަރ ބޭނުންކުރެވިދާނެއެވެ. މިއިން އެއްޗެއް މަތިނުޖަހާ ތައްޓަކަށް އަޅައި، ފްރިޖް ތެރޭގައި މަދުވެގެން 24 ގަޑިއިރު ބަހައްޓާށެވެ. ޙަޤީޤަތުގައި، ފިހާރައިން ގަންނަ ކެމިކަލް އެކުލެވޭ ތަކެއްޗަށްވުރެން ވަސް ނައްތާލުމުގައި ބޭކިންގ ސޯޑާ އަދި ވިނެގަރ އިން ރަނގަޅު ނަތީޖާއެއް ނެރެދެއެވެ. މި ތަކެތިން ހަމައެކަނި ވަސް ނައްތާލުމުގެ އިތުރުން، ވަސް އުފައްދަން މެދުވެރިކުރާ ބެކްޓީރިއާ ވެސް ނައްތާލައެވެ.

3. ޓެމްޕަރޭޗަރ އަދި ތެތްކަމަށް ސަމާލުކަން ދިނުން:

ފްރިޖުގައި ހުންނަ ކާނާ ހަލާކުވުމުގެ އެންމެ ބޮޑު އެއް ސަބަބަކީ ފިނިމިން ރަނގަޅު ނޫން މިންވަރެއްގައި ހުރުމެވެ. ގްރީން ލިވިންގ އައިޑިއާސްއިން ލަފާދޭ ގޮތުގައި، އަވަހަށް ހަލާކުވާ ކާނާ ފިނިމިން މަތި ބައެއްގައި ބަހައްޓައި، ލަހުން ހަލާކުވާ ކާނާ ފިނިމިން މަޑު ބައެއްގައި ބެހެއްޓުން މުހިންމެވެ. ފްރިޖަށް އެންމެ އެކަށީގެންވާ ފިނިމިނަކީ 3 އާއި 4 ޑިގްރީ ސެލްސިއަސް (37 އާއި 40 ޑިގްރީ ފަރެންހައިޓް) އާ ދެމެދުގެ މިންވަރެކެވެ.

4. ބާކީ ހުންނަ ކާބޯތަކެތި ރަނގަޅަށް ބަންދުކޮށްފައި ބެހެއްޓުން:

ބާކީ ހުންނަ ކާބޯތަކެތި ވައި ނުވަންނަ ގޮތަށް މަތި ބާރަށް ޖެހޭ ކޮންޓެއިނަރުތަކުގައި ބަންދުކޮށްފައި ފްރިޖަށް ލުމަކީ މުހިންމު ކަމެކެވެ. ސްޓައިރޯފޯމް އަދި ކާޑުބޯޑު ޓޭކްއައުޓް ކޮންޓެއިނަރުތަކުގައި ފްރިޖުގައި އެއްޗެހި ބެހެއްޓުމުން ނުބައި ވަސް ދުވުމަށް މަގުފަހިވެއެވެ. އޭގެ ބަދަލުގައި، ޓޭކްއައުޓް ފޮށިތައް ރީސައިކަލް ކުރުމަށްފަހު، ބާކީ ހުރި ހުރިހާ އެއްޗެއް ވައި ނުވަންނަ ކޮތަޅު ނުވަތަ ކޮންޓެއިނަރުތަކުގައި ބަހައްޓައި، އެ ބާވަތަކާ ގުޅޭ ތަނުގައި ބެހެއްޓުމުގެ އާދަ ދަސްކުރަންވާނެއެވެ. މިއީ ފްރިޖް ތަރުތީބުކޮށް ބެލެހެއްޓުމަށް ވެސް ވަރަށް ފަސޭހަ ގޮތެކެވެ.

5. ފްރިޖުގައި ތާޒާ ވަހެއް ދެމެހެއްޓުން:

ދިގު މުއްދަތަކަށް ދެމިގެންދާ ނުބައި ވަސްތައް ނައްތާލައި، މީރު ވަހެއް ފްރިޖުގައި ދެމެހެއްޓުމަކީ މުހިންމު ކަމެކެވެ. މިކަމަށްޓަކައި އޮރެންޖް ނުވަތަ ލިމްބޯ ފަދަ ހުތް މޭވާއެއްގެ ތޮށި މޭޒުމަތީ ސަމުސާ ލޮނުކޮޅަކާއެކު ކުޑަ ތަށްޓެއްގައި އަޅައި، ފްރިޖުގެ ހަރުފަތެއްގައި ބެހެއްޓިދާނެއެވެ. ލޮނުން ފްރިޖުގެ ނުބައި ވަސްތައް ހިފަހައްޓާއިރު، ސިޓްރަސްއިން ވައިގެ ތެރެއަށް ތާޒާ، މީރު ވަހެއް ފެތުރޭނެއެވެ. ފްލޯރަލް ވަހެއް ބޭނުންވާނަމަ، ގާޑެނިސްޓާ ބްލޮގަރ އެރިން ލަފާދޭ ގޮތުގައި ބޭކިންގ ސޯޑާއަށް ހިކި ލެވެންޑަރ މާ ނުވަތަ ލެވެންޑަރ އެސެންޝަލް އޮއިލްގެ ދެތިން ތިކި އަޅައިފައި ބެހެއްޓިދާނެއެވެ.

މި ފަސް ފިޔަވަޅު އެޅުމުން، ފްރިޖުގެ ސާފުތާހިރުކަމާއި ތާޒާކަން ދެމެހެއްޓުމަށް އެހީތެރިވެދޭނެއެވެ. މިއީ ގޭބިސީގެ ޞިއްޙަތާއި ދުޅަހެޔޮކަން ކަށަވަރުކުރުމަށް އެޅޭ މުހިންމު ފިޔަވަޅުތަކެކެވެ.